શેરબજારની રેકોર્ડ બ્રેક શરૂઆત, સેન્સેક્સનું ઓપનિંગ પહેલીવાર 83000ની પાર

શેરબજારમાં તેજીનો માહોલ બરકરાર રહેતા ઈતિહાસ રચાયો. BSE સેન્સેક્સ પ્રથમ વખત 83000ની પાર ખુલવામાં સફળ રહ્યો હતો.  સેન્સેક્સ 128 પોઈન્ટના વધારા સાથે 83,091ના રેકોર્ડ સ્તરે ખુલ્યો હતો. NSE નિફ્ટી પણ પ્રથમ વખત 41 પોઈન્ટના વધારા સાથે 25,430 પર ખુલ્યો હતો.

આજે સ્થાનિક શેરબજાર ફરી એક નવો ઈતિહાસ રચી શકે છે. સેન્સેક્સ-નિફ્ટી નવી ટોચે પહોંચવાની આશા છે. આજે સકારાત્મક વૈશ્વિક બજારના સંકેતો જોવા મળી રહ્યા છે. યુએસ ફેડરલ રિઝર્વ દ્વારા વ્યાજ દરમાં કાપની વધતી જતી અપેક્ષાઓ વચ્ચે એશિયન બજારો મિશ્ર હતા, જ્યારે યુએસ શેરબજારો રાતોરાત વધારા સાથે બંધ રહ્યા હતા.

તમને જણાવી દઈએ કે ગુરુવારે ભારતીય શેરબજારમાં જોરદાર તેજી જોવા મળી હતી. બંને બેન્ચમાર્ક સૂચકાંકો સેન્સેક્સ અને નિફ્ટી 50 નવી વિક્રમી ઊંચી સપાટીએ છે. સેન્સેક્સ 1,439.55 પોઈન્ટ્સ અથવા 1.77 ટકા વધીને 82,962.71 પર બંધ થયો હતો, જ્યારે નિફ્ટી 470.45 પોઈન્ટ્સ અથવા 1.89 ટકા વધીને 25,388.90 પર બંધ રહ્યો હતો.