Tech News: USએ માદુરોને પકડવા લીધી હતી એન્થ્રોપિક AIની મદદ,પહેલીવાર સૈન્ય મિશનમાં AIનો હાથ
છેલ્લું અપડેટ : 14 Feb 2026
અમેરિકાએ વેનેઝુએલાના રાષ્ટ્રપતિને તેમના નિવાસસ્થાનેથી ઉઠાવવા (અપહરણ કરવા) માટે દિગ્ગજ ટેક કંપની એન્થ્રોપિકના AI મોડલ Claudeનો ઉપયોગ કર્યો હતો. 'વોલ સ્ટ્રીટ જર્નલ'ના અહેવાલમાં આ માહિતી સામે આવી છે. આ ઘટના બાદ વિશ્વભરમાં તેને સૈન્ય અભિયાનોમાં AIના ઉપયોગની શરૂઆત તરીકે જોવામાં આવી રહી છે.
વોલ સ્ટ્રીટ જર્નલના રિપોર્ટ અનુસાર, વેનેઝુએલાના પૂર્વ રાષ્ટ્રપતિ નિકોલસ માદુરોને તેમના નિવાસસ્થાનેથી પકડીને અમેરિકા લાવવા માટે ચલાવવામાં આવેલા સૈન્ય ઓપરેશનમાં AI મોડલ Claude ની મોટી ભૂમિકા હતી.
અમેરિકાના સંરક્ષણ વિભાગ દ્વારા નિકોલસ માદુરોને પકડવા માટે એન્થ્રોપિકના AI મોડલ Claude નો ઉપયોગ કરવામાં આવ્યો હતો. આ રિપોર્ટ આવ્યા બાદ દુનિયા તેને યુદ્ધના મેદાનમાં AIની એન્ટ્રી તરીકે જોઈ રહી છે. નોંધનીય છે કે, આ પહેલીવાર છે જ્યારે કોઈ કોમર્શિયલ AIનો ઉપયોગ આટલા મોટા સૈન્ય અભિયાનમાં થયો હોય.
અમેરિકાએ ઓપરેશનમાં AIનો ઉપયોગ કેવી રીતે કર્યો?
વોલ સ્ટ્રીટ જર્નલના રિપોર્ટ અનુસાર, Claude AIનો ઉપયોગ ડેટા ફર્મ Palantir Technologies સાથેની ભાગીદારીના ભાગરૂપે કરવામાં આવ્યો હતો. મહત્ત્વની વાત એ છે કે, Palantir ના પ્લેટફોર્મનો ઉપયોગ અમેરિકન સંરક્ષણ વિભાગ દ્વારા મોટા પાયે કરવામાં આવે છે.
AI કંપનીની નો-વાયલન્સ પોલિસીનું શું થયું?
આ સમાચાર સામે આવ્યા બાદ એન્થ્રોપિક કંપનીની મુશ્કેલીઓ વધી ગઈ છે. કંપનીની સ્પષ્ટ ગાઇડલાઇન્સ છે કે Claude AI નો ઉપયોગ હિંસા ફેલાવવા, હથિયાર બનાવવા કે જાસૂસી કરવા માટે કરી શકાશે નહીં.
જ્યારે કંપનીને આ બાબતે પૂછવામાં આવ્યું ત્યારે તેમણે આવા કોઈપણ ઓપરેશન પર ટિપ્પણી કરવાનો ઇનકાર કરી દીધો હતો. જોકે, તેમણે એટલું ચોક્કસ કહ્યું કે, ભલે તે સરકાર હોય કે પ્રાઈવેટ સેક્ટર, દરેકે તેમની પોલિસીનું પાલન કરવું પડશે.
બીજી તરફ, એન્થ્રોપિક કંપની તેની પોલિસીમાં કોઈપણ પ્રકારની હિંસા, હથિયાર ડિઝાઇન કરવા અથવા દેખરેખ માટે AIના ઉપયોગની મંજૂરી આપતી નથી. આવી સ્થિતિમાં રિપોર્ટમાં અમેરિકન ઓપરેશનમાં તેના AIના ઉપયોગની વાત સામે આવતા સવાલો ઉભા થયા છે કે, શું સરકારો AI કંપનીઓની પોલિસીને બાજુ પર રાખી શકે છે?
પેન્ટાગોનનું AI કંપનીઓ પર દબાણ
અહેવાલો મુજબ, પેન્ટાગોન OpenAI અને એન્થ્રોપિક જેવી દિગ્ગજ કંપનીઓ પર દબાણ કરી રહ્યું છે કે તેઓ તેમના AI ટુલ્સ 'ક્લાસિફાઈડ નેટવર્ક' પર ઉપલબ્ધ કરાવે. આ સાથે સેના એવું પણ ઈચ્છે છે કે તેમના માટે ઉપલબ્ધ કરાવવામાં આવેલા ટુલ્સ પર એવા પ્રતિબંધો ન હોય, જે સામાન્ય યુઝર્સ માટે લગાવવામાં આવે છે.
હાલમાં એન્થ્રોપિક એકમાત્ર એવી કંપની છે જેનું AI મોડલ થર્ડ પાર્ટીના માધ્યમથી ક્લાસિફાઈડ નેટવર્ક પર વાપરી શકાય છે. આ જ કારણ છે કે એન્થ્રોપિકના વેલ્યુએશનમાં જબરદસ્ત વધારો થયો છે અને તે 380 બિલિયન ડોલર સુધી પહોંચી ગયું છે.
માદુરોની ધરપકડ અને ભવિષ્ય
જણાવી દઈએ કે આ વર્ષે જાન્યુઆરીની શરૂઆતમાં પેન્ટાગોન દ્વારા ચલાવવામાં આવેલા ઓપરેશન દ્વારા વેનેઝુએલાના પૂર્વ રાષ્ટ્રપતિ નિકોલસ માદુરોને તેમના ઘરેથી પકડીને ન્યૂયોર્ક લાવવામાં આવ્યા હતા. હવે આ મિશનમાં કોમર્શિયલ AIના ઉપયોગના અહેવાલે દુનિયાભરમાં હલચલ મચાવી દીધી છે. જાણકારો તેને યુદ્ધ અને સૈન્ય ઓપરેશન્સમાં AIના યુગની શરૂઆત માની રહ્યા છે.
રોઇટર્સના રિપોર્ટ મુજબ, હાલમાં આ માહિતી પર પેન્ટાગોન, વ્હાઇટ હાઉસ અથવા સંબંધિત ટેક કંપનીઓએ કોઈ સત્તાવાર પ્રતિક્રિયા આપી નથી. જોકે, એ નક્કી છે કે આવનારા સમયમાં AI વિશ્વ રાજકારણ અને સૈન્ય અભિયાનોમાં મોટી ભૂમિકા ભજવશે.
