"મારી પોતાની કબર ખોદી રહ્યો છું": ટનલમાંથી ઇઝરાયેલી બંધકનો Video હમાસે કર્યો વાયરલ

પેલેસ્ટિનિયન આતંકવાદી સંગઠન હમાસે શનિવારે એક વીડિયો બહાર પાડ્યો જેમાં ઇઝરાયલી બંધક એવ્યતાર ડેવિડ (24) પોતાની કબર ખોદતો જોવા મળે છે. વીડિયોમાં ખૂબ જ નબળા અને થાકેલા લાગે છે. ડેવિડ હિબ્રુ ભાષામાં કહે છે, "હું મારી પોતાની કબર ખોદી રહ્યો છું. મારું શરીર દરરોજ નબળું પડી રહ્યું છે. હું મારી કબર તરફ આગળ વધી રહ્યો છું.

 ડેવિડે કહ્યું, 'આ તે જગ્યા છે જ્યાં મને દફનાવવામાં આવશે. મને મુક્ત થવાનો હજુ પણ સમય છે જેથી હું મારા પરિવાર સાથે મારા પલંગમાં સૂઈ શકું." આ નિવેદનના અંતે, તે રડી પડ્યો.

7 ઓક્ટોબર, 2023 ના રોજ કરાયું હતું અપહરણ 

7 ઓક્ટોબર 2023ના  રોજ દક્ષિણ ઇઝરાયલમાં નોવા મ્યુઝિક ફેસ્ટિવલ પર હુમલા દરમિયાન હમાસે ડેવિડનું અપહરણ કર્યું હતું. તેના પરિવારે એક નિવેદનમાં જણાવ્યું હતું કે ડેવિડ હમાસની સુરંગોમાં એક જીવંત હાડપિંજર બની ગયો છે, જેને જીવતો દફનાવી દેવામાં આવી રહ્યો છે. તેમણે આરોપ લગાવ્યો હતો કે અમારા પુત્રને જાણી જોઈને ભૂખ્યો રાખવામાં આવી રહ્યો છે જેથી તેનો ઉપયોગ હમાસના પ્રચાર અભિયાનમાં થઈ શકે.

ઇઝરાયલી વડા પ્રધાન બેન્જામિન નેતન્યાહૂના કાર્યાલયે જણાવ્યું હતું કે વીડિયો રિલીઝ થયા પછી વડા પ્રધાને ડેવિડના પરિવાર સાથે વાત કરી હતી અને ફૂટેજ પર "ગંભીર આઘાત" વ્યક્ત કર્યો હતો. વડા પ્રધાને પુનરોચ્ચાર કર્યો હતો કે તમામ બંધકોને મુક્ત કરાવવાના સરકારના પ્રયાસો "સતત અને અવિરતપણે" ચાલુ છે.

નેતન્યાહૂએ હમાસ પર "ઇરાદાપૂર્વક આપણા બંધકોને ભૂખે મરવાનો" અને "નિંદાત્મક અને દુષ્ટ રીતે" તેનો પ્રચાર કરવાનો આરોપ મૂક્યો હતો.

ડેવિડના ફૂટેજ ઉપરાંત, હમાસ અને ઇસ્લામિક જિહાદે બીજો એક વિડિયો બહાર પાડ્યો હતો જેમાં 21 વર્ષીય બંધક રોમ બ્રાસ્લાવસ્કી, જે બેવડી જર્મન-ઇઝરાયલી નાગરિકતા ધરાવે છે, તે પણ નબળા દેખાતા હતા. બંને ક્લિપ્સે ઇઝરાયલમાં બંધકોની મુક્તિ માટે નવેસરથી વાટાઘાટો માટે જાહેર હાકલને તીવ્ર બનાવી છે.

બંધકો પર તાત્કાલિક સરકારી કાર્યવાહીની માંગ કરવા માટે શનિવારે સાંજે તેલ અવીવમાં હજારો ઇઝરાયલીઓ એકઠા થયા હતા. યુદ્ધની શરૂઆત પછીની આ રેલી સૌથી મોટી રેલી હતી.

હમાસના હુમલામાં 1219 ઇઝરાયલીઓ માર્યા ગયા

ઉલ્લેખનીય છે કે 7 ઓક્ટોબરના રોજ હમાસ દ્વારા કરવામાં આવેલા હુમલામાં 1219 લોકો માર્યા ગયા હતા, જેમાંથી મોટાભાગના નાગરિકો હતા (સત્તાવાર ઇઝરાયલી આંકડાઓ અનુસાર). આ પછી, ઇઝરાયેલે ગાઝા પટ્ટીમાં લશ્કરી કાર્યવાહી શરૂ કરી, જેમાં અત્યાર સુધીમાં, ગાઝા આરોગ્ય મંત્રાલય અનુસાર, 60332  લોકો મૃત્યુ પામ્યા છે, જેમાંથી મોટાભાગના નાગરિકો છે. સંયુક્ત રાષ્ટ્રએ આ આંકડાઓને વિશ્વસનીય માન્યા છે.