PM મોદી ડિસેમ્બરમાં અમેરિકાની મુલાકાતની અટકળો વધી, રાષ્ટ્રપતિ ટ્રમ્પ સાથે થઈ શકે છે મુલાકાત!
છેલ્લું અપડેટ : 23 Sept 2026
ડિસેમ્બરમાં વડાપ્રધાન નરેન્દ્ર મોદીની અમેરિકા મુલાકાત અંગેની અટકળો તેજ બની છે. જો વડાપ્રધાન મોદી અમેરિકાની મુલાકાત લેશે, તો તેઓ ફ્લોરિડામાં યોજાનારી G20 સમિટમાં ભાગ લેશે. વર્ષ 2026ની G20 નેતાઓ માટેની સમિટ 14 અને 15 ડિસેમ્બરે 'ટ્રમ્પ નેશનલ ડોરલ મિયામી' ખાતે યોજાનાર છે, જેનું યજમાનપદ અમેરિકાના રાષ્ટ્રપતિ ડોનાલ્ડ ટ્રમ્પ સંભાળશે. અમેરિકી રાજદૂત સર્જિયો ગોરે પણ જણાવ્યું છે કે ડિસેમ્બરમાં G20 માટે વડાપ્રધાન મોદી અમેરિકાની મુલાકાત લે તેવી અપેક્ષા છે. જોકે, ભારતના વિદેશ મંત્રાલયે વડાપ્રધાન મોદીની અમેરિકા મુલાકાત અંગે હજુ સુધી કોઈ સત્તાવાર જાહેરાત કરી નથી.
કેનેડાની મુલાકાત કન્ફોર્મ
જો વડાપ્રધાન મોદી ફ્લોરિડાની મુલાકાત લે છે, તો ટ્રમ્પ સાથે દ્વિપક્ષીય બેઠક પણ થઈ શકે છે. G20 દરમિયાન 'ક્વોડ' (Quad) સમિટ યોજવાની તૈયારીઓ પણ ચાલી રહી છે. ત્યારબાદ વડાપ્રધાન મોદીની કેનેડા મુલાકાત અંગે પણ ચર્ચા થઈ રહી છે. કેનેડાના વડાપ્રધાન માર્ક કાર્નીએ જણાવ્યું છે કે તેમની જાણકારી મુજબ વડાપ્રધાન મોદી G20ના સમયગાળા દરમિયાન કેનેડાની મુલાકાત લેશે, જોકે તારીખો હજુ નક્કી કરવામાં આવી નથી. અહેવાલો અનુસાર, બંને દેશો વચ્ચે વેપાર કરારને આખરી ઓપ આપવાના પ્રયાસો કરવામાં આવી રહ્યા છે.
પીએમ મોદી UNGAમાં સામેલ નહીં; જયશંકર ભારતીય પ્રતિનિધિમંડળનું નેતૃત્વ કરશે
ન્યૂયોર્કમાં હાલમાં સંયુક્ત રાષ્ટ્ર મહાસભા (UNGA)નું ૮૧મું સત્ર ચાલી રહ્યું છે, પરંતુ વડાપ્રધાન મોદી આ વખતે તેમાં હાજર રહ્યા નથી. વિદેશ મંત્રી એસ. જયશંકર ભારતીય પ્રતિનિધિમંડળનું નેતૃત્વ કરી રહ્યા છે. તેઓ ૨૬ સપ્ટેમ્બરે UNGAના ઉચ્ચ-સ્તરીય સત્રને સંબોધિત કરશે અને તેમની મુલાકાત દરમિયાન વિવિધ દ્વિપક્ષીય તથા બહુપક્ષીય બેઠકોમાં પણ ભાગ લેશે.
પીએમ મોદીએ છેલ્લે ક્યારે અમેરિકાની મુલાકાત લીધી હતી?
પીએમ મોદીની અમેરિકાની છેલ્લી મુલાકાત ફેબ્રુઆરી ૨૦૨૫માં થઈ હતી. ૧૩ ફેબ્રુઆરી ૨૦૨૫ના રોજ, વોશિંગ્ટન ડી.સી.ની તેમની સત્તાવાર કાર્યકારી મુલાકાત દરમિયાન યુએસ પ્રમુખ ડોનાલ્ડ ટ્રમ્પે પીએમ મોદીની યજમાની કરી હતી. વડાપ્રધાન કાર્યાલય દ્વારા જાળવવામાં આવતા સત્તાવાર મુલાકાત કાર્યક્રમ મુજબ, ફેબ્રુઆરી ૨૦૨૫ પછી મોદીની કોઈ પણ અમેરિકા મુલાકાતની નોંધ નથી.
