Stock Market: સેન્સેક્સ 715 પોઇન્ટ તૂટ્યો: નિફ્ટી 24,000ની નીચે બંધ; રિયલ્ટી અને પીએસયુ બેંક શેરોમાં ભારે દબાણ
છેલ્લું અપડેટ : 22 Jul 2026
બુધવાર, 22 જુલાઈની સવારે જ્યારે શેરબજાર ખૂલ્યું, ત્યારે રોકાણકારોની નજર નિફ્ટીના 24,000ના આંકડા પર હતી. આ માત્ર એક નંબર ન હતો. બજાર માટે આ ભરોસાની એક દીવાલ જેવું હતું. આખો દિવસ ક્યારેક ખરીદદારો આ દીવાલને સંભાળવાનો પ્રયાસ કરતા રહ્યા, તો ક્યારેક વેચનારાઓએ જોર લગાવ્યું. કેટલાક શેરોમાં સારા પરિણામો (ક્વાર્ટરલી રિઝલ્ટ્સ) ને કારણે ખરીદારી પણ જોવા મળી. પરંતુ આઈટી કંપનીઓ, રિલાયન્સ ઇન્ડસ્ટ્રીઝ અને એચડીએફસી બેન્ક જેવા મોટા શેરોની નબળાઈ બજાર પર ભારે પડી ગઈ.
સ્થાનિક શેરબજારમાં ઘટાડાનો સિલસિલો સતત ત્રીજા ટ્રેડિંગ સેશનમાં (કારોબારી સત્રમાં) પણ ચાલુ રહ્યો. પશ્ચિમ એશિયામાં વધતા તણાવને કારણે ક્રૂડ ઓઇલની કિંમતોમાં તેજી આવવાથી રોકાણકારોની ચિંતા વધી અને તેની અસર બજારના સેન્ટિમેન્ટ પર સ્પષ્ટપણે જોવા મળી. રિયલ્ટી અને પીએસયુ બેન્કિંગ શેરોમાં ભારે વેચવાલીના કારણે પ્રમુખ ઇન્ડેક્સ દબાણ હેઠળ રહ્યા.
દિવસ પૂરો થયો ત્યારે 24,000ની આ દીવાલ તૂટી ચૂકી હતી. નિફ્ટી 191 પોઇન્ટ ઘટીને 23,996 પર બંધ થયો. સેન્સેક્સ 715 પોઇન્ટ ગગડીને 76,755 પર આવી ગયો. ઘટાડો માત્ર કેટલાક મોટા શેરો પૂરતો મર્યાદિત ન હતો. નિફ્ટીના આશરે 40 શેરો લાલ નિશાનમાં (ઘટાડા સાથે) બંધ થયા. કેટલાક શેરોમાં 4 ટકા સુધીનો ઘટાડો આવ્યો. બેન્ક નિફ્ટી 709 પોઇન્ટ તૂટીને 57,127 પર બંધ થયો. મિડકેપ ઇન્ડેક્સ પણ 687 પોઇન્ટ ઘટીને 62,301 પર આવી ગયો. એટલે કે નુકસાન માત્ર મોટી કંપનીઓના શેર ખરીદનારાઓને જ નથી થયું. બેન્ક અને મિડકેપ શેરોમાં નાણાં રોકનારા રોકાણકારો પણ આ વેચવાલીથી બચી શક્યા નથી.
એક સમાચારે બજારનું સેન્ટિમેન્ટ ખરડી નાંખ્યું
અમેરિકા અને ઈરાન વચ્ચે તણાવ ઓછો થવાની આશાઓને મોટો ઝટકો લાગ્યો છે. અમેરિકી વિદેશ મંત્રી માર્કો રુબિયોએ જણાવ્યું કે ઈરાન વાતચીતને લઈને ગંભીર દેખાઈ રહ્યું નથી. તેમના આ નિવેદન બાદ આંતરરાષ્ટ્રીય બજારમાં ક્રૂડ ઓઇલની કિંમતો ૫ ટકા ઉછળી ગઈ. તેલ બજારને આશા હતી કે અમેરિકા અને ઈરાન વચ્ચે વાતચીત આગળ વધવાથી તણાવ ઓછો થઈ શકે છે.
