બેંકિંગ છેતરપિંડી રોકવા RBIની મોટી કાર્યવાહી, બેંકોને મળશે વિશેષ 'ડોમેન નેમ'

રિઝર્વ બેંક ઓફ ઈન્ડિયા (આરબીઆઇ) એ દેશમાં સતત વધી રહેલી બેંકિંગ ફ્રોડને રોકવા માટે એક મોટું પગલું ભર્યું છે. આરબીઆઈએ શુક્રવારે એમપીસીની બેઠક બાદ જણાવ્યું હતું કે લોકોને સાયબર છેતરપિંડીથી બચાવવા માટે બેંકો અને નોન-બેંકિંગ કંપનીઓને વિશેષ 'ડોમેન નામ' આપવામાં આવશે.

આરબીઆઈ ગવર્નર સંજય મલ્હોત્રાએ બેઠક બાદ કહ્યું કે ડિજિટલ ફ્રોડમાં વધારો ચિંતાનો વિષય છે. આ માટે દરેકે જરૂરી પગલાં ભરવાની જરૂર છે. તેમણે કહ્યું, “સાયબર છેતરપિંડી રોકવા માટે, બેંકોને એક વિશેષ ડોમેન 'FIN.in' આપવામાં આવશે. તેનું રજીસ્ટ્રેશન એપ્રિલમાં શરૂ થશે.

ગવર્નરે કહ્યું, "સાયબર છેતરપિંડી રોકવા માટે, બેંકોને વિશેષ ડોમેન નામ 'bank.in' અને નોન-બેંકિંગ કંપનીઓને 'fin.in' ડોમેન નામ આપવામાં આવશે." તેમણે કહ્યું કે આનાથી બેંકિંગ છેતરપિંડી રોકવામાં મદદ મળશે.

આરબીઆઈએ કહ્યું કે નાણાકીય સેવાઓના ઝડપી ડિજિટલાઇઝેશનથી સગવડ અને કાર્યક્ષમતા આવી છે. જો કે, તે જ સમયે સાયબર ધમકીઓ અને ડિજિટલ જોખમોનું જોખમ પણ વધ્યું છે. આ દિન પ્રતિદિન વધી રહ્યા છે.

રેપો રેટમાં 5 વર્ષ બાદ ઘટાડો

રિઝર્વ બેંક ઓફ ઈન્ડિયા (આરબીઆઇ) એ શુક્રવારે 7 ફેબ્રુઆરીએ રેપો રેટમાં 25 બેસિસ પોઈન્ટનો ઘટાડો કર્યો છે. હવે રેપો રેટ 6.5% થી ઘટીને 6.25% થઈ ગયો છે. આરબીઆઇ  ગવર્નર સંજય મલ્હોત્રાએ કહ્યું કે આ નિર્ણય સર્વસંમતિથી લેવામાં આવ્યો છે.

મલ્હોત્રાએ જણાવ્યું હતું કે મોનેટરી પોલિસી કમિટી (એમપીસી) એ આ નિર્ણય લીધો છે કારણ કે ફુગાવાનો દર ઘટ્યો છે અને તેમાં વધુ ઘટાડો થવાની સંભાવના છે. તેમણે એમ પણ કહ્યું કે શહેરી વિસ્તારોમાં માંગ હજુ પણ નબળી છે, પરંતુ ગ્રામીણ વિસ્તારોમાં ગ્રાહકોની માંગ સુધરી રહી છે.