VIDEO: હવે, ઈરાનમાં મોકલાશે સ્પેશિયલ ફોર્સ! પરમાણુ મટિરિયલ જપ્ત કરવાનો અમેરિકા-ઈઝરાયેલનો પ્લાન
છેલ્લું અપડેટ : 08 Mar 2026
અમેરિકા અને ઈઝરાયેલે ઈરાનના ઉચ્ચ સંવર્ધિત (Enriched) યુરેનિયમને પોતાના કબજામાં લેવા માટે એક ખાસ સૈન્ય વિકલ્પ પર ચર્ચા શરૂ કરી છે. ભવિષ્યમાં બંને દેશો ઈરાનમાં સ્પેશિયલ ફોર્સ મોકલવા પર વિચાર કરી શકે છે. આ મિશનનો હેતુ ઈરાન પાસે રહેલા અંદાજે 450 કિલોગ્રામ 60% સંવર્ધિત યુરેનિયમને જપ્ત કરવાનો હશે.
અમેરિકી રાષ્ટ્રપતિ ડોનાલ્ડ ટ્રમ્પ પહેલા જ સ્પષ્ટ કરી ચૂક્યા છે કે ઈરાનને કોઈપણ સંજોગોમાં પરમાણુ હથિયાર મેળવવા દેવામાં આવશે નહીં. નિષ્ણાતોનું કહેવું છે કે 60% સુધી સંવર્ધિત યુરેનિયમને ખૂબ જ ઓછા સમયમાં 90% સુધી પહોંચાડી શકાય છે, જે પરમાણુ હથિયાર બનાવવા માટે જરૂરી સ્તર માનવામાં આવે છે. આ જ કારણ છે કે અમેરિકા અને ઈઝરાયેલ આ જથ્થાને મોટો ખતરો માની રહ્યા છે.
સૂત્રોના દ્વારા જાણવા મળ્યું છે કે જો આ મિશન શરૂ થાય છે, તો અમેરિકી અથવા ઈઝરાયેલી સૈનિકોએ સીધા ઈરાનની ધરતી પર ઉતરવું પડી શકે છે. તેમને કડક સુરક્ષા ધરાવતા ભૂગર્ભ પરમાણુ મથકો સુધી પહોંચીને ત્યાં રહેલા યુરેનિયમને કબજે કરવું પડશે. જોકે, હજુ એ નક્કી નથી કે આ ઓપરેશન અમેરિકા કરશે, ઈઝરાયેલ કરશે કે બંને મળીને તેને અંજામ આપશે.
ઈરાનમાં ક્યારે કરવામાં આવશે સ્પેશિયલ ઓપરેશન?
એવું કહેવામાં આવી રહ્યું છે કે આ પગલું ત્યારે જ ઉઠાવવામાં આવશે જ્યારે બંને દેશોને ખાતરી થશે કે ઈરાની સેના આ મિશનમાં સામેલ સૈનિકો માટે મોટો ખતરો નહીં બને. એટલે કે આ ઓપરેશન ત્યારે જ થશે જ્યારે જમીન પરની સ્થિતિ અમુક અંશે નિયંત્રણમાં હોય. રિપોર્ટ મુજબ, અમેરિકી વિદેશ મંત્રી માર્કો રુબિયોને તાજેતરમાં કોંગ્રેસમાં એક બ્રીફિંગ દરમિયાન ઈરાનના સંવર્ધિત યુરેનિયમને સુરક્ષિત કરવા અંગે પૂછવામાં આવતા તેમણે કહ્યું હતું કે, અંતે કોઈએ ત્યાં જઈને તેને મેળવવું જ પડશે.
ઈરાનમાં ઘૂસીને સ્પેશિયલ ફોર્સ શું કરશે?
એક ઈઝરાયેલી સંરક્ષણ અધિકારીએ પણ જણાવ્યું કે ટ્રમ્પ વહીવટીતંત્ર ઈરાનમાં ખાસ સૈન્ય મિશન માટે સ્પેશિયલ ઓપરેશન યુનિટ મોકલવાના વિકલ્પ પર ગંભીરતાથી વિચાર કરી રહ્યું છે. એક અમેરિકી અધિકારીના જણાવ્યા અનુસાર, આ મિશન માટે બે શક્યતાઓ પર ચર્ચા થઈ છે:
પહેલો વિકલ્પ: યુરેનિયમને સંપૂર્ણપણે ઈરાનની બહાર કાઢી લેવામાં આવે.
બીજો વિકલ્પ: પરમાણુ નિષ્ણાતોને ઘટનાસ્થળે મોકલીને ત્યાં જ તેની સંવર્ધન ક્ષમતા ઘટાડી દેવામાં આવે.
એવી સંભાવના છે કે આ મિશનમાં સ્પેશિયલ ફોર્સની સાથે પરમાણુ વૈજ્ઞાનિકો પણ સામેલ હોય. જેમાં આંતરરાષ્ટ્રીય પરમાણુ ઉર્જા એજન્સી (IAEA)ના નિષ્ણાતો પણ હોઈ શકે છે. અધિકારીઓનું કહેવું છે કે જમીન પર મોટા પાયે સેના મોકલવાની કોઈ યોજના નથી. આ કોઈ મોટા યુદ્ધ જેવું અભિયાન નહીં હોય, પરંતુ નાના અને અત્યંત ચોકસાઈપૂર્વકના સ્પેશિયલ ઓપરેશન મિશન હશે.
