'વાટાઘાટ માટે આવો, નહીં તો પરિણામ માટે તૈયાર રહો', ટ્રમ્પે ફરી એકવાર મોટા હુમલાની આપી ધમકી, 

અમેરિકાના રાષ્ટ્રપતિ ડોનાલ્ડ ટ્રમ્પે છેલ્લા એક વર્ષમાં સમગ્ર વિશ્વમાં તબાહી મચાવી છે. ટેરિફથી લઈને વેનેઝુએલાના રાષ્ટ્રપતિ નિકોલસ માદુરોને અડધી રાતે પથારીમાંથી ઉઠાવી લેવા સુધીના તેમના નિર્ણયોએ દુનિયાને સ્તબ્ધ કરી દીધી છે. હવે, ટ્રમ્પે ફરી એકવાર મોટા હુમલાની ધમકી આપી છે.

ટ્રમ્પે જણાવ્યું હતું કે એક વિશાળ નૌકાદળનો કાફલો ઝડપથી ઈરાન તરફ આગળ વધી રહ્યો છે. આ કાફલો તાકાત, ઉત્સાહ અને સ્પષ્ટ હેતુ સાથે આગળ વધી રહ્યો છે. આ કાફલો વિશાળકાય શિપ અબ્રાહમ લિંકનના નેતૃત્વમાં વેનેઝુએલામાં મોકલવામાં આવેલા કાફલા કરતા પણ મોટો છે.

ટ્રમ્પે જણાવ્યું હતું કે, વેનેઝુએલાની જેમ આ કાફલો સંપૂર્ણપણે સક્ષમ છે અને જરૂરિયાત પડવા પર અત્યંત ગતિ સાથે મિશનને પાર પાડવામાં અચકાશે નહીં. તેમણે આશા વ્યક્ત કરી હતી કે, ઈરાન ટૂંક સમયમાં વાટાઘાટોના ટેબલ પર આવશે અને એક વાજબી અને સંતુલિત કરાર માટે વાટાઘાટો કરશે. પરમાણુ શસ્ત્રો વિનાની સમજૂતિ કે જે તમામ પક્ષો માટે ફાયદાકારક છે. સમય પસાર થઈ રહ્યો છે અને પરિસ્થિતિ એક નિર્ણાયક તબક્કે છે.

યુએસ રાષ્ટ્રપતિએ જણાવ્યું હતું કે તેમણે અગાઉ ઈરાનને સોદો કરવા વિનંતી કરી હતી, પરંતુ તેઓએ તેમ કર્યું નહીં. પરિણામ ઓપરેશન મિડનાઈટ હેમર હતું, જેના પરિણામે ઈરાન માટે ભારે વિનાશ થયો. આગામી હુમલો વધુ વિનાશક હશે. આવું ફરીથી થવા દેશો નહીં. આ ગંભીર બાબત પર ધ્યાન આપવા બદલ આભાર.

એ નોંધવું જોઈએ કે ગયા વર્ષે જૂનમાં, અમેરિકાએ ઈરાન સામે તેનું સૌથી ઝડપી અને સૌથી ખતરનાક લશ્કરી ઓપરેશન, "ઓપરેશન મિડનાઈટ હેમર" સફળતાપૂર્વક હાથ ધર્યું હતું. આ કાર્યવાહીમાં માત્ર 25 મિનિટમાં ત્રણ મુખ્ય ઈરાની પરમાણુ સ્થળોને નિશાન બનાવવામાં આવ્યા હતા. યુએસ વાયુસેનાએ ફોર્ડો, નાતાન્ઝ અને ઇસ્ફહાનમાં ત્રણ ઈરાની પરમાણુ સ્થળો પર હવાઈ હુમલા કર્યા હતા. આ હુમલાઓ 7 સ્ટીલ્થ બી-2 બોમ્બરનો ઉપયોગ કરીને કરવામાં આવ્યા હતા, જેમાં 12 ભારે બોમ્બ ફેંકવામાં આવ્યા હતા. આ અત્યંત ગુપ્ત લશ્કરી મિશનમાં 125 થી વધુ વિમાનોનો સમાવેશ થતો હતો. એક ખાસ પ્લાનિંગ સાથે ચાલબાજી સાથે રણનીતિ અપનાવી હતી.