Sensex today: શેરબજાર મજબૂતી સાથે બંધ, સેન્સેક્સ 418 પોઈન્ટ વધ્યો; નિફ્ટી 24722 પર બંધ થયો
છેલ્લું અપડેટ : 04 Aug 2025
Sensex today: વૈશ્વિક બજારોમાંથી સપાટ સંકેતો છતાં ભારતીય શેરબજારો ચોથી ઓગસ્ટે સપ્તાહના પ્રથમ કારોબારી સત્રમાં સુધારા સાથે બંધ રહ્યા હતાં. મેટલ અને ઓટો શેરોમાં ખરીદીથી બજારને ટેકો મળ્યો. ભારતીય માલ પર સંભવિત યુએસ ટેરિફની ચિંતાઓ કરતાં યુએસ વ્યાજ દરમાં ઘટાડાની અપેક્ષાઓ વધુ હતી.
આજે 30 શેરોવાળો બીએસઈ સેન્સેક્સ 80,765 પોઈન્ટ પર મજબૂતીથી ખુલ્યો. ખુલ્યા પછી તરત જ ઈન્ડેક્સમાં વધઘટ જોવા મળી. અંતે, તે 418.81 પોઈન્ટ અથવા 0.52 ટકાના વધારા સાથે 81,018.72 પર બંધ થયો.
એ જ રીતે, નેશનલ સ્ટોક એક્સચેન્જનો નિફ્ટી-50 પણ મજબૂત રીતે ખુલ્યો. ટ્રેડિંગ દરમિયાન, તે 24,554 પોઈન્ટના નીચા સ્તરે અને 24,736 પોઈન્ટના ઉચ્ચ સ્તરે પહોંચ્યો. અંતે, તે 157.40 પોઈન્ટ અથવા 0.64 ટકાના વધારા સાથે 24,722 પર બંધ થયો.
બેન્ચમાર્ક ઇન્ડેક્સની સાથે, મિડ અને સ્મોલ કેપ સેગમેન્ટ્સે પણ સારું પ્રદર્શન કર્યું. બીએસઈ મિડકેપ ઇન્ડેક્સ 1.11 ટકા વધ્યો, જ્યારે સ્મોલકેપ ઇન્ડેક્સ 0.76 ટકા વધ્યો.
આ સમયગાળા દરમિયાન, BSE પર લિસ્ટેડ કંપનીઓનું માર્કેટ કેપ પાછલા સત્રમાં રૂ. 444.5 લાખ કરોડથી વધીને લગભગ રૂ. 449 લાખ કરોડ થયું. આના પરિણામે રોકાણકારોએ એક જ દિવસમાં લગભગ રૂ. 4.5 લાખ કરોડનો નફો મેળવ્યો.
ટોપ ગેનર્સ અને લૂઝર્સ
બીએસઈની કંપનીઓમાં ટાટા સ્ટીલ, ભારત ઇલેક્ટ્રોલિક્સ, અદાણી પોર્ટ્સ, ટેક મહીન્દ્રા, ટીસીએસ, ભારતી, એરટેલ, એચસીએલ ટેક્, ટ્રેન્ટ, મહીન્દ્રા એન્ડ મહીન્દ્રા અને રિલાયન્સ ઇન્ડસ્ટ્રીઝના શેર વધીને બંધ રહ્યા હતાં. બીજી તરફ પાવર ગ્રીડ, એચડીએફસી બેન્ક, આઇસીઆઇસીઆઈ બેન્ક અને હિન્દુસ્તાન યુનિલિવરના શેરમાં મોટો ઘટાડો જોવા મળ્યો હતો.
નિફટી-50ના ટોપ ગેનર્સની વાત કરવામાં આવે તો એમાં સોથી ટોચ પર પાંચ ટકાના વધારા સાથે હીરો મોટો કોર્પનો શેર રહ્યો હતો. આ પછી, ટાટા સ્ટીલમાં 4.29 ટકા, ભારત ઈલેક્ટ્રોનિક્સમાં 3.28 ટકા, અદાણી પોર્ટ્સમાં 3.11 ટકા, JSW સ્ટીલમાં 2.74 ટકાનો વધારો જોવા મળ્યો.
નિફ્ટી-50ના ટોપ લૂઝર્સની વાત કરવામાં આવે તો તેમાં સૌથી વધારે નુકસાન પાવર ગ્રીડના શેરને થયું અને તે 1.14 ટકાનો ઘટાડા સાથે બંધ રહ્યો હતો. આ પછી એચડીએફસી બેન્ક 1.01 ટકા, ઓએનજીસી, 0.83 ટકા, એપોલો હોસેપિટલ 0.6 ટકા, આઇસીઆઇસીઆઇ બેન્ક 0.58 ટકા ઘટ્યા.