રુબિયોના નિવેદન બાદ આ આશા નબળી પડતી દેખાઈ. આ જ કારણે વેપારીઓએ તેલના પુરવઠા (સપ્લાય) પર સંકટ વધવાની આશંકા વ્યક્ત કરી અને કિંમતોમાં તેજી આવી ગઈ. બીજી તરફ ઈરાને સ્પષ્ટ કર્યું છે કે, આ સમયે અમેરિકા સાથે કોઈ વાતચીત ચાલી રહી નથી. જોકે, ઈરાને બંને દેશો વચ્ચે સંદેશાઓની આપ-લે થવાની સંભાવનાનો ઈનકાર કર્યો નથી. આનો અર્થ એ છે કે સીધી વાતચીત બંધ છે, પરંતુ પડદા પાછળ સંદેશા મોકલવાનો રસ્તો સંપૂર્ણપણે બંધ થયો નથી.
આ સેક્ટર્સમાં સૌથી વધુ દબાણ
સેક્ટોરલ ઇન્ડેક્સની વાત કરીએ તો નિફ્ટી પીએસયુ બેન્ક અને નિફ્ટી રિયલ્ટીમાં સૌથી વધુ ઘટાડો નોંધાયો હતો. આ બંને સેક્ટર્સમાં વેચવાલીનું દબાણ આખો દિવસ બનેલું રહ્યું, જેના કારણે બજારની નબળાઈ વધુ વધી ગઈ.
એફએમસીજી અને ઓટો શેરોમાં મજબૂતી જોવા મળી
જ્યાં મોટાભાગના સેક્ટર્સ દબાણ હેઠળ રહ્યા, ત્યાં બીજી તરફ નિફ્ટી એફએમસીજી અને નિફ્ટી ઓટોએ અપેક્ષાકૃત સારું પ્રદર્શન કર્યું. આ સેક્ટર્સમાં ખરીદારી જોવા મળી, જેના લીધે બજારનો ઘટાડો અમુક અંશે મર્યાદિત રહ્યો.
બુધવારે આઈટી, રિલાયન્સ અને એચડીએફસી બેન્ક જેવા હેવીવેઇટ શેરોમાં નબળાઈને કારણે શેરબજારમાં રિકવરી અટકી હતી, જેણે ઓટો અને એફએમસીજી ક્ષેત્રની ખરીદીની અસરને નિષ્ફળ બનાવી દીધી.
સેન્સેક્સ અને નિફ્ટીમાં દિગ્ગજ શેરોના દબાણને પગલે બજાર સંભાળાઈ શક્યું નહીં
મોંઘા ક્રૂડ ઓઇલ અને એરલાઇન ક્ષેત્રની આકરી હરીફાઈના કારણે ઇન્ડિગો નિફ્ટીનો ટોપ લૂઝર બન્યો. હતો. ઇન્ડીગો કંપની વધેલા ખર્ચને પહોંચી વળવા માટે ટિકિટના ભાવ વધારી શકે છે. પરંતુ જો બજારમાં હરીફાઈ (કોમ્પિટિશન) વધારે હોય, તો મુસાફરો પર આખો બોજ નાખવો સરળ હોતો નથી. આ જ કારણ છે કે ક્રૂડ ઓઇલની તેજી અને વધતી હરીફાઈની ચિંતાએ ઇન્ડિગોના રોકાણકારોને પરેશાન કર્યા અને તેથી શેરના ભાવ ગગડી ગયા.
ટ્રમ્પના ટેરિફ વાળા નિવેદનથી ફાર્મા શેરોમાં ગભરાટ
ભારતીય ફાર્મા કંપનીઓ માટે બુધવારનો દિવસ મુશ્કેલ રહ્યો. અમેરિકી રાષ્ટ્રપતિ ડોનાલ્ડ ટ્રમ્પે જેનરિક દવાઓ પર ભવિષ્યમાં ભારે ટેરિફ (આયાત ડ્યુટી) લગાવવાની સમયમર્યાદા જણાવી છે. આ નિવેદન બાદ ભારતીય દવા કંપનીઓના અમેરિકી બિઝનેસને લઈને ચિંતા વધી ગઈ છે.
