VIDEO : તમિલનાડુમાં 'સિંઘમ'ને ભાજપે કર્યા સાઈડલાઈન? અન્નામલાઈએ કરી સ્પષ્ટતા

તમિલનાડુ વિધાનસભા ચૂંટણી માટે BJPએ ઉમેદવારોની પોતાની પહેલી યાદી જાહેર કરી છે. ભાજપની યાદી જાહેર થતાં રાજ્યના રાજકીય ક્ષેત્રમાં ભારે ગતિવિધિ શરૂ થઈ ગઈ છે. 23 એપ્રિલે યોજાનારી ચૂંટણી માટે ભાજપે 27 ઉમેદવારોના નામ જાહેર કર્યા છે. જોકે, આ યાદીમાંથી આશ્ચર્યજનક રીતે કે. અન્નામલાઈનું નામ બાકાત રાખવામાં આવ્યું છે - જે પાર્ટીના ફાયરબ્રાન્ડ નેતા અને જનતામાં 'સિંઘમ' તરીકે જાણીતા છે.તમિલનાડુમાં ભાજપને છેલ્લા કેટલાક વર્ષોમાં પ્રસિદ્ધ કરવામાં મહત્ત્વનું યોગદાન આપનારા અન્નામલાઈનું નામ ન હોવાથી રાજકીય વિશ્લેષકો માટે આશ્ચર્યજનક મનાય છે.

અન્નામલાઈને બાકાત રાખવામાં આવ્યા

ભાજપે પોતાની યાદીમાં ઘણા અગ્રણી નેતાઓને મેદાનમાં ઉતાર્યા છે. તમિલિસાઈ સુંદરરાજનને માયલાપોર, વનથી શ્રીનિવાસનને કોઈમ્બતુર ઉત્તર માટે અને કેન્દ્રીય મંત્રી એલ. મુરુગનને અવિનાશી માટે ઉમેદવાર તરીકે નામાંકિત કરવામાં આવ્યા છે. જોકે, અન્નામલાઈનું નામ ન હોવાને કારણે રાજકીય વિશ્લેષકો અને પક્ષના કાર્યકરોમાં ચર્ચાનો મુખ્ય વિષય બન્યો છે, કારણ કે તેમને લાંબા સમયથી રાજ્યમાં ભાજપનો અગ્રણી ચહેરો માનવામાં આવે છે. નોંધનીય છે કે પક્ષના નેતૃત્વએ અગાઉ સંકેત આપ્યો છે કે અન્નામલાઈની સંગઠનાત્મક ક્ષમતાઓનો રાષ્ટ્રીય સ્તરે ઉપયોગ કરી શકાય છે. કેન્દ્રીય ગૃહમંત્રી અમિત શાહે પણ અનેક પ્રસંગોએ તેમના કાર્યની પ્રશંસા કરી છે.

X પર જુઓ

આ બાબતે હવે ભાજપના રાષ્ટ્રીય કાર્યકારિણી સભ્ય કે. અન્નામલાઈએ કહ્યું કે, આ ચૂંટણીમાં મારી ભૂમિકા સમગ્ર તમિલનાડુમાં ઉમેદવારો માટે પ્રચાર કરવાની છે. હાલમાં પાર્ટીએ મને 7 તારીખ સુધી પુંડુચેરી અને કેરળમાં પ્રચાર કરવાની જવાબદારી સોંપી છે. 7 તારીખથી 23 તારીખ સુધી મારે તમિલનાડુમાં બધા ભાજપ અને એનડીએ ઉમેદવારો માટે પ્રચાર કરવાનો છે. આ જવાબદારી પાર્ટીએ મને સોંપી છે. હું તે જવાબદારી નિભાવીશ.