VIDEO: ANDAR NI VAAT/ સંભલમાં ગેરકાયદેસર મસ્જિદ અને ઇદગાહ પર ચાલ્યું પ્રશાસનનું બુલડોઝર

ઉત્તર પ્રદેશના સંભલમાં વહીવટી તંત્ર દ્વારા સરકારી જમીન પર બનેલી ગેરકાયદેસર ઇદગાહ અને મસ્જિદ પર બુલડોઝર ફેરવી દેવાની મોટી કાર્યવાહી કરવામાં આવી છે. સંભલ જિલ્લામાં છેલ્લા ઘણા સમયથી ગેરકાયદેસર દબાણો અને બાંધકામો સામે વહીવટી તંત્રની આકરી બુલડોઝર ઝુંબેશ સતત જોવા મળી રહી છે. આ સમગ્ર કાર્યવાહી દરમિયાન સ્થાનિક મુસ્લિમ સમુદાયના લોકો દ્વારા ભારે વિરોધ દર્શાવવામાં આવ્યો હતો. સ્થાનિક રહીશોએ દાવો કર્યો હતો કે આ મસ્જિદ અને ઇદગાહ અહીં છેલ્લા ૬૦ વર્ષથી પણ વધુ સમયથી અસ્તિત્વ ધરાવે છે અને તેની સાથે લોકોની ધાર્મિક આસ્થાઓ જોડાયેલી છે. જો કે, બીજી તરફ જિલ્લા પ્રશાસન અને મહેસૂલ વિભાગ દ્વારા કાયદાકીય કાગળો અને જમીનના રેકોર્ડની ચકાસણી કર્યા બાદ આ બાંધકામ સંપૂર્ણપણે ગેરકાયદેસર સરકારી જમીન પર હોવાનું જાહેર કરવામાં આવ્યું હતું. પ્રશાસને જણાવ્યું કે વારંવાર નોટિસ આપવા છતાં પણ ગેરકાયદેસર દબાણ હટાવવામાં ન આવતા આખરે કાયદાકીય જોગવાઈઓ હેઠળ આ તોડી પાડવાની આકરી કાર્યવાહી હાથ ધરવામાં આવી છે.

આ સંવેદનશીલ કાર્યવાહી દરમિયાન વિસ્તારમાં કોઈ અનિચ્છનીય ઘટના ન બને અને કાયદો અને વ્યવસ્થાની સ્થિતિ બગડે નહીં તે માટે પ્રશાસન દ્વારા ચુસ્ત સુરક્ષા બંદોબસ્ત ગોઠવવામાં આવ્યો હતો. ઘટનાસ્થળે મોટી સંખ્યામાં પોલીસ ફોર્સ, પીએસીના જવાનો અને ઉચ્ચ પોલીસ અધિકારીઓ કાફલા સાથે તૈનાત રહ્યા હતા. સમગ્ર સંભલ વિસ્તારને છાવણીમાં ફેરવી દેવામાં આવ્યો હતો અને સોશિયલ મીડિયા પર પણ બાઝ નજર રાખવામાં આવી રહી છે જેથી કોઈપણ પ્રકારની અફવા ન ફેલાય. વહીવટી તંત્ર દ્વારા સંપૂર્ણ સુરક્ષા કવચ હેઠળ શાંતિપૂર્ણ રીતે આ મોટા પાયાની બુલડોઝર કાર્યવાહીને અંજામ આપવામાં આવ્યો હતો. ઉચ્ચ અધિકારીઓના જણાવ્યા અનુસાર, કાયદો હાથમાં લેવાનો પ્રયાસ કરનાર સામે કડક કાનૂની પગલાં ભરવામાં આવશે.

તો બીજી તરફ ઉત્તર પ્રદેશની સહારનપુર કોર્ટે એક ચુકાદો આપતા કલેક્ટર કચેરી પરિસરમાં સરકારી જમીન પર બનેલી મસ્જિદને તાત્કાલિક ખાલી કરવાનો કડક આદેશ આપ્યો છે. કોર્ટે સ્પષ્ટ કર્યું છે કે સરકારી કચેરીના સંકુલમાં આવેલી સરકારી જમીન પર કોઈપણ પ્રકારનું ધાર્મિક બાંધકામ કાયદેસર ગણી શકાય નહીં. આ વિવાદ લાંબા સમયથી કોર્ટમાં ચાલી રહ્યો હતો, જેમાં તમામ પક્ષોની દલીલો અને કાનૂની દસ્તાવેજોની ચકાસણી કર્યા બાદ ન્યાયાલયે આ મહત્વપૂર્ણ નિર્ણય સંભળાવ્યો છે. કોર્ટના આ આદેશને પગલે સ્થાનિક વહીવટી તંત્રે કાયદો અને વ્યવસ્થા જાળવી રાખવા માટે સુરક્ષા વ્યવસ્થા સઘન બનાવી દીધી છે અને નિયત સમયમર્યાદામાં મસ્જિદ ખાલી કરાવવાની પ્રક્રિયા હાથ ધરી છે. બ્યુરો રિપોર્ટ જીએસટીવી