VIDEO: મેક્રોને ઈરાની રાષ્ટ્રપતિ સાથે કરી વાત, કહ્યું- "યુદ્ધ તરત જ રોકો, નહીં તો..."

મિડલ ઈસ્ટમાં ચાલી રહેલા યુદ્ધની અસર વિશ્વના અન્ય ઘણા દેશો પર પણ પડી રહી છે. સ્ટ્રેટ ઓફ હોર્મુઝ (હોર્મુઝની સામુદ્રધુની) બંધ થવાને કારણે તેલ અને ગેસ સિલિન્ડરના ભાવ આસમાને પહોંચી રહ્યા છે. આ દરમિયાન ફ્રાન્સના રાષ્ટ્રપતિ ઈમેન્યુઅલ મેક્રોને ઈરાની રાષ્ટ્રપતિ મસૂદ પેઝેશ્કિયન સાથે વાત કરી છે અને તેમને તાત્કાલિક યુદ્ધ રોકવા અપીલ કરી છે.

આ પણ વાંચો :

"ઈરાને આ એક શરત તો માનવી જ પડશે"- મિડલ ઈસ્ટમાં તણાવ વચ્ચે સીઝફાયર મુદ્દે ટ્રમ્પનું મોટું નિવેદન

VIDEO : ઈરાની હુમલામાં નેતન્યાહુના મોતની અફવા પર ઈઝરાયેલ સરકારે તોડ્યું મૌન

ઈમેન્યુઅલ મેક્રોએ સોશિયલ મીડિયા પ્લેટફોર્મ X (ટ્વિટર) પર એક પોસ્ટ દ્વારા પેઝેશ્કિયન સાથે થયેલી વાતચીતની વિગતો આપી છે. તેમણે પોતાની પોસ્ટમાં શાંતિ અને સુરક્ષા પર ભાર મૂક્યો હતો.

ફ્રાન્સના રાષ્ટ્રપતિએ ચેતવણી આપી છે કે જો આ યુદ્ધ રોકવામાં નહીં આવે તો આગામી સમયમાં ઈરાન સહિત સમગ્ર વિશ્વએ તેની ભારે કિંમત ચૂકવવી પડશે. તેમણે ઈરાની રાષ્ટ્રપતિ પેઝેશ્કિયનને સ્ટ્રેટ ઓફ હોર્મુઝ સંપૂર્ણપણે ખોલવા માટે પણ જણાવ્યું હતું.

તરત જ યુદ્ધ રોકવાની અપીલ

ઈમેન્યુઅલ મેક્રોને લખ્યું, 'મેં હમણાં જ ઈરાની રાષ્ટ્રપતિ મસૂદ પઝેશ્કિયન સાથે વાત કરી છે. મેં તેમને અપીલ કરી છે કે ઈરાન દ્વારા પ્રત્યક્ષ અને પરોક્ષ રીતે લેબનોન અને ઈરાક સહિતના પ્રાદેશિક દેશો પર કરવામાં આવી રહેલા અસ્વીકાર્ય હુમલાઓને તરત જ રોકવામાં આવે. મેં તેમને યાદ અપાવ્યું કે ફ્રાન્સ પોતાના હિતો, તેના પ્રાદેશિક ભાગીદારો અને દરિયાઈ અવરજવરની સ્વતંત્રતાના રક્ષણના હેતુથી એક રચનાત્મક માળખા હેઠળ કામ કરી રહ્યું છે અને અમારા દેશને નિશાન બનાવવું સ્વીકાર્ય નથી.'

'આગામી વર્ષોમાં ગંભીર પરિણામો...'

મેક્રોને આગળ ચેતવણી આપતા કહ્યું, 'આપણે જે બેકાબૂ તણાવ જોઈ રહ્યા છીએ, તે સમગ્ર ક્ષેત્રને અરાજકતા તરફ ધકેલી રહ્યો છે, જેના આજે અને આગામી વર્ષોમાં ગંભીર પરિણામો આવશે. ઈરાનના લોકો પણ સમગ્ર ક્ષેત્રના લોકોની જેમ તેની કિંમત ચૂકવી રહ્યા છે. માત્ર એક નવું રાજકીય અને સુરક્ષા માળખું જ દરેક માટે શાંતિ અને સુરક્ષા સુનિશ્ચિત કરી શકે છે.'

ઈરાન પાસે પરમાણુ હથિયાર ન હોય: મેક્રોન

તેમણે સલાહ આપી કે નવા રાજકીય માળખાએ એ વાત પર ધ્યાન આપવું પડશે કે ઈરાન ક્યારેય પરમાણુ હથિયાર મેળવી ન શકે. સાથે જ, તેના બેલેસ્ટિક મિસાઈલ કાર્યક્રમ અને પ્રાદેશિક તથા આંતરરાષ્ટ્રીય સ્તરે અસ્થિરતા ફેલાવતી ગતિવિધિઓથી ઉભા થતા જોખમોનો પણ ઉકેલ લાવવો પડશે.

સ્ટ્રેટ ઓફ હોર્મુઝ પુનઃસ્થાપિત કરવાની માંગ

ઈરાનને અપીલ કરતા મેક્રોને કહ્યું, 'સ્ટ્રેટ ઓફ હોર્મુઝમાં દરિયાઈ અવરજવરની સ્વતંત્રતા તાત્કાલિક પુનઃસ્થાપિત થવી જોઈએ. મેં ઈરાની રાષ્ટ્રપતિને એ પણ અપીલ કરી છે કે તેઓ સેસિલ કોહલર અને જેક્સ પેરિસને તાત્કાલિક સુરક્ષિત રીતે ફ્રાન્સ પરત ફરવાની મંજૂરી આપે. તેમનો મુશ્કેલીભર્યો સમય ઘણો લાંબો ખેંચાઈ ગયો છે અને તેમને તેમના પ્રિયજનો સાથે રહેવાનો અધિકાર છે.'