JOB / રેલ્વેમાં એપ્રેન્ટિસની 1763ની જગ્યાઓ પર નીકળી ભરતી, જાણો કેવી રીતે કરવામાં આવશે પસંદગી
છેલ્લું અપડેટ : 03 Oct 2025
ઉત્તર મધ્ય રેલ્વેએ કુલ 1763 એપ્રેન્ટિસ પોસ્ટ્સ માટે બમ્પર ભરતીની જાહેરાત કરી છે, જે યુવાનો માટે રોજગાર અને ટ્રેનિંગ માટે સુવર્ણ તક પૂરી પાડે છે. રેલ્વે ભરતી સેલ, પ્રયાગરાજ દ્વારા જારી કરાયેલ નોટિફિકેશન હેઠળ, 10મું ધોરણ પાસ કરનારા અને સંબંધિત ટ્રેડમાં ITI સર્ટીફીકેટ ધરાવતા ઉમેદવારો આ જગ્યાઓ માટે ઓનલાઈન અરજી કરી શકશે. અરજી કરવાની છેલ્લી તારીખ 17 ઓક્ટોબર, 2025 નક્કી કરવામાં આવીછે.
આ જગ્યાઓ પર ભરતી થશે
ઉત્તર મધ્ય રેલ્વેના વિવિધ એકમોમાં ફિટર, વેલ્ડર, ઇલેક્ટ્રિશિયન, મિકેનિક, સુથાર અને પેઇન્ટર જેવા મુખ્ય ટ્રેડમાં આ એપ્રેન્ટિસશિપ ઉપલબ્ધ છે. આ ટ્રેનિંગ કાર્યક્રમ યુવાનોને રેલ્વેના ટેકનિકલ અને ઓપરેશનલ પાસાઓથી પરિચિત કરાવશે, જે તેમને વ્યવહારુ અનુભવ અને કૌશલ્ય વિકાસ પ્રદાન કરશે.
શૈક્ષણિક લાયકાત અને વય મર્યાદા
અરજી કરનારા ઉમેદવારોએ માન્ય બોર્ડમાંથી ઓછામાં ઓછા 50% માર્ક્સ સાથે 10મું ધોરણ પાસ કરેલું હોવું જોઈએ. તેમની પાસે રાષ્ટ્રીય વ્યાવસાયિક તાલીમ પરિષદ (NCVT) દ્વારા માન્યતા પ્રાપ્ત સંસ્થામાંથી સંબંધિત ટ્રેડમાં ITI સર્ટીફીકેટ પણ હોવું જોઈએ. 18 સપ્ટેમ્બર, 2025 સુધીમાં વય મર્યાદા 15થી 24 વર્ષની વચ્ચે હોવી જોઈએ. સરકારી નિયમો અનુસાર SC, ST, OBC અને દિવ્યાંગ ઉમેદવારોને ઉપલી વય મર્યાદામાં છૂટછાટ આપવામાં આવશે.
પસંદગી પ્રક્રિયા
આ ભરતી માટે ઉમેદવારોની પસંદગી ફક્ત તેમની શૈક્ષણિક લાયકાતના આધારે કરવામાં આવશે. 10મા ધોરણ અને ITIમાં મેળવેલા મામાર્ક્સના એવરેજના આધારે મેરિટ લિસ્ટ તૈયાર કરવામાં આવશે. પસંદગી પ્રક્રિયામાં સંપૂર્ણ પારદર્શિતા સુનિશ્ચિત કરવા માટે કોઈ લેખિત પરીક્ષા કે વ્યક્તિગત ઇન્ટરવ્યુ નહીં લેવામાં આવે. મેરિટ લિસ્ટમાં પસંદ કરાયેલા ઉમેદવારોને નિર્ધારિત ડોક્યુમેન્ટ વેરિફિકેશન અને રેલ્વે દ્વારા નિર્ધારિત તબીબી ધોરણો અનુસાર મેડિકલ ફિટનેસ ટેસ્ટમાંથી પસાર થવું પડશે.
અરજી ફી અને પ્રક્રિયા
જનરલ અને OBCના ઉમેદવારોએ અરજી ફી તરીકે 100 રૂપિયા ચૂકવવા પડશે. જોકે, SC, ST, દિવ્યાંગ વ્યક્તિઓ અને બધી કેટેગરીના મહિલા ઉમેદવારોને અરજી ફીમાંથી સંપૂર્ણપણે મુક્તિ આપવામાં આવી છે.
RRC પ્રયાગરાજ વેબસાઈટ પર ઓનલાઈન અરજી કરો
રસ ધરાવતા ઉમેદવારો રેલ્વે ભરતી સેલ (RRC) પ્રયાગરાજની સત્તાવાર વેબસાઈટ www.rrcpryj.org ની મુલાકાત લઈને ઓનલાઈન અરજી કરી શકે છે. ઉમેદવારોને સલાહ આપવામાં આવે છે કે તેઓ અરજી કરતા પહેલા નોટિફિકેશન કાળજીપૂર્વક વાંચે અને બધા જરૂરી ડોક્યુમેન્ટ (જેમ કે 10મા ધોરણની માર્કશીટ, ITI સર્ટીફીકેટ, જાતિ પ્રમાણપત્ર, પાસપોર્ટ-સાઈઝ ફોટો અને સહી) તૈયાર રાખે.
ટ્રેનિંગ દરમિયાન સ્ટાઈપેન્ડ પણ આપવામાં આવશે
આ એપ્રેન્ટિસશિપ યુવાનોને રેલ્વેમાં જોડાવાનો માર્ગ તો મોકળો કરશે જ, પરંતુ ભવિષ્યમાં સરકારી નોકરીઓ માટે પણ તૈયાર કરશે. ટ્રેનિંગ સમયગાળા દરમિયાન નિયમો અનુસાર સ્ટાઈપેન્ડ પણ આપવામાં આવશે.
