Dhanteras 2024: સોનું ખરીદવાનું વિચારી રહ્યા છો? તો આ બાબતોનું જરૂરથી રાખજો ધ્યાન

દિવાળીનો તહેવાર રોશનીનો તહેવાર છે. પાંચ દિવસીય આ ઉત્સવનો આજથી પ્રારંભ થયો છે. દિવાળીનો તહેવાર ધનતેરસથી શરૂ થાય છે. આજે ધનતેરસનો તહેવાર દેશભરમાં ધામધૂમથી ઉજવવામાં આવી રહ્યો છે. એવું માનવામાં આવે છે કે, આ દિવસે સોના અને ચાંદીથી સંબંધિત વસ્તુઓ ખરીદવી શુભ હોય છે. જો તમે પણ ધનતેરસ પર સોનું ખરીદવાનું વિચારી રહ્યા છો, તો તમારે સોનું ખરીદતી વખતે કેટલીક બાબતોનું ખાસ ધ્યાન રાખવું જોઈએ.

શુદ્ધ સોનું

સોનું કેટલું શુદ્ધ છે તે કેરેટમાં માપવામાં આવે છે. જોકે, 24 કેરેટ સોનું સૌથી શુદ્ધ માનવામાં આવે છે, પરંતુ તેમાંથી સોનાની જ્વેલરી બનાવવામાં આવતી નથી. સામાન્ય રીતે, સોનાના દાગીના બનાવવા માટે 22 અને 18 કેરેટના વિકલ્પો હોય છે. સોનું ખરીદતી વખતે તમારે ધ્યાનમાં રાખવું જોઈએ કે તમે કેટલા કેરેટનું સોનું ખરીદી રહ્યા છો. ઉલ્લેખનીય છે કે, સોનાની કિંમત તેના કેરેટ પર નિર્ભર કરે છે.

હોલમાર્ક

હંમેશા હોલમાર્કવાળું ગોલ્ડ જ ખરીદવું જોઈએ. હોલમાર્ક ખાતરી કરે છે કે, તમે જે સોનું ખરીદો છો તે શુદ્ધ છે. જો તમે હોલમાર્ક વિના સોનું ખરીદો છો, તો શક્ય છે કે જ્વેલર તમને સાચા સોનાના નામે નકલી સોનું વેચી રહ્યો હોય.

સોનાની કિંમત

છેલ્લા કેટલાક સમયથી સોનાના ભાવમાં વધારો જોવા મળી રહ્યો છે. આવી સ્થિતિમાં સોનું ખરીદતા પહેલા તમારે જાણી લેવું જોઈએ કે સોનાની કિંમત શું છે. જો તમને સોનાની કિંમત ખબર નથી તો સંભવ છે કે, જ્વેલર તમને વધુ ભાવે સોનું વેચે. આ સિવાય જ્વેલર તમને જે કિંમત જણાવે છે તેની સરખામણી બજારના અન્ય જ્વેલર્સ સાથે કરો.

મેકિંગ ચાર્જ

ઘણી વખત જ્વેલર મેકિંગ ચાર્જ કરતાં વધુ વસૂલ કરે છે. જોકે, તે સંપૂર્ણ રીતે જ્વેલર પર નિર્ભર કરે છે કે તે કેટલો મેકિંગ ચાર્જ વસૂલ કરે છે. આવી સ્થિતિમાં તમારે સોનું ખરીદતા પહેલા મેકિંગ ચાર્જની ચર્ચા કરવી જોઈએ અને જો જરૂરી હોય તો તેને ઘટાડવા માટે બાર્ગેઇનિંગ પણ કરવી જોઈએ.

બિલ જરૂર લો

કોઈપણ સોનું ખરીદ્યા પછી, જ્વેલર્સ પાસેથી કન્ફર્મ બિલ મેળવવાની ખાતરી કરો. જો કોઈ જ્વેલર કાચું બિલ આપતું હોય તો બિલકુલ સ્વીકારવું નહીં. હંમેશા કન્ફર્મ બિલ લો જેથી ભવિષ્યમાં સોનું વેચવામાં કે તેનું પરીક્ષણ કરાવવામાં કોઈ મુશ્કેલી ન આવે.

ઓનલાઇન પેમેન્ટ

આજના સમયમાં ઓનલાઈન પેમેન્ટ કરવું ખૂબ જ સરળ બની ગયું છે. આવી સ્થિતિમાં તમારે સોનાની ખરીદી માટે ઓનલાઈન પેમેન્ટ પણ કરવું જોઈએ જેથી તમારી પાસે ટ્રાન્ઝેક્શનનો રેકોર્ડ પણ રહે.