VIDEO : "ફોટો માટે ભીખ માગી રહી હતી..." ડોનાલ્ડ ટ્રમ્પના વિવાદાસ્પદ નિવેદન પર ઇટાલીના મહિલા PMનો જડબાતોડ પલટવાર

ઇટાલીના વડાપ્રધાન જ્યોર્જિયા મેલોની અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે આંતરરાષ્ટ્રીય મંચ પર જોરદાર શાબ્દિક યુદ્ધ ફાટી નીકળ્યું છે. તાજેતરમાં ફ્રાન્સના એવિયન શહેરમાં આયોજિત G-7 સમિટ દરમિયાન બંને નેતાઓ વચ્ચે મુલાકાત થઈ હતી, પરંતુ હવે આ મુલાકાતને લઈને ડોનાલ્ડ ટ્રમ્પે એક અત્યંત વિવાદાસ્પદ અને અજીબ દાવો કર્યો છે. ટ્રમ્પના આ નિવેદન બાદ મેલોનીએ પણ તેમને જડબાતોડ જવાબ આપ્યો છે. 

અમેરિકી રાષ્ટ્રપતિ ડોનાલ્ડ ટ્રમ્પે ઇટાલીના પીએમ જ્યોર્જિયા મેલોનીની મજાક ઉડાવતા દાવો કર્યો હતો કે, "મેલોનીએ મારી સાથે ફોટો પડાવવા માટે ભીખ માગી હતી. તેઓ મારી સાથે ફોટો ખેંચાવવા માટે એટલા બેતાબ હતા કે, મને તેમના પર દયા આવી ગઈ. સામાન્ય રીતે હું આવું નથી કરતો, પણ મેં ફોટો પડાવી લીધો."  

ટ્રમ્પના આ અપમાનજનક નિવેદન પર ઇટાલીના વડાપ્રધાન જ્યોર્જિયા મેલોનીએ મૌન તોડતા અત્યંત આકરો પ્રહાર કર્યો છે. તેમણે કહ્યું કે, કેટલાક નિવેદનો એવા હોય છે જેનો તુરંત જવાબ આપવો જરૂરી બની જાય છે. 

 

ટ્રમ્પના દાવાને તદ્દન 'મનઘડંત' અને પાયાવિહોણો ગણાવતા મેલોનીએ કહ્યું: "હું ખરેખર આશ્ચર્યચકિત અને પરેશાન છું કે અમેરિકાના રાષ્ટ્રપતિ પોતાના સહયોગી દેશોના નેતાઓ સાથે આવું વર્તન કેમ કરે છે? અફસોસની વાત એ છે કે, ટ્રમ્પ પશ્ચિમી દેશો અને અમેરિકાના અસલી દુશ્મનો સામે આવી આક્રમકતા કે દ્રઢતા નથી બતાવતા, પરંતુ તેવા નેતાઓ પ્રત્યે તેમનું વલણ ઘણું નરમ હોય છે."

 

તેમણે ટ્રમ્પને કડક શબ્દોમાં ચેતવણી આપતા ઉમેર્યું કે, "તેમને એક વાત યાદ રાખવી જોઈએ - ઇટાલી અને હું ક્યારેય કોઈની સામે નમતા નથી કે ભીખ નથી માગતા."

 

G-7 દેશો વચ્ચે તણાવ:  સામાન્ય રીતે G-7 દેશોના આંતરિક મતભેદો બંધ બારણે ઉકેલાતા હોય છે, પરંતુ આ રીતે જાહેર મંચ પર ટોચના નેતાઓનું એકબીજા પર પ્રહારો કરવું વૈશ્વિક કૂટનીતિમાં મોટી તિરાડ દર્શાવે છે.

મેલોનીની મજબૂત છબી : ટ્રમ્પ જેવા શક્તિશાળી નેતા સામે ન ઝૂકીને મેલોનીએ સાબિત કર્યું છે કે તેઓ પોતાના દેશના સન્માન અને સ્વાભિમાન સાથે કોઈ બાંધછોડ કરવા તૈયાર નથી.