મુખ્ય ઈન્ડેક્સ બેન્ચમાર્ક ઈન્ડેક્સ કરતાં વધુ સારો દેખાવ કર્યો અને વધારા સાથે બંધ થયા. નિફ્ટી મિડકેપ 100 સૂચકાંક 1.40 ટકાના વધારા સાથે બંધ થયો જ્યારે સ્મોલકેપ સૂચકાંક 1.27 ટકાના વધારા સાથે બંધ થયો.
ક્ષેત્રીય મોરચે, નિફ્ટી એફએમસીજી (0.1 ટકા નીચે) સિવાય, બધા ક્ષેત્રો લીલા નિશાનમાં બંધ થયા. નિફ્ટી મેટલ 2.45 ટકાના વધારા સાથે સૌથી વધુ વધનાર રહ્યો, ત્યારબાદ આઇટી અને ઓટો 1.6 ટકાના વધારા સાથે બીજા ક્રમે રહ્યા.
વૈશ્વિક બજારોમાંથી શું સંકેતો મળી રહ્યા છે?
સોમવારે એશિયન બજારોમાં મિશ્ર વલણ જોવા મળ્યું કારણ કે રોકાણકારોએ નવા યુએસ ટેરિફ અને નોકરીઓના અહેવાલોનું મૂલ્યાંકન કર્યું હતું, જેના કારણે શુક્રવારે વોલ સ્ટ્રીટમાં ઘટાડો થયો હતો. યુએસ પ્રમુખ ડોનાલ્ડ ટ્રમ્પે ગયા અઠવાડિયે એક એક્ઝિક્યુટિવ ઓર્ડર પર હસ્તાક્ષર કર્યા હતા.
જાપાનનો નિક્કી ઇન્ડેક્સ 1.67 ટકા ઘટાડા સાથે કારોબાર કરી રહ્યો હતો. ચીનનો સીએસઆઇ 300 સ્થિર અને ઓસ્ટ્રેલિયાનો એએસએક્સ 200 પણ 0.28 ટકા નીચે હતો. બીજી તરફ, દક્ષિણ કોરિયાનો કોસ્પી 0.6 ટકા અને હોંગકોંગનો હેંગસેંગ 0.28 ટકા વધ્યો હતો. શુક્રવારે અમેરિકામાં વોલ સ્ટ્રીટ ઈન્ડેક્સ ઘટ્યો હતો. S&P 500 ઇન્ડેક્સ 1.6 ટકા, નાસ્ડેક 2.24 ટકા અને ડાઉ જોન્સ 1.23 ટકા ઘટીને બંધ થયો હતો.
નિફ્ટી આઉટલૂક વિશે નિષ્ણાતો શું કહે છે?
માસ્ટર ટ્રસ્ટ ગૃપના ડિરેક્ટર પુનિત સિંઘાનિયાએ જણાવ્યું હતું કે, "નિફ્ટી ગયા અઠવાડિયે લગભગ 1.00% ઘટીને 24,565.35 પર બંધ થયો હતો. તે 100-દિવસના ઈએમએ, 21-દિવસના અને 55-દિવસના ઈએમએ ની નીચે સરકી ગયો હતો. આ નબળા વલણની પુષ્ટિ કરે છે." ઈન્ડેક્સ સતત નીચા ઊંચા અને નીચલા નીચા પેટર્ન બનાવી રહ્યો છે. જ્યારે આરએસઆઇ અને એમએસીડી જેવા મોમેન્ટમ સૂચકાંકો પણ મંદીનો સંકેત આપી રહ્યા છે. આ ટૂંકા ગાળાની ટેકનિકલ નબળાઈ સ્પષ્ટ કરે છે.”
તેમણે કહ્યું, “જ્યાં સુધી નિફ્ટી 24,500ના સપોર્ટથી ઉપર રહેશે, ત્યાં સુધી હળવી રિકવરી શક્ય છે. પરંતુ વ્યાપક વલણ નબળું રહે છે. જ્યાં સુધી નિફ્ટી 24,750–24,800 ઝોન પાછો મેળવે નહીં, ત્યાં સુધી દરેક રેલી પર વેચાણ કરવાની વ્યૂહરચના અપનાવવાની સલાહ આપવામાં આવશે. જો નિફ્ટી 24,500થી નીચે સરકી જાય છે, તો ઘટાડો વધુ તીવ્ર બની શકે છે અને 24,100–24,000ના સ્તર સુધી પહોંચી શકે છે.