‘વિકાસશીલ દેશોને જવાબદાર ન ઠેરવો’, કાર્બન ઉત્સર્જન મુદ્દે PM મોદીએ વિશ્વને સંભળાવી વાત

વડાપ્રધાન નરેન્દ્ર મોદીએ શનિવારે નવી દિલ્હીના વિજ્ઞાન ભવન ખાતે નેશનલ ગ્રીન ટ્રિબ્યુનલ (NGT) દ્વારા આયોજિત ‘ધ ફ્યુચર ઓફ એન્વાયર્નમેન્ટ એન્ડ ક્લાઇમેટ ડાયનેમિક્સ’ આંતરરાષ્ટ્રીય પરિષદને સંબોધિત કરી હતી. આ બે દિવસીય પરિષદ 19 અને 20 સપ્ટેમ્બરે યોજાઈ રહી છે, જેમાં પર્યાવરણ અને આબોહવા પરિવર્તન સાથે જોડાયેલા પડકારો પર ચર્ચા થઈ રહી છે.

વિકાસશીલ દેશો પર ખોટો દોષ ન નાખવા અપીલ

PM મોદીએ પોતાના સંબોધનમાં જણાવ્યું કે વિકાસશીલ દેશો પર વૈશ્વિક કાર્બન ઉત્સર્જનની જવાબદારી ઘણી વખત વધુ પ્રમાણમાં નાખવામાં આવે છે. તેમણે કહ્યું કે ભારતનું પ્રતિ વ્યક્તિ કાર્બન ઉત્સર્જન વૈશ્વિક સરેરાશના અડધાથી પણ ઓછું છે. તેમના જણાવ્યા મુજબ, આબોહવા સંકટનો સામનો કરવા માટે જવાબદારી અને પ્રયાસોમાં સમાનતા જરૂરી છે.

ભારતની રિન્યુએબલ એનર્જીમાં પ્રગતિનો ઉલ્લેખ

વડાપ્રધાને પર્યાવરણ સંરક્ષણ અને રિન્યુએબલ એનર્જીના ક્ષેત્રમાં ભારત દ્વારા કરવામાં આવેલા પ્રયાસોનો પણ ઉલ્લેખ કર્યો હતો. તેમણે સૌર ઊર્જા સહિત સ્વચ્છ ઊર્જાના વિસ્તરણ અને પર્યાવરણ સાથે વિકાસને સંતુલિત રાખવાના ભારતના અભિગમ પર ભાર મૂક્યો હતો.

પેરિસ કરારની પ્રતિબદ્ધતાઓનો ઉલ્લેખ

PM મોદીએ જણાવ્યું કે ભારતે પેરિસ આબોહવા કરાર હેઠળ નક્કી કરેલા કેટલાક લક્ષ્યો સમયમર્યાદા પહેલાં હાંસલ કર્યા છે. તેમણે પર્યાવરણ સંરક્ષણ માટે ભારતના પ્રયાસોને વૈશ્વિક સ્તરે સહયોગ અને જવાબદારી સાથે જોડવાની જરૂરિયાત પર ભાર મૂક્યો હતો.

17 દેશોના પ્રતિનિધિઓ પરિષદમાં જોડાયા

NGT દ્વારા આયોજિત આ પરિષદમાં ભારત ઉપરાંત 17 દેશોના ન્યાયિક પ્રતિનિધિઓ અને પર્યાવરણ ક્ષેત્રના નિષ્ણાતો ભાગ લઈ રહ્યા છે. પરિષદમાં આબોહવા પરિવર્તન, પર્યાવરણીય ન્યાય, જૈવવિવિધતા અને ટકાઉ ઊર્જા જેવા મુદ્દાઓ પર ચર્ચા માટે વિવિધ સત્રોનું આયોજન કરવામાં આવ્યું છે.

પર્યાવરણીય ન્યાય અને સહયોગ પર ભાર

પરિષદનો હેતુ પર્યાવરણ સંબંધિત કાયદા, નીતિ અને તેના અમલીકરણમાં રહેલી ખામીઓ પર ચર્ચા કરવાનો છે. સાથે જ વિવિધ દેશોની ન્યાયિક પદ્ધતિઓ, વૈજ્ઞાનિક જ્ઞાન અને પર્યાવરણ વ્યવસ્થાપનના અનુભવોનું આદાન-પ્રદાન કરીને સંસ્થાગત સહયોગ મજબૂત કરવાનો પણ હેતુ છે.