સરકાર માટે રાહતના સમાચાર, નેટ ડાયરેક્ટ ટેક્સ કલેક્શન 16.45% વધીને રૂ. 15.82 લાખ કરોડ થયું

આર્થિક મોરચે સરકાર માટે એક રાહતના સમાચાર આવ્યા છે. બુધવારે જારી કરાયેલા સરકારી આંકડા અનુસાર નવેમ્બરમાં નેટ ડાયરેક્ટ ટેક્સ કલેક્શનમાં 16.45 ટકાનો વધારો થયો છે. આ વધારા સાથે, નાણાકીય વર્ષ 2025માં સરકારી તિજોરી રૂ. 15.82 લાખ કરોડના સ્તરે પહોંચી ગઈ છે. સરકારના જણાવ્યા અનુસાર, એડવાન્સ ટેક્સ કલેક્શનમાં વધારો થવાને કારણે ડાયરેક્ટ ટેક્સ કલેક્શનમાં આ વધારો થયો છે.

સરકારી આંકડા અનુસાર આ સમયગાળા દરમિયાન એડવાન્સ ટેક્સ કલેક્શન 21 ટકા વધીને રૂ. 7.56 લાખ કરોડ થયું છે. આ કલેક્શનમાં રૂ. 7.42 લાખ કરોડથી વધુનો કોર્પોરેટ ટેક્સ અને રૂ. 7.97 લાખ કરોડનો નોન-કોર્પોરેટ ટેક્સનો સમાવેશ થાય છે.

1 એપ્રિલથી 17 ડિસેમ્બર, 2024ની વચ્ચે સિક્યોરિટીઝ ટ્રાન્ઝેક્શન ટેક્સ (એસટીટી)માંથી રૂ. 40,114 કરોડ એકત્ર કરવામાં આવ્યા હતા. આ સમયગાળા દરમિયાન, રૂ. 3.39 લાખ કરોડના રિફંડ જારી કરવામાં આવ્યા હતા, જે વાર્ષિક ધોરણે 42.49 ટકાનો વધારો દર્શાવે છે.

ગ્રોસ ડાયરેક્ટ ટેક્સ કલેક્શન, જેમાં કોર્પોરેટ ટેક્સ, પર્સનલ ઇન્કમ ટેક્સ અને એસટીટીનો સમાવેશ થાય છે, તે 1 એપ્રિલથી 17 ડિસેમ્બર, 2024 દરમિયાન રૂ. 19.21 લાખ કરોડથી વધુ હતી. આ 2023ના સમાન સમયગાળાની સરખામણીમાં 20.32 ટકાનો વધારો દર્શાવે છે.