શેરબજારમાં સેન્સેક્સે બનાવ્યો ઐતિહાસિક રેકોર્ડ, નિફ્ટી પણ નવી ઊંચાઇ પર

ભારતીય શેર બજારમાં રોજ નવો રેકોર્ડ બની રહ્યો છે. ગુરૂવારે પણ શેર બજારે એક નવો રેકોર્ડ બનાવ્યો છે. BSE સેન્સેક્સ 86000 અને નિફ્ટી 26,300 અંકની નજીક પહોંચી ગયું છે. અઠવાડિયાના ચોથા દિવસે BSE સેન્સેક્સે 85,930.43 અંક અને નિફ્ટી 50એ 26,250.90 અંક પર પહોંચ્યું હતું.જોકે, દિવસના અંતે 666.25 અંકની તેજી સાથે BSE સેન્સેક્સ 85,836.12 અંક પર અને નિફ્ટી 50 211.90 અંકની લીડ સાથે 26,216.05 અંકના નવા રેકોર્ડ લેવલ પર બંધ થયું હતું.

શેરબજાર દરરોજ નવી ઉંચાઈઓને સ્પર્શી રહ્યું છે. આવી સ્થિતિમાં બજાર નિષ્ણાતો અને રોકાણકારો અસ્થિરતાના ભયનો સામનો કરી રહ્યા છે. શેરબજારમાં રોકાણકારો તેમના પૈસા ક્યાંય પણ રોકાણ કરતા પહેલા ઘણું વિચારતા હોય છે. વાસ્તવમાં જ્યારે માર્કેટ કેપિટલાઇઝેશન વધે છે, ત્યારે જોખમનું સ્તર પણ વધે છે.

આજના ટોપ ગેઇનર્સ અને લુઝર્સ સ્ટોક્સ

ગુરુવારે ઓટો સેક્ટરમાં આવેલી જોરદાર તેજીને કારણે મારુતિ સુઝુકીના શેરમાં 4.7 ટકાનો વધારો નોંધાયો છે, જે 13,384ના સ્તરે બંધ થયો છે. આ પછી, ટાટા મોટર્સનો શેર 3 ટકાથી વધુના ઉછાળા સાથે રૂ. 993.15ના સ્તરે બંધ થયો, જ્યારે મહિન્દ્રા એન્ડ મહિન્દ્રા 2.92%ના ઉછાળા સાથે રૂ. 3,181ના સ્તરે બંધ થયો.

તે જ સમયે, બજાજ ફિનસર્વ 2.82% વધીને 1,983 ના ભાવે બંધ થયો, જ્યારે ટાટા સ્ટીલ 2.45% ના ઉછાળા પછી 165.61 ના સ્તરે બંધ થયો. તે જ સમયે, એલએન્ડટી ના શેરમાં 0.84% ​​નો ઘટાડો નોંધવામાં આવ્યો છે, જે 3,762 ના સ્તર પર બંધ થયો હતો, જ્યારે એનટીપીસીના શેર 0.35% ઘટીને 434.60 ના સ્તરે બંધ થયા હતા.

ઓટો સેક્ટરમાં બમ્પર તેજી

આજના કામકાજમાં ઓટો સેક્ટર 2.26% ના જંગી ઉછાળા સાથે ટોચ પર હતું, 27,496 ના સ્તરે બંધ થયું હતું. તે જ સમયે, નિફ્ટી એફએમસીજી લગભગ એક ટકાના ઉછાળા સાથે 66,157ના સ્તરે બંધ રહ્યો હતો, જ્યારે બેન્ક નિફ્ટી 0.51%ના વધારા સાથે 54,375ના સ્તરે બંધ થયો હતો. આ પછી, નિફ્ટી IT 0.48% વધીને 42,161 ના સ્તર પર બંધ થયો. આજે નિફ્ટી આલ્ફા 50 સૌથી વધુ 0.71% ઘટીને 60,406 ના સ્તર પર બંધ થયો હતો.