બિહારમાં કોગ્રેસના કાર્યકરો વચ્ચે છૂટ્ટા હાથે મારામારી, પૂર્વ MLCના માથા પર ઈંટ વાગતા ગંભીર ઈજા

બિહારના ભોજપુર જિલ્લાના આરામાં કોંગ્રેસની મહત્ત્વપૂર્ણ સંગઠનાત્મક બેઠક અને સ્વાગત સમારોહ કાર્યાલયમાં ભારે હોબાળો થયો હતો. આ દરમિયાન, પાર્ટીના બે જૂથો એકબીજા સાથે અથડાયા હતા. બંને જૂથો વચ્ચે મારામારી થઈ હતી.  સમગ્ર ઘટના અખિલ ભારતીય કોંગ્રેસ સમિતિના સચિવ, બિહાર પ્રદેશ કોંગ્રેસ સમિતિના સહ-પ્રભારી અને છત્તીસગઢના ભિલાઈ વિધાનસભાના ધારાસભ્ય દેવેન્દ્ર યાદવના સ્વાગત સમારોહ દરમિયાન બની હતી. 

કોંગ્રેસ કાર્યકર્તાઓ વચ્ચે મારામારી

વીડિયોમાં કાર્યકર્તાઓ વચ્ચેની મારામારી સ્પષ્ટપણે જોઈ શકાય છે, જ્યારે કેટલાક લોકો તેમને ખેંચતા જોવા મળે છે. કોંગ્રેસના કાર્યકરો વચ્ચેના વિવાદ અને લડાઈનો આ વીડિયો ચોંકાવનારો છે. લોકો એકબીજાના કપડાં ખેંચતા જોવા મળી રહ્યા છે. આ પરસ્પર લડાઈમાં ભૂતપૂર્વ MLC અજય સિંહના જૂથના એક 41 વર્ષીય કાર્યકર સુનીલ કુમાર સિંહને માથામાં વાગ્યું હતું. સુનીલ કોંગ્રેસના વરિષ્ઠ કાર્યકર છે.

મારપીટ દરમિયાન કેટલાક લોકોએ સુનીલ કુમારના માથા પર ઈંટથી હુમલો કર્યો. ફ્રેક્ચરને કારણે તેમના માથામાં છ ટાંકા આવ્યા. કોંગ્રેસના કાર્યકરોએ તેમને ઘાયલ હાલતમાં સદર હોસ્પિટલમાં દાખલ કરાયા હતા. 

સૂત્રોચ્ચાર દરમિયાન વિવાદને કારણે લડાઈ થઈ હોવાની જાણકારી 

ઇજાગ્રસ્ત સુનીલ કુમારે જણાવ્યું કે તેઓ ભિલાઈના ધારાસભ્ય દેવેન્દ્ર યાદવને જોવા અને સાંભળવા માટે કોંગ્રેસ કાર્યાલય પહોંચ્યા હતા. દેવેન્દ્રના આગમન પછી, અહીં ઝિંદાબાદના નારા લગાવવામાં આવી રહ્યા હતા.

નવાદા પોલીસ સ્ટેશનના પ્રભારી વિપિન બિહારીએ જણાવ્યું હતું કે સૂત્રોચ્ચાર દરમિયાન થયેલા વિવાદને કારણે આ લડાઈ થઈ હોવાનું જણાવવામાં આવી રહ્યું છે. અરજીના આધારે આગળની કાર્યવાહી કરવામાં આવશે. સુનીલ કુમાર સિંહના પિતા શિવકુમાર સિંહ પાર્ટીના ભૂતપૂર્વ ઉપપ્રમુખ છે અને હાલમાં પીએસીએસ પ્રમુખ છે. સુનીલ કુમાર હિન્દુ મહિલા કોલેજમાં સહાયક ક્લાર્ક છે.