PF એકાઉન્ટને લઈને EPFOએ બદલ્યા નિયમો, જાણો યુઝર્સ પર શું થશે અસર?

કર્મચારી ભવિષ્ય નિધિ સંગઠને કર્મચારીઓના પીએફ એકાઉન્ટને લગતા નિયમોમાં ફેરફાર કર્યો છે. EPFOએ આ ફેરફાર તમામ વર્તમાન યુઝર્સ માટે કર્યો છે. નવા નિયમો હેઠળ, EPFOએ નવી માર્ગદર્શિકા જારી કરી છે. સંસ્થા તરફથી આ ફેરફાર પીએફ એકાઉન્ટમાં પ્રોફાઇલ અપડેટ કરવા અથવા સુધારવા સાથે સંબંધિત છે.

EPFOની નવી SOP માર્ગદર્શિકા હેઠળ, SOP સંસ્કરણ 3.0 યુઝર્સને તેમની પ્રોફાઇલ અપડેટ કરવા માટે મંજૂરી આપવામાં આવી છે. નવા નિયમોના અમલીકરણ પછી, જો તમે તમારી UAN પ્રોફાઇલમાં કંઈપણ સુધારશો અથવા અપડેટ કરો છો, તો તમારે તેના માટે દસ્તાવેજો રજૂ કરવા પડશે. આ ઉપરાંત, તમે ઘોષણા આપીને ફેરફારો અથવા સુધારણા માટે અરજી કરી શકો છો.

એમ્પ્લોઈઝ પ્રોવિડન્ટ ફંડ ઓર્ગેનાઈઝેશન દ્વારા જારી કરવામાં આવેલી ગાઈડલાઈન્સમાં કહેવામાં આવ્યું છે કે, ઘણીવાર એવું જોવા મળે છે કે યુઝર્સ દ્વારા અનેક પ્રકારની ભૂલો કરવામાં આવે છે. જેને સુધારવા માટે લોકોને મુશ્કેલીઓનો સામનો કરવો પડે છે. ઘણી વખત આ સમસ્યા ડેટા અપડેટ ન થવાના કારણે થાય છે. આ જ કારણ છે કે, EPFOએ નવી માર્ગદર્શિકા જાહેર કરી છે.

ફેરફારોને બે કેટેગરીમાં વહેંચવામાં આવ્યા

EPFO દ્વારા જારી કરવામાં આવેલી નવી માર્ગદર્શિકા અનુસાર હવે યુઝર્સ તેમની પ્રોફાઇલમાં બે પ્રકારના ફેરફાર કરી શકે છે. પ્રથમ- મુખ્ય અને બીજું- ગૌણ. નાના ફેરફારો માટે, યુઝર્સે ઘોષણા સાથે ઓછામાં ઓછા બે જરૂરી સંબંધિત દસ્તાવેજો સબમિટ કરવા પડશે. તેમજ મોટા સુધારા કરવા માટે, યુઝર્સે ઓછામાં ઓછા ત્રણ જરૂરી સંબંધિત દસ્તાવેજો સબમિટ કરવા પડશે.