પાકિસ્તાનના રાવલપિંડી સ્ટેડિયમની બહાર હથિયારો સાથે શંકાસ્પદ વ્યક્તિની ધરપકડ, ચેમ્પિયન્સ ટ્રોફીમાં સુરક્ષા સામે સવાલ

પાકિસ્તાનના રાવલપિંડી ક્રિકેટ સ્ટેડિયમ નજીક કાયદા અમલીકરણ એજન્સીઓએ એક સશસ્ત્ર શંકાસ્પદ વ્યક્તિની ધરપકડ કરી. સ્ટેડિયમથી માત્ર 1 કિલોમીટર દૂર ફૈઝાબાદમાં લોડેડ હથિયાર સાથે સજ્જ શંકાસ્પદ વ્યક્તિની ધરપકડ કરવામાં આવી હતી. આ ધરપકડ સાથે, પાકિસ્તાનમાં યોજાઈ રહેલી ICC ચેમ્પિયન્સ ટ્રોફી 2025 ની સુરક્ષા અંગે ચિંતાઓ વધી ગઈ છે. આ ઘટના એ દિવસે બની જ્યારે યજમાન પાકિસ્તાન રાવલપિંડીમાં બાંગ્લાદેશનો સામનો કરવાનો હતો, પરંતુ વરસાદને કારણે મેચ રદ કરવામાં આવી હતી.

ધરપકડ કરાયેલ વ્યક્તિનું નામ હઝરત જમાલ છે, જે પાકિસ્તાનના પેશાવરનો રહેવાસી હોવાનું કહેવાય છે. લોડેડ હથિયારની સાથે જમાલે બુલેટપ્રૂફ જેકેટ પણ પહેર્યું હતું. પોલીસ પૂછપરછ દરમિયાન હઝરત જમાલે જણાવ્યું કે તેણે પોતાના દુશ્મનોથી પોતાને બચાવવા માટે બુલેટપ્રૂફ જેકેટ પહેર્યું હતું. તપાસ દરમિયાન જમાલના જેકેટમાંથી કોઈપણ પ્રકારનો વિસ્ફોટક મળી આવ્યો ન હતો.

પાકિસ્તાન સુરક્ષા એજન્સી હાઈ એલર્ટ પર છે.

શંકાસ્પદ વ્યક્તિની ધરપકડ સાથે પોલીસ અધિકારીઓ કોઈપણ સંભવિત સુરક્ષા જોખમોને ધ્યાનમાં રાખીને તેમની તપાસ ચાલુ રાખી રહ્યા છે. તમને જણાવી દઈએ કે ICC ચેમ્પિયન્સ ટ્રોફી 2025 ના કારણે રાવલપિંડીમાં કડક સુરક્ષા વચ્ચે આ ધરપકડ કરવામાં આવી છે. ICC ઇવેન્ટને કારણે, સમગ્ર પાકિસ્તાનમાં સુરક્ષા એજન્સીઓ હાઇ એલર્ટ પર છે. આ ઘટના બાદ, એજન્સીઓએ સ્ટેડિયમ તેમજ શહેરના મુખ્ય સ્થળોની આસપાસ પેટ્રોલિંગ અને દેખરેખ વધારી દીધી છે.

તમને જણાવી દઈએ કે ચેમ્પિયન્સ ટ્રોફી દરમિયાન બે વાર સુરક્ષામાં મોટી ખામી જોવા મળી હતી. પહેલી વાર, ન્યુઝીલેન્ડ અને બાંગ્લાદેશ વચ્ચેની મેચમાં, રચિન રવિન્દ્ર પાસે એક દર્શક મેદાન પર એક કટ્ટરપંથી નેતાનો ફોટો લઈને આવ્યો. બીજી ઘટના ઈંગ્લેન્ડ અને અફઘાનિસ્તાન વચ્ચેની મેચની છે જ્યારે એક દર્શક એક ખેલાડીને ગળે લગાવવાનો પ્રયાસ કરતો જોવા મળ્યો હતો. આ જ કારણ છે કે ટુર્નામેન્ટ દરમિયાન સુરક્ષા અંગે ચિંતાઓ વધી ગઈ છે.