દુનિયાના અમીરોની યાદીમાં મોટો ફેરફાર, અંબાણીને પછાડી આગળ નીકળ્યો 'ડિલિવરી બોય', જાણો કેટલી છે સંપત્તિ

અમીરોની યાદીમાં મોટો ફેરફાર થયો છે. એશિયાના સૌથી ધનાઢ્ય ઉદ્યોગપતિ અને રિલાયન્સ ઈન્ડસ્ટ્રીઝના માલિક મુકેશ અંબાણીને મોટો ઝટકો લાગ્યો છે. મુકેશ અંબાણી વિશ્વના અમીરોની યાદીમાંથી નીચે સરકી ગયા છે. તે અબજોપતિઓની યાદીમાં 12મા નંબરે સરકી ગયા છે. બ્લૂમબર્ગ બિલિયોનેર્સ લિસ્ટ અનુસાર, મુકેશ અંબાણી 112 બિલિયન ડોલરની સંપત્તિ સાથે અબજોપતિઓની યાદીમાં 12મા સ્થાને આવી ગયા છે. હવે વાત કરીએ એ વ્યક્તિની જેણે મુકેશ અંબાણીને હરાવીને 11મું સ્થાન મેળવ્યું છે.

અમીરોની યાદીમાં મુકેશ અંબાણી સરકી ગયા

દેશની સૌથી મૂલ્યવાન કંપની રિલાયન્સ ઈન્ડસ્ટ્રીઝના ચેરમેન મુકેશ અંબાણી બ્લૂમબર્ગ બિલિયોનેર્સ ઈન્ડેક્સમાં 12મા સ્થાને સરકી ગયા છે. કંપનીના શેરમાં ઘટાડા બાદ તેનું રેન્કિંગ નીચે આવ્યું છે. બીજી તરફ સ્પેનિશ બિઝનેસમેન અમાનશિયો ઓર્ટેગાએ પોતાનું પદ સંભાળી લીધું છે. છેલ્લા બે દિવસમાં Amancioની નેટવર્થ લગભગ 2 બિલિયન ડોલર વધી છે 113 બિલિયન ડોલરની નેટવર્થ સાથે Amancioએ મુકેશ અંબાણીને પછાડીને વિશ્વના 11મા સૌથી ધનાઢ્ય ઉદ્યોગપતિનો ખિતાબ હાંસલ કર્યો છે.

અંબાણીને કોણે હરાવ્યું?

અમાનશિઓ ઓર્ટેગા, એક રેલ્વે કર્મચારીનો દીકરો છે, જેણે ડિલિવરી બોય તરીકે તેની કારકિર્દીની શરૂઆત કરી હતી, તે સ્પેનના પીઢ ઉદ્યોગપતિ છે. રિટેલ ક્ષેત્રના રાજા તરીકે ઓળખાતા અમાનશિઓ ઓર્ટેગા પાસે $113 બિલિયન કરતા પણ વધુની સંપત્તિ છે. વિશ્વની સૌથી મોટી રિટેલ કંપની ઈન્ડિટેક્સમાં તેમની પાસે 59% હિસ્સો છે.

રિટેલ સેક્ટરનો કિંગ

અમાનશિઓ ઓર્ટેગાની કંપની Inditex એ Zara સહિત સાત રિટેલ બ્રાન્ડની મૂળ કંપની છે. વિશ્વભરમાં તેમની પાસે 7400થી વધુ સ્ટોર્સ છે. કંપનીની આવક $34.1 બિલિયન કરતાં વધુ છે. લક્ઝરી રિટેલ બ્રાન્ડ્સ ઉપરાંત, કંપની પાસે પ્રીમિયમ ઓફિસ અને રિટેલ પ્રોપર્ટી છે. તેમનો બિઝનેસ અને રોકાણ માત્ર સ્પેનમાં જ નહીં પરંતુ સમગ્ર વિશ્વમાં ફેલાયેલું છે. સ્પેન સિવાય તેણે અમેરિકા અને યુરોપના ઘણા મોટા દેશોમાં રોકાણ કર્યું છે.

સંઘર્ષથી શરૂઆત કરી

ઓર્ટેગા ભલે આજે વિશ્વના સૌથી અમીર લોકોની યાદીમાં સામેલ હોય, પરંતુ તેણે સંઘર્ષના દિવસો પણ જોયા છે. પિતા રેલવેમાં મજૂર હતા. તે એક દુકાનમાં ડિલિવરી બોય તરીકે કામ કરતો હતો. કપડાંની દુકાનમાં કામ કરતો. દરજીની દુકાનમાં સીવણકામ પણ કર્યું. અહીંથી જ તેણે કપડાંને લગતી બારીકીઓ શીખી હતી. આ ભણતર તેને ખૂબ જ ઉપયોગી હતું. સૌથી પહેલા તેણે દુકાન ખોલી. પછી ધીમે-ધીમે તેનું વિસ્તરણ થવા લાગ્યું અને વર્ષ 1963માં લક્ઝરી વસ્તુઓનો બિઝનેસ શરૂ થયો અને પછી 1975માં ZARAનું પહેલું આઉટલેટ શરૂ થયું. 1985માં ઓર્ટેગાએ તેમની કંપની ઈન્ડિટેક્સનો પાયો નાખ્યો. વર્ષ 2011માં તેમણે તેમનો બિઝનેસ તેમની દીકરીને સોંપ્યો હતો. અમીરોની યાદીમાં એલન મસ્ક ટોપ પર છે. તેમની સંપત્તિ 249 અબજ ડોલર છે. એમેઝોનના સ્થાપક જેફ બેઝોસ 209 અબજ ડોલરની સંપત્તિ સાથે બીજા સ્થાને છે. મેટા માલિક માર્ક ઝકરબર્ગ $190 બિલિયનની સંપત્તિ સાથે ત્રીજા સ્થાને છે. જ્યારે ભારતના ગૌતમ અદાણી 15મા નંબર પર છે.