રિલાયન્સ ફરીથી વેનેઝુએલાથી ક્રૂડ ઓઈલ આયાત કરશે, યુએસની મળી મંજૂરી

બ્લૂમબર્ગના અહેવાલ મુજબ, રિલાયન્સ ઇન્ડસ્ટ્રીઝ લિમિટેડને અમેરિકી પ્રતિબંધો છતાં વેનેઝુએલાથી ક્રૂડ ઓઇલની આયાત ફરી શરૂ કરવા માટે વ્હાઇટ હાઉસની મંજૂરી મળી છે. સૂત્રના જણાવ્યા અનુસાર, ભારતની સૌથી મોટી ખાનગી માલિકીની રિફાઈનર કંપની ટૂંક સમયમાં વેનેઝુએલા પાસેથી ક્રૂડ ઓઈલ ખરીદવાનું શરૂ કરવાની યોજના ધરાવે છે. 

ડેટા ઇન્ટેલિજન્સ ફર્મ કેપલરની માહિતી મુજબ ગયા વર્ષે પ્રતિબંધો હટાવ્યા પછી વેનેઝુએલાથી ભારતના ક્રૂડ ઓઇલની આયાતમાં રિલાયન્સનો હિસ્સો લગભગ 90% હતો. યુએસ ટ્રેઝરીએ ઔપચારિક રીતે ટિપ્પણી કરવાનો ઇનકાર કર્યો હતો.

પ્રમુખ નિકોલસ માદુરો અને વિપક્ષે મુક્ત અને નિષ્પક્ષ ચૂંટણીની બાંયધરી આપવા માટે કરાર પર હસ્તાક્ષર કર્યા પછી યુએસએએ ગયા વર્ષે દક્ષિણ અમેરિકન રાષ્ટ્રના સોના અને તેલ ક્ષેત્રો પરના પ્રતિબંધો હંગામી ધોરણે હટાવ્યા હતા. વેનેઝુએલા કરારનું સન્માન કરવામાં નિષ્ફળ ગયા પછી એપ્રિલમાં ફરીથી પ્રતિબંધો લાદવામાં આવ્યા હતા, અને તેલ કંપનીઓ ત્યાં વેપાર ચાલુ રાખવા માટે યુએસ ટ્રેઝરી વિભાગ પાસેથી પરમિટ માટે અરજી કરી રહી છે.

વેનેઝુએલાની ક્રૂડ ઓઈલની નિકાસ જૂનમાં વધીને 654,000 બેરલ પ્રતિ દિવસ થઈ છે, જે એપ્રિલ 2020 પછી સૌથી વધુ છે, કારણ કે યુએસએ પ્રતિબંધો છતાં દેશમાં ડ્રિલિંગ ચાલુ રાખવાનું વિશિષ્ટ લાઇસન્સ આપ્યું છે. રિલાયન્સ ઉપરાંત ઓએનજીસી વિદેશ લિમિટેડ, ભારતની સરકારી માલિકીની ઓઇલ એન્ડ નેચરલ ગેસ કોર્પોરેશનની વિદેશી રોકાણ શાખાએ પણ વેનેઝુએલામાંથી ક્રૂડ ઓઇલની આયાત કરવા મુક્તિ માટે અરજી કરી છે.