શું છે ડ્યુઅલ ડિગ્રી પ્રોગ્રામ, 12મા ધોરણ પછી તેને કરવાથી કેટલા ફાયદા થાય છે? અહીં જાણો આ પ્રશ્નોના જવાબો

મોટાભાગના બોર્ડે ધોરણ 10 અને 12ની બોર્ડ પરીક્ષાના પરિણામો જાહેર કરી દીધા છે. 12માની પરીક્ષા પાસ કરનાર તમામ વિદ્યાર્થીઓ તેમની પસંદગીની કોલેજમાં પ્રવેશ મેળવવા માંગે છે. આજના સમયમાં, ડ્યુઅલ ડિગ્રી પ્રોગ્રામ્સ ખૂબ જ લોકપ્રિય બની રહ્યા છે. ઘણા વિદ્યાર્થીઓ તેમાં એડમિશન લેવા માંગે છે. આ કોર્સને લઈને વિદ્યાર્થીઓના મનમાં ઘણા પ્રશ્નો ઉદ્દભવે છે, જેમ કે, ડ્યુઅલ ડિગ્રી પ્રોગ્રામ શું છે, તે કરવાથી શું ફાયદા થાય છે, એક સાથે બે ડિગ્રી કેવી રીતે મેળવી શકાય, તેમજ ડ્યુઅલ ડિગ્રીના ફાયદા શું છે, ડ્યુઅલ ડિગ્રી પ્રોગ્રામ કયા વિકલ્પો ઉપલબ્ધ છે? આ લેખમાં તમને આ સવાલોના જવાબ મળશે.

ડ્યુઅલ ડિગ્રી પ્રોગ્રામ શું છે?

જો તમે બે અલગ-અલગ વિષયોમાં જ્ઞાન તેમજ નિપુણતા મેળવવા માંગતા હો, તો આ માટે ડ્યુઅલ ડિગ્રી પ્રોગ્રામ શ્રેષ્ઠ વિકલ્પ છે. હવે ઘણી યુનિવર્સિટીઓ દ્વારા વિવિધ વિષયો અથવા કોર્સ માટે ડ્યુઅલ ડિગ્રી ઓફર કરવામાં આવી રહી છે. તેમાં બે જુદા-જુદા ક્ષેત્રોમાં ડિગ્રી મેળવી શકાય છે, જેમ કે- જો તમે સાયકોલોજી તેમજ બિઝનેસ એડમિનિસ્ટ્રેશનમાં ડ્યુઅલ ડિગ્રી પ્રોગ્રામ કરી રહ્યા છો, તો તમે બે અલગ-અલગ ડિગ્રી મેળવી શકો છો, એટલે કે બીએ સાયકોલોજી અને બીબીએની ડિગ્રી એકસાથે મેળવી શકશો. 

આ પણ વાંચો: Career Option / તમને પણ ગેમ રમવી ગમતી હોય, તો આ ક્ષેત્રમાં બનાવી શકો છો કરિયર

12મી પછી ડ્યુઅલ ડીગ્રી

તમે બે અંડરગ્રેજ્યુએટ ડિગ્રી, ગ્રેજ્યુએટ અને માસ્ટર ડિગ્રી અને ડબલ ગ્રેજ્યુએટ/પ્રોફેશનલ ડિગ્રી પ્રોગ્રામ તરીકે ડ્યુઅલ ડિગ્રી મેળવી શકો છો. જે વિદ્યાર્થીઓ 12મી પછી ડ્યુઅલ ડિગ્રી કોર્સ માટે અરજી કરવા માગે છે તેમની પાસે અરજી કરવા માટે ઘણા વિકલ્પો છે. આવા વિદ્યાર્થીઓ B.Tech+MBA, BA+LLB, B.Tech+LLB, B.Tech+MS, BE+ME, B.Ed+M.Ed વગેરે જેવા અભ્યાસક્રમો પસંદ કરી શકે છે. પ્રવેશ માટેની પાત્રતાના માપદંડો અને એકસાથે બે ડિગ્રી પસંદ કરવાની ઉપલબ્ધતા સંબંધિત યુનિવર્સિટીઓ દ્વારા નક્કી કરવામાં આવે છે.

ડ્યુઅલ ડિગ્રીના ફાયદા

• ડ્યુઅલ ડિગ્રી પ્રોગ્રામ તમારા જ્ઞાન અને કુશળતાને વધારે છે.
• 12 પાસ ઉમેદવારો એકસાથે UG અને PG ડિગ્રી મેળવી શકે છે.
• આ માટે વિદ્યાર્થીઓએ માત્ર એક જ પ્રવેશ પ્રક્રિયામાંથી પસાર થવું પડે છે.
• આવો કોર્સ પસંદ કરવાથી તમારો સમય અને પૈસા બંને બચી શકે છે, કારણ કે તમે ચાર કે પાંચ વર્ષમાં બંને ડિગ્રી મેળવી શકો છો.
• આ કોર્સ નોકરીની સંભાવનાઓમાં વધારો કરે છે અને વિવિધ ક્ષેત્રોમાં કારકિર્દી માટે વધુ સારા વિકલ્પો પણ પ્રદાન કરે છે.

એક સાથે બે ડિગ્રી કેવી રીતે મેળવવી

એક ડિગ્રી ઓફલાઇન મોડમાં અને બીજી ઓપન એન્ડ ડિસ્ટન્સ લર્નિંગ (ODL) અથવા બંને ઓનલાઇન મોડમાં કરી શકાય છે. ધ્યાનમાં રાખો કે બંને વર્ગોનો સમય સમાન ન હોવો જોઈએ. તમે સમાન અથવા જુદી જુદી યુનિવર્સિટીઓમાં ડ્યુઅલ ડિગ્રી કોર્સ કરી શકો છો. કોર્સ સંબંધિત ડિપ્લોમા અથવા ડિગ્રી પ્રોગ્રામ્સને યુજીસી દ્વારા માન્યતા પ્રાપ્ત હોવી જોઈએ.