રોકાણકારો માટે 1 વર્ષ, 3 વર્ષ કે 5 વર્ષમાંથી કયો વિકલ્પ છે બેસ્ટ? FD કરાવતા પહેલાં જાણી લો કઈ બેંક આપી રહી છે તગડું વ્યાજ
છેલ્લું અપડેટ : 21 Jun 2026
ભારતમાં સુરક્ષિત રિટર્ન અને નાણાંની સુરક્ષા ઈચ્છતા પરંપરાગત રોકાણકારો માટે ફિક્સ્ડ ડિપોઝિટ (FD) આજે પણ સૌથી પસંદગીના રોકાણ વિકલ્પોમાંથી એક છે. જો કે, અલગ-અલગ બેંકોના વ્યાજ દરો અને સમયગાળાને જોતા અવારનવાર રોકાણકારોના મનમાં એક મોટો પ્રશ્ન ઊભો થાય છે કે તેમને ૧ વર્ષ, ૩ વર્ષ કે ૫ વર્ષ, આખરે કઈ FD પસંદ કરવી જોઈએ? આનો સાચો જવાબ માત્ર વ્યાજ દરો પર જ નહીં, પરંતુ તમારી નાણાકીય જરૂરિયાત, ટેક્સની બચત અને ભવિષ્યમાં વ્યાજ દરોના ઉતાર-ચઢાવની આશંકાઓ પર પણ નિર્ભર કરે છે.
1 વર્ષની એફડી
૧ વર્ષની ફિક્સ્ડ ડિપોઝિટ એવા રોકાણકારો માટે સૌથી શ્રેષ્ઠ છે જેઓ પોતાના નાણાંને લાંબા સમય સુધી બ્લોક કરવા નથી માંગતા અને વ્યાજ દરો બદલાવા પર ફરીથી રોકાણ કરવાની આઝાદી ઈચ્છે છે.
અત્યારે સ્મોલ ફાઇનાન્સ બેંકોમાં સૂર્યોદય સ્મોલ ફાઇનાન્સ બેંક અને ઉજ્જીવન સ્મોલ ફાઇનાન્સ બેંક ૧ વર્ષના સમયગાળા પર ૭.૨૫% અને ઇક્વિટાસ સ્મોલ ફાઇનાન્સ બેંક ૭.૧૦% નો વ્યાજ દર આપી રહી છે.
જ્યારે પ્રાઇવેટ બેંકોમાં યસ બેંક ૬.૬૫%, આઇસીઆઇસીઆઇ (ICICI) બેંક અને એચડીએફસી (HDFC) બેંક ૬.2૫% વ્યાજ ઓફર કરી રહી છે.
સરકારી બેંકોમાં સ્ટેટ બેંક ઓફ ઇન્ડિયા (SBI) ૬.૨૫% અને બેંક ઓફ ઇન્ડિયા ૬.૫૦% વ્યાજ દર આપી રહી છે.
3 વર્ષની એફડી
ત્રણ વર્ષ માટે એફડી કરાવવી એવા લોકો માટે બેસ્ટ છે જેઓ ખૂબ લાંબા સમયનું જોખમ લીધા વિના ઉત્તમ રિટર્ન કમાવવા માંગે છે. ઘણી બેંકો આ સમયગાળા માટે આકર્ષક વ્યાજ દર ઓફર કરી રહી છે.
સ્મોલ ફાઇનાન્સ બેંકોમાં જન સ્મોલ ફાઇનાન્સ બેંક, ઉત્કર્ષ સ્મોલ ફાઇનાન્સ બેંક અને શિવાલિક સ્મોલ ફાઇનાન્સ બેંક ૩ વર્ષની એફડી પર ૭.૫૦% નું તગડું વ્યાજ આપી રહી છે.
પ્રાઇવેટ બેંકોમાં HDFC અને ICICI બેંક ૬.૪૫% નો વ્યાજ દર આપી રહી છે. આઇડીએફસી ફર્સ્ટ બેંક (IDFC First Bank) ૭.૩૫% નો દર ઓફર કરી રહી છે.
સરકારી બેંકોમાં એસબીઆઈ ૬.૩૦% નો વ્યાજ દર આપી રહી છે. જ્યારે પોસ્ટ ઓફિસમાં વ્યાજ દર ૭.૧૦% છે.
5 વર્ષની એફડી
પાંચ વર્ષની એફડી એવા રોકાણકારો માટે સૌથી સચોટ છે જેમની નાણાકીય યોજનાઓ લાંબા ગાળાની છે અથવા જેઓ ઇન્કમ ટેક્સની કલમ 80C હેઠળ ટેક્સ મુક્તિનો દાવો કરવા માંગે છે. ૫ વર્ષની એફડીમાં રોકાણ કરીને તમે વાર્ષિક ૧.૫ લાખ રૂપિયા સુધીના ટેક્સ ડિડક્શન (કપાત) નો દાવો કરી શકો છો.
કેટલીક સ્મોલ ફાઇનાન્સ બેંકો ૫ વર્ષના સમયગાળા પર પોતાનો સૌથી બેસ્ટ વ્યાજ દર આપી રહી છે. સૂર્યોદય સ્મોલ ફાઇનાન્સ બેંક ૭.૯૦%, જન સ્મોલ ફાઇનાન્સ બેંક ૭.૭૭% અને ડીસીબી (DCB) બેંક ૭.૫૦% વ્યાજ આપી રહી છે.
મોટી પ્રાઇવેટ બેંકો જેવી કે આઇસીઆઇસીઆઇ બેંક ૬.૫૦% અને એચડીએફસી બેંક ૬.૪૦% નો વ્યાજ દર આપી રહી છે.
સરકારી બેંકોના વ્યાજ દર ઓછા છે. ૫ વર્ષની એફડી પર એસબીઆઈ ૬.૦૫%, બેંક ઓફ ઇન્ડિયા ૬% અને પંજાબ નેશનલ બેંક (PNB) ૫.૯૫% નો વ્યાજ દર આપી રહી છે.
સિનિયર સિટીઝન માટે વધુ દર
ઉપર જણાવેલા વ્યાજ દરો સામાન્ય નાગરિકો માટે છે. તમામ બેંકો સિનિયર અને સુપર સિનિયર સિટીઝનને વધુ વ્યાજ દર ઓફર કરે છે. ૧ વર્ષની એફડી એવા લોકો માટે વધુ સારી છે જેમને નાણાંની વહેલી જરૂર પડી શકે છે. ૩ વર્ષની એફડી તેમના માટે યોગ્ય છે જેઓ લાંબી રાહ જોયા વિના શાનદાર વ્યાજ કમાવવા માંગે છે. જ્યારે ૫ વર્ષની એફડી એમના માટે શ્રેષ્ઠ છે જેઓ ભવિષ્ય માટે સુરક્ષિત રિટર્ન અને ટેક્સની બચત મેળવવા માંગે છે.
