અમેરિકામાં ફરી ફાયરિંગ, આ વખતે વૉટર પાર્ક બન્યો નિશાન... 2 બાળકો સહિત 8 લોકો ઘાયલ

શનિવારે અમેરિકાના મિશિગન રાજ્યના સૌથી મોટા શહેર ડેટ્રોઇટ પાસેના વૉટર પાર્કમાં ગોળીબારમાં બે બાળકો સહિત આઠ લોકો ઘાયલ થયા હતા. રોચેસ્ટર હિલ્સમાં ચિલ્ડ્રન વૉટર પાર્કમાં ગોળીબાર થયો હતો. ઓકલેન્ડ કાઉન્ટીના શેરિફ માઈકલ બાઉચાર્ડે જણાવ્યું હતું કે, ગોળીબાર બાદ બંદૂકધારી નજીકના ઘરમાં છુપાઈ ગયો હતો. પોલીસે ઘરને ઘેરી લીધું અને અંદર પ્રવેશતા જ શંકાસ્પદ વ્યક્તિ મૃત જોવા મળ્યો. ફાયરિંગમાં ઘાયલ થયેલા બાળકો અને અન્ય લોકોને હોસ્પિટલમાં દાખલ કરવામાં આવ્યા છે.

ઓકલેન્ડ કાઉન્ટી પોલીસના જણાવ્યા મુજબ, શંકાસ્પદ શનિવારે સાંજે 5 વાગ્યાની આસપાસ રોચેસ્ટર હિલ્સમાં ઓબર્ન સ્પ્લેશ પેડ પર પહોંચ્યો અને તેણે ગોળીબાર શરૂ કર્યો. શેરિફ માઈકલ બાઉચાર્ડે જણાવ્યું હતું કે, હુમલાખોરે 9 એમએમ સેમી-ઓટોમેટિક ગ્લોકમાંથી લગભગ 28 રાઉન્ડ ફાયરિંગ કર્યું હતું. ઘટનાસ્થળેથી એક બંદૂક અને ત્રણ ખાલી મેગેઝીન મળી આવ્યા હતા. એવું માનવામાં આવે છે કે, આ બંદૂકમાંથી ગોળી ચલાવવામાં આવી હતી.

પોલીસે ઘટનાસ્થળે લોકોની અવરજવર અટકાવી દીધી છે. અધિકારીઓએ કહ્યું કે, ખતરો હજુ પણ યથાવત છે. રોચેસ્ટર હિલ્સના મેયર બ્રાયન કે. બાર્નેટે કહ્યું કે, પોલીસે હુમલાના સ્થળને સુરક્ષિત કરી લીધું છે. અમે દરેકની ધીરજની પ્રશંસા કરીએ છીએ. ફાયરિંગની આ ઘટનામાં ઘાયલ થયેલા તમામ લોકો માટે પ્રાર્થના. અમારી પાસે માહિતી હોવાથી અમે વધુ અપડેટ્સ શેર કરીશું. રોચેસ્ટર હિલ્સ ડેટ્રોઇટથી લગભગ 27 માઇલ ઉત્તરે છે.

ગવર્નર ગ્રેચેન વ્હીટમેરે ટ્વિટર પર એક નિવેદનમાં જાહેરાત કરી હતી કે, તે ગોળીબાર બાદ સ્થાનિક અધિકારીઓના સંપર્કમાં હતી. તેણે લખ્યું, 'રોચેસ્ટર હિલ્સમાં શૂટિંગ વિશે જાણીને મારું હૃદય દુખી થઈ ગયું છે. અમે પરિસ્થિતિ પર નજર રાખી રહ્યા છીએ અને સ્થાનિક અધિકારીઓના સંપર્કમાં છીએ. ઉલ્લેખનીય છે કે, 2021માં રોચેસ્ટર હિલ્સથી 15 માઈલ ઉત્તરમાં સ્થિત ઓક્સફોર્ડની એક હાઈસ્કૂલમાં ગોળીબારની ઘટના બની હતી, જેમાં ચાર વિદ્યાર્થીઓના મોત થયા હતા.