લારીઓમાં વેચાતી લખોટીવાળી સોડાનું હવે અમેરિકા અને લંડનના મોલમાં થઇ રહ્યું છે ધૂમ વેચાણ

ઉનાળો શરૂ થતાં જ માર્કેટમાં વિવિધ પ્રકારના ઠંડા પીણાં કબજો જમાવી લે છે. જો કે એક સમય હતો જ્યારે ઠેર ઠેર લારીઓ પર લખોટીવાળી સોડા વેચાતી હતી. અને લોકો હોંશથી પીતા હતા. જો કે હવે નવા અને ફેન્સી પીણાં વચ્ચે આ આઇકોનિક લખોટી સોડા ભૂલતી જાય છે. એક સમયે તેનો સ્વાદ દરેકની જીભ પર હતો. ઉનાળામાં, કોઈપણ શેરી વિક્રેતા પાસેથી ઉપલબ્ધ સોડા ખરીદવું સામાન્ય હતું. ઘણા લોકોની આદત હતી કે તેઓ બોટલમાં લીંબુ નિચોવીને તેમાંથી પીતા હતા. હવે લખોટીવાળી સોડા ફરી એકવાર બજારમાં પ્રવેશી રહ્યું છે. આ વખતે તમને તે લારીઓ પર નહિ પરંતુ સુપરમાર્કેટમાં જોવા મળશે. નામ પણ બદલાઈ ગયું છે. હવે તે ગોલી પોપ સોડાના નામથી ઓળખાશે.  હવે તે માત્ર ભારતમાં જ નહીં પરંતુ આંતરરાષ્ટ્રીય બજારમાં પણ વેચાશે. વાણિજ્ય અને ઉદ્યોગ મંત્રાલય હેઠળ કાર્યરત કૃષિ અને પ્રોસેસ્ડ ફૂડ પ્રોડક્ટ્સ નિકાસ વિકાસ સત્તામંડળ (APEDA) ગોલી સોડાના વૈશ્વિકરણ પાછળ છે.

ગોલી પોપ સોડા ક્યાં વેચાશે?

ગોલી પોપ સોડાને ટ્રાયલ શિપમેન્ટ દ્વારા યુએસ, યુકે, યુરોપ અને ગલ્ફ દેશોમાં મોકલવામાં આવી છે. ખાસ કરીને ગલ્ફ દેશોમાં, ફેર એક્સપોર્ટ્સ ઇન્ડિયા નામની કંપની સાથે ભાગીદારી કરીને, તેણે લુલુ હાઇપરમાર્કેટ જેવી મોટી રિટેલ ચેઇનમાં સ્થાન મેળવ્યું છે. APEDA અનુસાર, આ પીણાને વિદેશમાં જબરદસ્ત પ્રતિસાદ મળી રહ્યો છે. તે યુકેમાં એક ટ્રેન્ડી પીણું બની ગયું છે.

લોન્ચ અને પ્રમોશન

ગોલી પોપ સોડા 4 ફેબ્રુઆરી, 2025 ના રોજ વિશ્વભરમાં સત્તાવાર રીતે લોન્ચ કરવામાં આવ્યું હતું.

નવું નામ પણ એ જ પેકેજિંગ

ગોલી સોડાનું નામ બદલાઈ ગયું છે પણ પેકેજિંગ હજુ પણ એ જ છે. ગોલી પોપ સોડાના પેકેજિંગમાં જૂનું પોપ ઓપનર જાળવી રાખવામાં આવ્યું છે. આ નાની નાની બાબતો તેને વિદેશમાં પણ લોકપ્રિય બનાવી રહી છે, કારણ કે તેમાં જૂની યાદો અને નવીનતાનો ઉત્તમ સમન્વય છે.

ભારતીય ખાણીપીણીનો વારસો

ગોલી પોપ સોડા વિશ્વભરમાં લોકપ્રિયતા મેળવી રહ્યું છે. તે ફક્ત ઉનાળામાં તરસ છીપાવવાનું સાધન જ નથી બની રહ્યું, પરંતુ તે વિશ્વને ભારતના ખાદ્ય વારસાનું પ્રદર્શન કરતી બ્રાન્ડ પણ બની રહી છે. આ એ પણ દર્શાવે છે કે ભારતીય સ્વાદો પણ બહુરાષ્ટ્રીય બ્રાન્ડ્સ સાથે સ્પર્ધા કરી શકે છે.