મહિલાઓની છેડતી કરનારાઓને લાગશે કરંટ, વિદ્યાર્થીએ બનાવી ખાસ ડિવાઇસ, આ રીતે કરશે કામ

રાજસ્થાનના વિદ્યાર્થી વિવેક ચૌધરીએ મહિલાઓને છેડતીથી બચાવવા માટે એક ખાસ ડિવાઇસ ડિઝાઇન કરી છે. તે શૂઝમાં લગાવવામાં આવે છે. જેવી કોઈ મહિલાઓની છેડતી કરવાનો પ્રયાસ કરે છે, તો તેને કરંટ લાગી શકે છે. ઉપરાંત, આ ડિવાઇસ પર એક બટન દબાવવાથી, મહિલાનું લોકેશન તેના પરિવારના સભ્યોને મોકલવામાં આવશે. આવી સ્થિતિમાં, જો કોઈ મહિલા ક્યાંક મુશ્કેલીમાં ફસાઈ ગઈ હોય તો તેની પાસે પહોંચવું સરળ બનશે.

પોલીટેકનિકમાં અભ્યાસ કરે છે વિવેક 

લક્ષ્મણગઢનો રહેવાસી 17 વર્ષનો વિવેક પોલિટેકનિકમાં અભ્યાસ કરે છે. સમાજમાં મહિલાઓ વિરુદ્ધ વધતા ગુનાઓ જોઈને તેને આ  ડિવાઇસ બનાવવાનો વિચાર આવ્યો. સ્ત્રીઓ હંમેશા તેને પોતાની સાથે રાખી શકે તે માટે, તેણે આ ડિવાઇસને શૂઝમાં ફીટ કરવાનું વિચાર્યું. તેણે આ ડિવાઇસનું નામ WSS રાખ્યું છે. આ ડિવાઇસ બનાવવામાં IC, LED, વોલ્ટેજ બૂસ્ટર, લિથિયમ બેટરી, GPS ટ્રેક અને સેન્સર વગેરેનો ઉપયોગ કરવામાં આવ્યો છે. એકવાર બેટરી ચાર્જ થઈ જાય પછી, આ ડિવાઇસ 100 વોલ્ટનો ઈલેક્ટ્રિક શોક આપી શકે છે. તેની કિંમત લગભગ 3,500 રૂપિયા છે.

આ રીતે કામ કરશે

શૂઝમાં ફીટ કરાયેલ આ ડિવાઇસ સેન્સરની મદદથી કામ કરશે. જો કરંટનો ઉપયોગ કરવો હોય તો શૂઝની એડીને જોરથી મારવી પડશે. આ પછી, જો કોઈ મહિલાને સ્પર્શ કરવાનો પ્રયાસ કરશે, તો તેને ઈલેક્ટ્રિક શોક લાગશે. જો કોઈ મહિલા પોતાનું લોકેશન શેર કરવા માંગતી હોય, તો તેણે બીજા શૂઝ પર એક બટન ક્લિક કરવું પડશે. તેને બીજા પગથી પણ દબાવી શકાય છે. આ પછી તેનું લોકેશન ત્રણ નંબરો પર શેર કરવામાં આવશે.

પેટન્ટ માટે તૈયારી કરી રહ્યો છે

વિવેક હવે પોતાની ડિવાઇસને પેટન્ટ કરાવવાની તૈયારી કરી રહ્યો છે. તેણે પોલીસ અધિકારીઓને પણ પોતાની ડિવાઇસ બતાવી છે. પોલીસ અધિકારીઓને પણ તે ગમી અને તેમણે વિવેકને મદદ કરવાનું વચન આપ્યું છે.