ભારતીય ફાર્મા કંપનીઓને બે વર્ષ સુધી રાહત મળી શકે છે. ત્યારપછી અમેરિકાએ 1 ઓગસ્ટ 2028થી જેનરિક દવાઓ પર 100 ટકા અને 1 ઓગસ્ટ 2029થી 200 ટકા ટેરિફ લગાવવાની યોજના જણાવી. આ જ ચિંતાને કારણે લ્યુપિન અને ઓરોબિંદો ફાર્મા બજારના મોટા લૂઝર્સમાં (સૌથી વધુ ઘટતા શેરોમાં) સામેલ રહ્યા.
બજારને ડર છે કે ભવિષ્યમાં ભારે ટેરિફ લાગશે તો ભારતથી અમેરિકા દવા મોકલવી મોંઘી થઈ શકે છે. કંપનીઓએ અમેરિકામાં ઉત્પાદન ક્ષમતા (મેન્યુફેક્ચરિંગ પ્લાન્ટ) ઊભી કરવી પડી શકે છે અથવા વધેલા ખર્ચનો કેટલોક હિસ્સો પોતે જ ભોગવવો પડી શકે છે.
ટેરિફ અત્યારે તરત જ લાગુ થઈ રહ્યો નથી. તેમ છતાં, શેરબજાર ભવિષ્યના જોખમને પહેલાથી જ ભાવમાં ગણતરીમાં લેવાનો (ડિસ્કાઉન્ટ કરવાનો) પ્રયાસ કરે છે. આ જ કારણ છે કે બુધવારે ફાર્મા શેરો પર દબાણ જોવા મળ્યું હતું.
અદાણી ગ્રીન અને અદાણી પાવર પર પરિણામોનું દબાણ
અદાણી ગ્રીન એનર્જી અને અદાણી પાવરના શેરોએ પોતાના ત્રિમાસિક પરિણામો પર નકારાત્મક પ્રતિક્રિયા આપી. બંને શેરોમાં આશરે 2 થી 3.5 ટકા સુધીનો ઘટાડો જોવા મળ્યો. કંપનીના પરિણામો આવ્યા પછી બજાર માત્ર નફો જ નથી જોતું. રોકાણકારો એ પણ જુએ છે કે આવકની વૃદ્ધિ કેવી રહી, માર્જિન પર શું અસર પડી અને આગળના બિઝનેસને લઈને મેનેજમેન્ટની શું અપેક્ષાઓ છે. બુધવારે બંને શેરોમાં આવેલો ઘટાડો દર્શાવે છે કે બજારને પરિણામોમાં એ વાત ન મળી, જેની અગાઉથી આશા રાખવામાં આવી રહી હતી.
ઘટતા બજારમાં ટીવીએસ મોટર અને બજાજ ઓટો ચમક્યા
બજારના આ મોટા ઘટાડા વચ્ચે ટીવીએસ મોટર અને બજાજ ઓટોએ રોકાણકારોને રાહત આપી. બંને ઓટો શેરોમાં મજબૂત તેજી જોવા મળી. આનું કારણ કંપનીઓના પ્રથમ ત્રિમાસિક ગાળાના (Q1) સારા પરિણામો અને મેનેજમેન્ટની હકારાત્મક ટિપ્પણી રહી. બજાજ ઓટોને સ્થાનિક ટુ-વ્હીલર માર્કેટ અને નિકાસ (એક્સપોર્ટ) તરફથી મજબૂત માંગ મળી રહી છે. કંપની આગામી મહિનાઓમાં નિકાસ વધારવાની તૈયારી કરી રહી છે.
ટીવીએસ મોટરનું પ્રદર્શન પણ ભારત અને વિદેશી બજાર બંને જગ્યાએ મજબૂત રહ્યું. બહેતર કમાણી અને આગળના સારા અંદાજોએ બંને શેરોમાં ખરીદારી વધારી. જ્યાં નિફ્ટીના આશરે 40 શેરો ઘટી રહ્યા હતા, ત્યાં બીજી તરફ ટીવીએસ મોટર અને બજાજ ઓટોએ બજારના પ્રવાહથી વિરૂદ્ધ જઈને તેજી દર્શાવી.
