ઈતિહાસમાં પ્રથમ વખત ડોલરની સરખામણી રૂપિયો પહોંચ્યો 84 પાર, આ કારણોથી થયો ઘટાડો

શુક્રવારે ભારતીય ચલણ રૂપિયો ડોલરની સરખામણીએ રેકોર્ડ નીચી સપાટીએ પહોંચી ગયો હતો. છેલ્લા કેટલાક દિવસોમાં ચાલી રહેલા ભૌગોલિક-રાજકીય તણાવ અને ચીનના બજારને મળેલા પ્રોત્સાહન બાદ ઇક્વિટી આઉટફ્લોમાં વધારો થતાં આ ઘટાડો આવ્યો છે. શુક્રવારે રૂપિયો 84.06ના સ્તર પર બંધ થયો હતો. આ પ્રથમ વખત છે જ્યારે ડોલર સામે રૂપિયો 84ના સ્તરે પહોંચ્યો છે. સરળ ભાષામાં કહીએ તો 1 યુએસ ડોલર = 84 રૂપિયા.

આરબીઆઇએ ટેન્શન વધાર્યું

રૂપિયામાં 84ના સ્તરની ઉપર આવેલો ઘટાડો ખૂબ જ નોંધપાત્ર બની ગયો છે. વાસ્તવમાં, ભારતીય રિઝર્વ બેંક (આરબીઆઇ) એ બે મહિનાથી વધુ સમય માટે તેને આ સ્તરે પહોંચતા અટકાવી હતી. સોમવારે ભારતીય રિઝર્વ બેંકે અનૌપચારિક રીતે બેંકોને રૂપિયા પર ભારે દાવ લગાવવાનું ટાળવાની સલાહ આપી હતી. શુક્રવારે આરબીઆઈએ પણ દરમિયાનગીરી કરી વેપારીઓએ જણાવ્યું હતું કે, મોટી સરકારી બેન્કોએ રૂપિયાને ગગડતો રોકવા માટે ડોલર વેચ્યા હતાં.

અહેવાલ મુજબ, કરુર વૈશ્ય બેંકના ટ્રેઝરી હેડ VRC રેડ્ડીએ જણાવ્યું હતું કે આગળ જતાં ચલણ પર વધુ દબાણ જોવા મળી શકે છે, પરંતુ RBI "રૂપિયો સ્થિર રહે તેની ખાતરી કરવા માટે માત્ર મામૂલી અવમૂલ્યનની મંજૂરી આપી શકે છે," ETએ અહેવાલ આપ્યો હતો કે "સ્થિર કરન્સી તરીકે સેવા આપે છે."

આ કારણોથી રૂપિયો ગગડ્યો

લગભગ 15 દિવસ પહેલા તે 83.50ની આસપાસ મજબૂત સ્તરે હતો, પરંતુ ઇઝરાયેલ-ઇરાન તણાવમાં ક્રૂડ ઓઇલના ભાવમાં વધારો થયો, વિદેશી સંસ્થાકીય રોકાણકારોએ ભારે માત્રામાં ભારતીય ઇક્વિટી વેચી અને યુએસમાં મોટા વ્યાજ દરમાં કાપની આશા ઓછી થઈ, જેના કારણે તેનું નજીકનું ભવિષ્ય બગડ્યું. વિદેશી રોકાણકારોએ છેલ્લા નવ ટ્રેડિંગ સેશનમાં મોટા પ્રમાણમાં શેર વેચ્યા છે, જ્યારે ઓક્ટોબરમાં અત્યાર સુધીમાં બ્રેન્ટ ક્રૂડ ઓઈલના વાયદામાં 10%નો વધારો થયો છે. તમને જણાવી દઈએ કે ભારત તેની ક્રૂડ ઓઈલની જરૂરિયાતનો મોટો હિસ્સો આયાત દ્વારા પૂરી કરે છે.