CA કે ઓનલાઇન પ્લેટફોર્મ પર નહીં અહીં ફાઇલ કરો ITR, એકદમ મફતમાં થશે કામ

જુલાઈ મહિનો શરૂ થઈ ગયો છે. ધીમે-ધીમે ITR ફાઈલ કરવાની છેલ્લી તારીખ નજીક આવી રહી છે. દર વખતની જેમ, નાણાકીય વર્ષ 2023-24 માટે ઈન્કમ ટેક્સ રિટર્ન ફાઇલ કરવાની છેલ્લી તારીખ 31મી જુલાઈ છે. સીબીડીટી દ્વારા અત્યાર સુધીમાં કેટલા લોકોએ આઈટીઆર ફાઈલ કર્યું છે તેનો ડેટા જાહેર કરવામાં આવ્યો નથી. 31 જુલાઈ સુધી જે લોકોની આવકનું ઓડિટ નથી થયું તેઓ ITR ફાઈલ કરી શકે છે. ઈન્કમ ટેક્સ રિટર્ન (ITR ફાઇલિંગ) ફાઇલ કરવાની ઘણી રીતો છે. અલગ-અલગ રીતે ITR ફાઈલ કરવાના નિયમો અને તેના ખર્ચ પણ અલગ-અલગ છે. ચાલો વિગતવાર જાણીએ-

CA દ્વારા ITR ફાઇલિંગ
સામાન્ય રીતે, મોટાભાગના કરદાતાઓ ઈન્કમ ટેક્સ રિટર્ન ફાઇલ કરવા માટે ચાર્ટર્ડ એકાઉન્ટન્ટ (CA)ની મદદ લે છે. CA આ માટે તેનો ચાર્જ લે છે. CA તમારા ફોર્મ-16 અને ફોર્મ 26AS જેવા દસ્તાવેજોના આધારે ITR પ્રોસેસ પૂરી કરે છે. આમાં રિટર્ન તૈયાર કરવા અને સબમિટ કરવા બંનેનો સમાવેશ થાય છે. CA સામાન્ય રીતે આવી સેવાઓ માટે રૂ. 1500થી 2000 ચાર્જ કરે છે. તમારું રિટર્ન કેટલું મુશ્કેલ છે તેના આધારે ITR ફાઈલ કરવા માટેનો ચાર્જ વધુ હોઈ શકે છે.

ઓનલાઈન પ્લેટફોર્મ દ્વારા ITR

ITR ફાઈલ કરવાની સુવિધા ઓનલાઈન પ્લેટફોર્મ પર પણ ઉપલબ્ધ છે. ઓનલાઈન પ્લેટફોર્મની મદદ માટે, તમે વેબસાઈટ અથવા તેમની એપ્સ જેમ કે, ClearTax, Tax2Win, TaxBuddy, Quickoનો ઉપયોગ કરી શકો છો. તમે આ વેબસાઇટ્સ અથવા તેમની એપ્સ દ્વારા સરળતાથી ઈન્કમ ટેક્સ રિટર્ન ફાઇલ કરી શકો છો. તે ઉપયોગ માટે પણ સરળ છે અને તેમના શુલ્ક સામાન્ય રીતે CA અથવા ટેક્સ નિષ્ણાત કરતા ઓછા હોય છે. અહીં એકવાર ITR ફાઈલ કરવાનો ચાર્જ 500થી 1000 રૂપિયાની વચ્ચે હોય છે. તમારે કેટલીક વિશેષ સેવા માટે વધારાની ફી ચૂકવવી પડી શકે છે.

ઈન્કમ ટેક્સ વિભાગના પોર્ટલ પરથી

ઈન્કમ ટેક્સ રિટર્ન ફાઇલ કરવાની સૌથી સસ્તી રીત આવકવેરા વિભાગની ઇ-ફાઇલિંગ વેબસાઇટ દ્વારા આઇટીઆર ફાઇલ કરવી છે. અહીંથી ITR ફાઇલ કરવું બિલકુલ મફત છે, ITR ફાઇલ કરવાની પ્રક્રિયા પહેલાથી બનાવેલા નમૂના દ્વારા કરવામાં આવે છે. તમે PAN કાર્ડ નંબર નાખીને લોગીન કરી શકો છો. આ પછી તમે ઈન્કમ ટેક્સ વિભાગના સોફ્ટવેરનો ઉપયોગ કરીને ITR ફાઇલ કરી શકો છો. એકવાર ઈન્કમ ટેક્સ રિટર્ન ફાઇલ થઈ જાય, પછી તમે તેને XML ફાઇલ તરીકે ઓનલાઇન સબમિટ કરી શકો છો. તમે તમારા PAN, આધાર કાર્ડ, ડિજિટલ સાઇન અથવા ઓનલાઇન બેન્કિંગનો ઉપયોગ કરીને તેને ચકાસી શકો છો.

ઈન્કમ ટેક્સ રિટર્ન ફાઇલ કરવાના ફાયદા

દર વર્ષે ઇન્કમ ટેક્સ રિટર્ન (ITR) ફાઇલ કરવું તમારા માટે ઘણી રીતે ફાયદાકારક છે. તેનો પહેલો ફાયદો એ છે કે, જો તમે વધારે ટેક્સ ભર્યો હોય તો તમે રિટર્ન ફાઈલ કરીને રિફંડ મેળવી શકો છો. ITR ફાઇલ કરનાર વ્યક્તિને બેંક પણ સરળતાથી લોન આપે છે. એટલું જ નહીં, વિદેશ પ્રવાસ દરમિયાન વિઝા માટે અરજી કરતી વખતે ITR ફાઇલ કરનારાઓને પસંદગી આપવામાં આવે છે. ITR ઘણી સરકારી યોજનાઓ અને સબસિડી માટે જરૂરી દસ્તાવેજ છે. જો તમે વ્યવસાય શરૂ કરવા માગતા હોવ તો પણ તમારે ઈન્કમ ટેક્સ રિટર્ન સબમિટ કરવું પડશે.