Career / 12મા ધોરણ બાદ છૂટી ગયો છે અભ્યાસ? તો આ 5 શોર્ટ ટર્મ કોર્સ કરીને બનવી શકો છો કારકિર્દી
છેલ્લું અપડેટ : 02 Mar 2026
શું તમે 3-4 વર્ષની કોલેજ થિયરી યાદ રાખવામાં, ફક્ત ડિગ્રી મેળવવા અને છતાં ખિસ્સા ખાલી રહેવાની જૂની રીતથી કંટાળી ગયા છો? આ ભાગદોડ ભરેલી દુનિયામાં, સમય અને પૈસા બંને કિંમતી છે. ખાસ કરીને એવા લોકો માટે જેઓ કોઈ કારણોસર લાંબા ગાળાનું શિક્ષણ ચાલુ નથી રાખી શક્યા. સ્કૂલ ડ્રોપઆઉટનું લેબલ લઈને ફરતા યુવાનો માટે 'સ્કિલ બેઝ્ડ ડિગ્રી' અને શોર્ટ ટર્મ કોર્સ વરદાન સમાન છે. હવે પુસ્તકિયા જ્ઞાનનો સમય નથી, પરંતુ સ્કિલ્સ શીખવાનો છે.
6 મહિનાનો ડિપ્લોમા પૂર્ણ કરનારા કેટલાક યુવાનો સામાન્ય ગ્રેજ્યુએટ કરતાં વધુ અને વહેલા કમાવવાનું શરૂ કરે છે. જો તમે 12મા ધોરણ પછી અભ્યાસ છોડી દીધો હોય અથવા છોડવો પડ્યો હોય, તો નિરાશ થવાની જરૂર નથી. વોકેશનલ કોર્સ અને સ્કિલ બેઝ્ડ ડિપ્લોમા એ ઝડપી માર્ગ છે જે ફક્ત 6 મહિનામાં સારીકારકિર્દી તરફ દોરી શકે છે. આ કોર્સ ઇન્ડસ્ટ્રીની માંગ પર કેન્દ્રિત છે. આ કોર્સ તમને તે કામ શીખવે છે જેના માટે કંપનીઓ તમને મોટો પગાર આપવા તૈયાર છે.
5 શોર્ટ ટર્મ કોર્સ
આજકાલ ઘણી સરકારી અને ખાનગી સંસ્થાઓ 3થી 6 મહિનાના કોર્સ ઓફર કરી રહી છે અને તેની માંગ આસમાને પહોંચી રહી છે.
ડિજિટલ માર્કેટિંગ ડિપ્લોમા: આજે દરેક નાની અને મોટી દુકાન અને કંપની ઓનલાઈન છે. આ 6 મહિનાનો કોર્સ સોશિયલ મીડિયા મેનેજમેન્ટ, SEO અને જાહેરાત શીખવે છે. જેમાં શરૂઆતનો પગાર 20,000-25,000 રૂપિયા જેટલો ઊંચો હોઈ શકે છે.
ગ્રાફિક ડિઝાઇનિંગ અને વીડિયો એડિટિંગ: યુટ્યુબ અને ઇન્સ્ટાગ્રામના યુગમાં કન્ટેન્ટ જ રાજા છે. જો તમે ફોટોશોપ અથવા પ્રીમિયર પ્રો જેવા સોફ્ટવેર શીખો છો, તો તમે ફ્રીલાન્સિંગ અથવા નોકરી દ્વારા તરત જ કમાણી શરૂ કરી શકો છો.
મોબાઈલ અને લેપટોપ રિપેરિંગ: આ એક એવરગ્રીન કોર્સ છે જે ક્યારેય મંદીનો ભોગ નથી બનતો. 3થી 6 મહિનાની ટ્રેનિંગ પછી તમે તમારું પોતાનું કેન્દ્ર પણ ખોલી શકો છો.
હોસ્પિટાલિટી અને ફ્રન્ટ ઓફિસ મેનેજમેન્ટ: હોટેલ અને સેવા ક્ષેત્રો હંમેશા સ્માર્ટ અને સ્કિલફુલ લોકોની શોધમાં હોય છે. 6 મહિનાનો ડિપ્લોમા તમને મોટી હોટલોમાં પ્રવેશ અપાવી શકે છે.
ડેટા એન્ટ્રી અને ટેલી: નાની કે મોટી દરેક ઓફિસમાં એકાઉન્ટ્સ સમજવું અને ઝડપી ટાઈપિંગ હજુ પણ જરૂરી છે. તમે આ કોર્સ કરીને પણ સારી કારકિર્દી બનાવી શકો છો.
ડ્રોપઆઉટ્સ માટે 'સ્કિલ બેઝ્ડ' માર્ગ શા માટે વધુ સારો છે?
પરંપરાગત ડિગ્રીઓમાં 90% થિયરી અને 10% પ્રેક્ટિકલ હોય છે, જ્યારે વોકેશનલ કોર્સ તેનાથી વિપરીત છે. અહીં, તમે પહેલા દિવસથી જ કામ કરવાનું શીખો છો. નેશનલ સ્કિલ ડેવલપમેન્ટ કોર્પોરેશન (NSDC) જેવા સરકારી પોર્ટલ આ કોર્સને માન્યતા આપે છે, જે સર્ટિફિકેટનું મૂલ્ય વધારે છે.
કમાણીની કોઈ મર્યાદા નથી
આ કોર્સનો સૌથી મોટો ફાયદો એ છે કે તમારે નોકરી પર આધાર રાખવાની જરૂર નથી. ગ્રાફિક ડિઝાઇનર અથવા ડિજિટલ માર્કેટર વિશ્વમાં ગમે ત્યાંથી પણ વિદેશી ગ્રાહકો માટે કામ કરી શકે છે અને ડોલરમાં કમાણી કરી શકે છે.
જો તમને ગેજેટ્સ ગમે છે તો ટેકનિકલ ક્ષેત્ર પસંદ કરો, જો તમને ક્રિએટિવિટી પસંદ હોય, તો ડિઝાઇનિંગ ક્ષેત્રમાં આગળ વધો. યાદ રાખો ડ્રોપઆઉટ એ અંત નથી, પરંતુ તે એક નવી અને સારી કારકિર્દીની શરૂઆત હોઈ શકે છે.
