VIDEO: કારમાં CNG કિટ લગાવવાથી વૉરંટી અને ઇન્સ્યોરન્સ પર શું અસર થાય છે? આ રહ્યા નિયમો
છેલ્લું અપડેટ : 10 Sept 2026
પેટ્રોલ-ડીઝલના વધતા ભાવ અને E20 ની ચિંતાઓ વચ્ચે કારને CNG માં કન્વર્ટ કરાવવાનું ચલણ વધી રહ્યું છે. માર્કેટમાં એવી ઘણી કારો છે, જેમાં કંપની તરફથી CNG નો વિકલ્પ નથી મળતો. આવા સંજોગોમાં લોકો આફ્ટરમાર્કેટ CNG કિટ લગાવીને ખર્ચ ઘટાડવાનો પ્રયાસ કરી રહ્યા છે. જોકે, CNG કિટ લગાવતાં પહેલાં ઇન્સ્યોરન્સ (વીમો) અને વોરંટી પર થતી અસરોને સમજવી ખૂબ જરૂરી છે.
આફ્ટરમાર્કેટ CNG કિટનો સૌથી મોટો ફાયદો એ છે કે તેની મદદથી એવી કારોને પણ CNG માં ફેરવી શકાય છે, જેમાં કંપની તરફથી CNG નો વિકલ્પ આપવામાં આવતો નથી. સામાન્ય રીતે આફ્ટરમાર્કેટ CNG લગાવવાનો ખર્ચ કંપનીની ફેક્ટરી-ફિટેડ CNG કારના પેટ્રોલ વેરિઅન્ટની સરખામણીમાં ચૂકવવા પડતા વધારાના પ્રીમિયમ કરતાં ૨૫ થી ૩૦ ટકા ઓછો હોઈ શકે છે. આ ઉપરાંત જૂની પેટ્રોલ કારોમાં વધુ સારા માઇલેજ માટે પણ આવું કરી શકાય છે.
માની લો કે, જો કોઈ SUV નું CNG વેરિઅન્ટ કંપની નથી વેચતી, તો તેના માલિક આફ્ટરમાર્કેટ કિટ લગાવી શકે છે. આ સિવાય જૂની કે સેકન્ડ હેન્ડ પેટ્રોલ કારને પણ CNG માં કન્વર્ટ કરીને રોજના ઇંધણના ખર્ચમાં ઘટાડો કરી શકાય છે. જોકે, દરેક કાર CNG કન્વર્ઝન માટે યોગ્ય નથી હોતી. સામાન્ય રીતે માત્ર પેટ્રોલ કારોને જ CNG માં બદલી શકાય છે.
આફ્ટરમાર્કેટ CNG ના સૌથી મોટા ગેરફાયદા
CNG કિટ લગાવતાં પહેલાં સૌથી મહત્ત્વપૂર્ણ બાબત કારની કંપની વોરંટી છે. ભલે કિટ સરકાર દ્વારા માન્ય (અપ્રૂવ્ડ) હોય અને ઓથોરાઇઝ્ડ ઇન્સ્ટોલર પાસે લગાવેલી હોય, તેમ છતાં આફ્ટરમાર્કેટ CNG કિટ લગાવવાથી કંપનીની પાવરટ્રેન વોરંટી રદ થઈ શકે છે. કેટલીક કંપનીઓ એન્જિન સિવાયના ભાગો પર વોરંટી ચાલુ રાખી શકે છે, પરંતુ તે સંપૂર્ણપણે કંપની અને તેના નિયમો પર નિર્ભર કરે છે. કેટલાક ઇન્સ્ટોલર થર્ડ-પાર્ટી વોરંટી પણ આપે છે, જોકે તેના માટે વધારે પૈસા ચૂકવવા પડી શકે છે. સામાન્ય રીતે CNG કિટ પર ૧ થી ૨ વર્ષની વોરંટી મળતી હોય છે.
બીજી એક સમસ્યા કારની ડીકી (બૂટ સ્પેસ) ની જગ્યા છે. ફેક્ટરી-ફિટેડ CNG કારોમાં કંપનીઓ અંડરબોડી કે ડ્યુઅલ-ટેન્ક જેવા વિકલ્પો આપી રહી છે, જેનાથી બૂટ સ્પેસ સચવાઈ રહે છે. જ્યારે આફ્ટરમાર્કેટમાં સામાન્ય રીતે મોટો સિંગલ સિલિન્ડર (ટેન્ક) લગાવવામાં આવે છે, જેનાથી ડીકીની ઘણી ખરી જગ્યા રોકાઈ જાય છે.
ઇન્સ્યોરન્સ પર શા માટે અસર થાય છે?
બહારથી CNG કિટ લગાવવાથી તમારી કારના ઇન્સ્યોરન્સ પર અસર પડે છે. આનાથી ઇન્સ્યોરન્સ પ્રીમિયમ થોડું વધી શકે છે અને ઇન્સ્યોરન્સ કંપનીને તેની જાણ કરીને પૉલિસીમાં ફેરફાર કરાવવો અનિવાર્ય બને છે. તેનું કારણ એ છે કે CNG કિટ લાગવાથી કારની કુલ ઇન્સ્યોર્ડ વેલ્યૂ (IDV) વધી જાય છે અને આગ લાગવાનું જોખમ પણ થોડું વધી જાય છે. બહારથી લગાવવામાં આવેલી CNG કિટની કિંમત કારની કુલ કિંમતમાં ઉમેરવામાં આવે છે. ત્યારપછી ઇન્સ્યોરન્સ કંપની તમારી પૉલિસીમાં CNG કિટની વિગત અને તેની કિંમત અપડેટ કરે છે. જો તમે CNG કિટ લગાવ્યાની જાણ તમારી ઇન્સ્યોરન્સ કંપનીને ન કરી હોય અને RTO માંથી કારની RC બુકમાં CNG ની નોંધણી ન કરાવી હોય, તો ભવિષ્યમાં તમારો ઇન્સ્યોરન્સ ક્લેમ રદ થઈ શકે છે. ખાસ કરીને અકસ્માત કે આગથી થતા નુકસાનના કિસ્સામાં ક્લેમ રિજેક્ટ થવાનું જોખમ રહે છે.