સરકારની નવી આવકવેરા સીસ્ટમથી SSY અને PPF જેવી નાની બચત યોજનાઓ સુસ્ત પડી

Small Saving Schemes : લગભગ 70 ટકા કરદાતાઓ નવી આવકવેરા સીસ્ટમ તરફ વળવાને કારણે, સરકારની નાની બચત યોજનાઓ હેઠળના સંગ્રહમાં ઘટાડો થયો છે. સરકારી સૂત્રએ જણાવ્યું હતું કે પબ્લિક પ્રોવિડન્ટ ફંડ (PPF) જેવી નાની બચત યોજનાઓમાં જમા રકમ અને ગ્રાહકોની સંખ્યામાં નોંધપાત્ર ઘટાડો થયો છે. તેમણે કહ્યું કે આનું મુખ્ય કારણ એ છે કે મોટાભાગના લોકો નવી ટેક્સ સિસ્ટમ તરફ આગળ વધી રહ્યા છે.

PPFમાં જમા કરવામાં આવેલી રકમમાં ઘટાડો થયો

RBIપાસે ઉપલબ્ધ નવા ડેટા અનુસાર, એપ્રિલ 2023 અને ફેબ્રુઆરી 2024 વચ્ચે PPFમાં જમા કરવામાં આવેલી રકમમાં ઘટાડો થયો છે. ઓક્ટોબર સિવાયના 11 મહિના દરમિયાન લગભગ તમામ મહિનામાં રસીદમાં ઘટાડો થયો છે. એપ્રિલ 2023, સપ્ટેમ્બર 2023 અને જાન્યુઆરી 2024માં સૌથી વધુ ઘટાડો નોંધાયો હતો. એપ્રિલ 2023માં 58.52 ટકા, સપ્ટેમ્બર 2023માં 45.06 ટકા અને જાન્યુઆરી 2024માં 42.06 ટકાનો ઘટાડો થયો હતો.

સુકન્યા સમૃદ્ધિ એકાઉન્ટ અને નેશનલ સેવિંગ્સ સર્ટિફિકેટમાં પણ ઘટાડો 

સૂત્રએ જણાવ્યું હતું કે સુકન્યા સમૃદ્ધિ એકાઉન્ટ અને નેશનલ સેવિંગ્સ સર્ટિફિકેટ જેવી યોજનાઓની રસીદમાં પણ ઘટાડો થવાના સંકેત દેખાઈ રહ્યા છે.
વરિષ્ઠ સલાહકારે જણાવ્યું , "મને લાગે છે કે આનું મુખ્ય કારણ એ જ હોઈ શકે છે જે બેંક ડિપોઝિટના કિસ્સામાં જોવા મળ્યું છે એટલે કે ફુગાવાને અનુરૂપ વળતરના વાસ્તવિક દરોમાં ઘટાડો.આ વલણને મ્યુચ્યુઅલ ફંડમાં રોકાણ કરનારા લોકોની સંખ્યામાં જબરદસ્ત વધારા સાથે જોવું જોઈએ. આ દર્શાવે છે કે અર્થતંત્રને વેગ આપવા માટે રોકાણકારોનો વિશ્વાસ વધ્યો છે."

સરકાર તેની રાજકોષીય ખાધને દૂર કરવા માટે રોકડ ઉપાડ, નાની બચત યોજનાઓ હેઠળ સંગ્રહ અને બોન્ડ માર્કેટ બોરોઇંગનો ઉપયોગ કરે છે.

40 કરોડથી વધુ ગ્રાહકોની સંખ્યા

નાની બચત યોજનાઓના ગ્રાહકોની સંખ્યા 40 કરોડથી વધુ છે. આ યોજનાઓમાં રોકાણ પર ગ્રાહકોને કર લાભ મળે છે. તેમાં નેશનલ સેવિંગ્સ સર્ટિફિકેટ (NSC), પબ્લિક પ્રોવિડન્ટ ફંડ (PPF), કિસાન વિકાસ પત્ર (KVP) અને સુકન્યા સમૃદ્ધિ એકાઉન્ટ જેવી 12 યોજનાઓનો સમાવેશ થાય છે. આ પૈકી સુકન્યા સમૃદ્ધિ, PPF અને NSC પર પણ ટેક્સ છૂટ મળે છે.

બેંક ઓફ બરોડાના મુખ્ય અર્થશાસ્ત્રી મદન સબનવીસે કહ્યું, "આ સ્વાભાવિક છે, પરંતુ તે સરકારની તરફેણમાં કામ કરશે. NSSF કરતાં આજે બજારમાંથી ઉધાર લેવું સસ્તું છે કારણ કે આ ફંડમાંથી કોઈપણ ઉપાડ સરેરાશ ખર્ચ કરતાં 50 બેસિસ પોઈન્ટ્સ વધુ ખર્ચ કરશે. તેથી, તે દરેકને નવી ટેક્સ સિસ્ટમ તરફ આગળ વધવા માટે પ્રેરિત કરે છે.

જ્યાં સુધી નાણાકીય વર્ષ 2025 માટેના અંદાજપત્રનો સંબંધ છે ત્યાં સુધી, રાષ્ટ્રીય નાની બચત રસીદોનો અંદાજ જુલાઈના સંપૂર્ણ બજેટમાં રૂ.50,000 કરોડનો ઘટાડો કરીને રૂ.14.2 લાખ કરોડ કરવામાં આવ્યો હતો, જે વચગાળાના બજેટમાં રૂ.14.77 લાખ કરોડ હતો.

નાની બચત યોજનાઓના વ્યાજ દરોમાં કોઈ ફેરફાર નહીં

PPF માટે બજેટ અંદાજમાં પણ થોડો સુધારો કરવામાં આવ્યો છે. સંપૂર્ણ બજેટમાં પીપીએફની આવકનો અંદાજ નજીવો ઘટીને રૂ. 1.77 લાખ કરોડ થયો હતો જ્યારે વચગાળાના બજેટમાં આ આંકડો રૂ. 1.79 લાખ કરોડ હતો.

સરકારે જાહેરાત કરી છે કે તે જુલાઈથી સપ્ટેમ્બર 2024 દરમિયાન નાની બચત યોજનાઓના વ્યાજ દરોમાં કોઈ ફેરફાર કરશે નહીં. સરકારના આ નિર્ણયનો સ્પષ્ટ અર્થ એ છે કે વર્તમાન ક્વાર્ટર દરમિયાન પણ વર્તમાન દરો યથાવત રહેશે.

નાણા મંત્રાલયે 28 જૂનના રોજ જારી કરેલા એક નિવેદનમાં જણાવ્યું હતું કે, વિવિધ નાની બચત યોજનાઓ પરના વ્યાજ દર નાણાકીય વર્ષ 2024-25ના બીજા ત્રિમાસિક ગાળા માટે યથાવત રહેશે.