Saif Attack Case / ક્રાઈમ સીન રિક્રીએટ કરાવશે પોલીસ, જાણો અન્ય ક્યા એન્ગલથી કરશે તપાસ

બોલિવૂડ અભિનેતા સૈફ અલી ખાન પર થયેલા હુમલાની પોલીસ દરેક દૃષ્ટિકોણથી તપાસ કરી રહી છે. એક અધિકારીના જણાવ્યા અનુસાર, મુંબઈ પોલીસ આજે સોમવારે બોલિવૂડ અભિનેતા સૈફ અલી ખાનના બાંદ્રા સ્થિત ઘરમાં ક્રાઈમ સીન રિક્રીએટ કરાવશે. સૈફ અલી ખાન પર તેના જ ઘરમાં હુમલાખોરે છ વાર ચાકુ માર્યું હતું. અભિનેતા લીલાવતી હોસ્પિટલમાં સારવાર હેઠળ છે. હાલમાં તે ખતરામાંથી બહાર છે.

આ પણ વાંચો: કરણવીર મહેરા 'બિગ બોસ 18'નો વિજેતા બન્યો, ચમકતી ટ્રોફી સાથે જીતી આટલી મોટી રકમ

પોલીસ આરોપીને સતગુરુ શરણ પાસે લઈ જશે

આ ઘટનાના આરોપીની ધરપકડ કરવામાં આવી છે. તેની નાગરિકતા પણ શંકાના દાયરામાં છે. પોલીસનું કહેવું છે કે 30 વર્ષીય આરોપી બાંગ્લાદેશી છે જે ગેરકાયદેસર રીતે ભારતમાં પ્રવેશ્યો હતો. કથિત હુમલાખોર મોહમ્મદ શરીફુલ ઈસ્લામ શહજાદને પાંચ દિવસની પોલીસ કસ્ટડીમાં મોકલી દેવામાં આવ્યો છે. અધિકારીના જણાવ્યા મુજબ, પોલીસ તેની તપાસના ભાગ રૂપે ક્રાઈમ સીન રિક્રીએટ કરાવશે. આ માટે, પોલીસ આ પાંચ દિવસમાં શહેઝાદને સૈફ અલી ખાનના ઘર 'સતગુરુ શરણ' લઈ જશે.

આંતરરાષ્ટ્રીય દૃષ્ટિકોણથી પણ તપાસ કરવામાં આવશે

પોલીસનું કહેવું છે કે શહજાદ 16 જાન્યુઆરીની સવારે ચોરીના ઈરાદાથી અભિનેતાના ઘરમાં પ્રવેશ્યો હતો. અહેવાલો અનુસાર, પોલીસ આ કેસની આંતરરાષ્ટ્રીય દૃષ્ટિકોણથી પણ તપાસ કરશે. એવું કહેવામાં આવી રહ્યું છે કે ગુનામાં વપરાયેલા હથિયારો જપ્ત કરવામાં આવશે. આ ઉપરાંત, લોહીથી લથપથ કપડાં પાછા મેળવવાના પણ પ્રયાસો કરવામાં આવશે. પોલીસ આ આરોપ સાથે જોડાયેલા તમામ પુરાવા એકત્રિત કરી રહી છે.

આરોપી અભિનેતાથી અજાણ હતો

મુંબઈ પોલીસની તપાસમાં એ પણ બહાર આવ્યું છે કે ધરપકડ કરાયેલ આરોપીને ખબર નહોતી કે તેણે એક પ્રખ્યાત બોલિવૂડ અભિનેતા પર હુમલો કર્યો છે. તેને ટીવી પર અને સોશિયલ મીડિયા દ્વારા સમાચાર જોઈને આ વિશે ખબર પડી. આ ઉપરાંત, તપાસમાં એવું પણ જાણવા મળ્યું કે ગુનો કર્યા પછી આરોપી બાંદ્રા બસ સ્ટોપ પર સૂતો રહ્યો.