'પુતિનના કટ્ટર નવલનીને દેડકાનું ઝેર અપાયું', 5 યુરોપિયન દેશોએ રશિયા પર લગાવ્યા ગંભીર આરોપ

રશિયન વિપક્ષી નેતા અને રાષ્ટ્રપતિ વ્લાદિમીર પુતિનના સૌથી કટ્ટર વિરોધી, એલેક્સી નવલનીના મોત અંગે ફરી એકવાર આંતરરાષ્ટ્રીય વિવાદ શરૂ થયો છે. બ્રિટન, ફ્રાન્સ, જર્મની, સ્વીડન અને નેધરલેન્ડ્સે એક સંયુક્ત નિવેદન બહાર પાડીને દાવો કર્યો છે કે નવલનીને સખત ઝેર "એપિબેટીડાઇન" આપવામાં આવ્યું હતું. આ ઝેર દક્ષિણ અમેરિકાના કેટલાક જંગલી દેડકાઓમાંથી કાઢવામાં આવે છે. તેને અત્યંત ખતરનાક માનવામાં આવે છે.

આ દેશોએ જણાવ્યું છે કે નવલનીના શરીરમાંથી લેવામાં આવેલા નમૂનાઓના વૈજ્ઞાનિક પરીક્ષણોએ આ ઝેરની હાજરીની પુષ્ટિ કરી છે. તેઓ માને છે કે આવા હુમલા માટે જરૂરી સંસાધનો, હેતુ અને આંતરરાષ્ટ્રીય નિયમોની અવગણના કરવાની ક્ષમતા ફક્ત રશિયન સરકાર પાસે જ હોઈ શકે છે. 
 
યુરોપીય દેશોએ રશિયા પર રાસાયણિક શસ્ત્રો સંધિનું ઉલ્લંઘન કરવાનો આરોપ લગાવ્યો છે અને આ મામલાને રાસાયણિક શસ્ત્રો નિષેધ સંગઠન (OPCW) સમક્ષ ઉઠાવવાની વાત કરી છે.

ફેબ્રુઆરી 2024 માં આર્કટિક પ્રદેશમાં એક નિર્વાસિત વસાહતમાં એલેક્સી નવલની મૃત હાલતમાં મળી આવ્યા હતા. તેઓ ૧૯ વર્ષની સજા ભોગવી રહ્યા હતા, જેને નવલનીએ રાજકીય રીતે પ્રેરિત ગણાવી હતી. નવલની લાંબા સમયથી રશિયામાં ભ્રષ્ટાચાર અને રાષ્ટ્રપતિ વ્લાદિમીર પુતિનની નીતિઓના કટ્ટર ટીકાકાર રહ્યા છે. તેમની પત્ની યુલિયા નવલનાયાએ અગાઉ પ્રયોગશાળા પરીક્ષણોમાં પુષ્ટિ આપી હતી કે તેમને ઝેર આપવામાં આવ્યું હતું અને પુતિનને જવાબદાર બતાવ્યા હતા. 

રશિયન સરકાર તરફથી હજુ સુધી યુરોપના આરોપોનો જવાબ આપ્યો નથી. આ નવો આરોપ રશિયા અને યુરોપિયન દેશો વચ્ચે રાજદ્વારી તણાવને વધુ વધારી શકે છે.