વધારે પગાર જોઈતો હોય તો પહેલા ફિટ થવું પડશે! ભારતીય ઉદ્યોગમાં શરૂ થયું નવું અભિયાન

પ્રાઈવેટ સેક્ટરમાં કામ કરતા કર્મચારીઓનો પગાર તેમના કામના આધારે વધારવામાં આવે છે. કર્મચારી જેટલું સારું કામ કરે છે, તે પ્રમાણે તેનો પગાર વધે છે. જોકે, હવે આમાં ફેરફાર થવા લાગ્યો છે. ઘણી કંપનીઓમાં કર્મચારીની ફિટનેસને પણ પગાર વધારા માટે માપદંડ બનાવવામાં આવે છે.

કર્મચારીઓની ફિટનેસ કંપની માટે ફાયદાકારક

એક અહેવાલ મુજબ, ઈન્ડિયા ઈન્ક. એટલે કે ભારતીય બિઝનેસ જગતમાં ફિટનેસમાં વધારો કરવાનો નવો ટ્રેન્ડ શરૂ થયો છે. ઘણી ટોચની કંપનીઓ હવે આ બાબત પર ધ્યાન આપી રહી છે. કંપનીઓ ઈચ્છે છે કે, આ બહાને તેમના કર્મચારીઓને શારીરિક રીતે ફિટ રહેવા માટે પ્રેરિત કરવામાં આવે. કર્મચારીઓને ફિટ રાખવાથી ટીમની ઉત્પાદકતા વધે છે. સ્વાસ્થ્યના કારણોસર કર્મચારી અચાનક રજા પર જતા હોવાના બહુ ઓછા કિસ્સા છે. એકંદરે, તે કંપની માટે નફાકારક સોદો સાબિત થાય છે.

આ કંપનીઓ કરી રહી છે ફેરફાર

રિપોર્ટ અનુસાર, ડોઇશ બેંક, આદિત્ય બિરલા હેલ્થ ઇન્સ્યોરન્સ, અપગ્રેડ, ફિલિપ્સ, થેલ્સ અને મીશો જેવી કંપનીઓએ કર્મચારીઓની કામગીરીની સમીક્ષામાં સ્વાસ્થ્ય સંબંધિત લક્ષ્યોનો સમાવેશ કર્યો છે. એટલે કે, આ કંપનીઓમાં કામ કરતા કર્મચારીઓનો પગાર કેટલો વધશે તે તેમના કામ પર તેમજ તેઓ શારીરિક રીતે કેટલા ફિટ છે તેના પર નિર્ભર રહેશે.

કર્મચારીઓને આપવામાં આવી રહી છે આ સુવિધાઓ

આ માટે કંપનીઓ પોતાના કર્મચારીઓને વિશેષ સુવિધા પણ આપી રહી છે. ઘણી કંપનીઓ તેમના કર્મચારીઓને ઓનસાઇટ ડાયટથી લઈને ન્યુટ્રિશન કન્સલ્ટન્ટ સુધીની સુવિધાઓ પૂરી પાડી રહી છે. કેટલીક કંપનીઓએ કર્મચારીઓના માનસિક સ્વાસ્થ્યને ધ્યાનમાં રાખીને વેલનેસ સેશન શરૂ કર્યા છે. કંપનીઓ કર્મચારીઓના હૃદયના સ્વાસ્થ્ય સહિત અન્ય મેટ્રિક્સને પણ ટ્રેક કરી રહી છે. જોકે, કર્મચારીઓની ગોપનીયતાનું ધ્યાન રાખવામાં આવી રહ્યું છે.

શરૂ થઈ ચૂકી છે આવી પહેલ

રિપોર્ટ અનુસાર, આદિત્ય બિરલા હેલ્થ ઈન્સ્યોરન્સે આ નાણાકીય વર્ષ માટે તેની કામગીરીની સમીક્ષામાં સ્વાસ્થ્ય સંબંધિત પરિબળોનો સમાવેશ કર્યો છે. તમામ કર્મચારીઓને તેનું પાલન કરવા જણાવાયું છે. તેઓએ તેમના KRAમાં ઓછામાં ઓછા એક હેલ્થ ગોલનો ઉલ્લેખ કરવો આવશ્યક છે. ડોઇશ બેંકનું ધ્યાન માનસિક સ્વાસ્થ્ય પર છે. મીશો પર સાપ્તાહિક વેલનેસ સેશન શરૂ કરવામાં આવ્યા છે. UpGrad આવનારા મહિનાઓમાં વ્હીલ ઑફ હેપીનેસ પ્રોગ્રામ શરૂ કરી રહ્યું છે.