ભાગેડુ વિજય માલ્યાની મુશ્કેલીઓમાં થયો વધારો, સેબીની કરી મોટી કાર્યવાહી

ભારતીય બેંકોના હજારો કરોડ રૂપિયા લઈને વિદેશ ફરાર થઈ ગયેલા ભાગેડુ વિજય માલ્યા સામે સેબીએ મોટી કાર્યવાહી કરી છે. માર્કેટ રેગ્યુલેટર સિક્યોરિટીઝ એક્સચેન્જ બોર્ડ ઓફ ઈન્ડિયા (સેબી) એ કિંગફિશરના માલિક વિજય માલ્યા વિરુદ્ધ કડક કાર્યવાહી કરી છે અને તેના પર 3 વર્ષ માટે બજારમાં કોઈપણ પ્રકારના વ્યવહાર પર પ્રતિબંધ મૂક્યો છે.

માલ્યા સામે સેબીની કાર્યવાહી

સેબીએ વિજય માલ્યા પર ત્રણ વર્ષનો પ્રતિબંધ મૂક્યો છે. સેબીએ કહ્યું કે, વિજય માલ્યાના સિક્યોરિટી માર્કેટમાં પ્રવેશ પર પ્રતિબંધ છે. સેબીએ માલ્યા પર પ્રત્યક્ષ કે આડકતરી રીતે સિક્યોરિટીઝની ખરીદી, વેચાણ અથવા સિક્યોરિટીઝ માર્કેટ સાથે કોઈપણ પ્રકારની લેવડદેવડ કરવા પર પ્રતિબંધ મૂક્યો છે.

ભાગેડુ વિજય માલ્યા પર 26 જુલાઈ, 2024ના રોજ જારી કરાયેલા તેના આદેશમાં સેબીએ જણાવ્યું હતું કે, વિજય માલ્યા ભારતીય બજારમાં સૂચિબદ્ધ કોઈપણ કંપનીમાં પ્રત્યક્ષ કે પરોક્ષ રીતે કોઈ રોકાણ કરી શકશે નહીં. તેની સાથે કોઈપણ રીતે જોડાઈ શકશે નહીં. આ સમયગાળા દરમિયાન, તેની સિક્યોરિટીઝ હોલ્ડિંગ ફ્રીઝ કરવાનો નિર્ણય લેવામાં આવ્યો છે.

વાસ્તવમાં, સેબીને તેની તપાસમાં જાણવા મળ્યું કે, વિજય માલ્યા એફઆઈઆઈ નિયમનના માળખાનું ઉલ્લંઘન કરીને તેના પોતાના જૂથની લિસ્ટેડ કંપનીઓમાં છેતરપિંડી કરી રહ્યો હતો. વિજય માલ્યાનું આ પગલું રોકાણકારોને ચોંકાવી શકે છે. સેબીની તપાસમાં માલ્યાએ હર્બર્ટસન અને યુનાઈટેડ સ્પિરિટ્સ લિમિટેડના શેરમાં વેપાર કરવાનો રસ્તો શોધી કાઢ્યો હતો. તેને રોકવા માટે સેબીએ તેના પર ત્રણ વર્ષ માટે પ્રતિબંધ મૂક્યો છે.