યુક્રેનમાં ઝાડ નીચે કેટલા સૈનિકો છુપાયા છે તે પણ રશિયા અવકાશમાંથી જોઈ શકશે... સેટેલાઇટ કર્યો લોન્ચ

યુક્રેન યુદ્ધ વચ્ચે રશિયાએ પોતાની અવકાશી દેખરેખ (Satellite Surveillance) ક્ષમતા વધારવાની દિશામાં નવું પગલું ભર્યું છે. રશિયાએ 14 નવેમ્બર, 2026ના રોજ વોસ્તોચની કોસ્મોડ્રોમથી સોયુઝ રોકેટની મદદથી 'કોએન' (Koen) નામનો નવો અર્થ ઓબ્ઝર્વેશન સેટેલાઇટ લોન્ચ કર્યો છે. આ સેટેલાઇટની ઇમેજ રેઝોલ્યુશન 50 સેન્ટીમીટર પ્રતિ પિક્સલ હોવાનો દાવો કરવામાં આવ્યો છે. આ ટેકનોલોજીથી જમીન પરની વસ્તુઓની વધુ સ્પષ્ટ તસવીરો મેળવી શકાશે.
ઝાડ પાસે છુપાયેલા સૈનિકો અને વાહનો પર નજર?
ખાનગી કંપની MT-Lab દ્વારા વિકસાવવામાં આવેલા આ સેટેલાઇટમાં આર્ટિફિશિયલ ઇન્ટેલિજન્સ (AI) અલ્ગોરિધમનો ઉપયોગ કરવામાં આવ્યો હોવાના અહેવાલ છે. આ ટેકનોલોજી સેટેલાઇટ દ્વારા લેવામાં આવેલી તસવીરોનું વિશ્લેષણ કરી શકે છે. તેના આધારે ઝાડ પાસે છુપાયેલા સૈનિકોના જૂથો, વાહનો અને તેમની અવરજવરના માર્ગ ઓળખવામાં મદદ મળી શકે છે. જોકે, યુક્રેન યુદ્ધમાં આ સેટેલાઇટનો સીધો સૈન્ય ઉપયોગ કરવામાં આવશે કે નહીં તેની સત્તાવાર પુષ્ટિ થઈ નથી.
50 સેન્ટીમીટર રેઝોલ્યુશનનો શું અર્થ?
50 સેન્ટીમીટર પ્રતિ પિક્સલના રેઝોલ્યુશનનો અર્થ એ છે કે સેટેલાઇટ જમીન પર આશરે અડધા મીટરના કદની વસ્તુઓની તસવીરો મેળવી શકે છે. તેમાં વાહનો, મોટા સાધનો અને વિવિધ માળખાં જેવી વસ્તુઓને વધુ સ્પષ્ટ રીતે ઓળખી શકાય છે. જોકે, આટલા રેઝોલ્યુશનથી દરેક વ્યક્તિ કે સૈનિકને ચોક્કસ રીતે ઓળખી શકાય તેવું જરૂરી નથી.
નાગરિક ઉપયોગ માટે પણ સેટેલાઇટ ઉપયોગી
અહેવાલો અનુસાર, આ સેટેલાઇટ મુખ્યત્વે નાગરિક ઉપયોગ (Civilian Purpose) માટે વિકસાવવામાં આવ્યો છે. તે દર વર્ષે આશરે 1.5 કરોડ ચોરસ કિલોમીટર વિસ્તારની તસવીરો લઈ શકશે. તેની તસવીરોનો વિસ્તાર આશરે 12 કિલોમીટર પહોળો હોવાનું જણાવાયું છે. આ સેટેલાઇટ દ્વારા કૃષિ, પર્યાવરણ, જમીનના ઉપયોગ અને અન્ય નાગરિક ક્ષેત્રોમાં પણ માહિતી મેળવવામાં મદદ મળી શકે છે. જોકે, તેની હાઈ-રિઝોલ્યુશન તસવીરો અને AI આધારિત વિશ્લેષણની ક્ષમતાને કારણે યુદ્ધ અને સુરક્ષા ક્ષેત્રે તેના સંભવિત ઉપયોગ અંગે પણ ચર્ચા થઈ રહી છે.




