ઇઝરાયલે લેબનોનના આ વિસ્તારો પર કર્યો કબજો! IDF એ પહેલીવાર નકશો બહાર પાડ્યો
છેલ્લું અપડેટ : 20 Apr 2026
ઇઝરાયેલ અને લેબનોન વચ્ચે યુદ્ધવિરામ (Ceasefire) ની સમજૂતી બાદ પણ સરહદી તણાવ યથાવત છે. આ દરમિયાન ઇઝરાયેલી સૈન્ય (IDF) એ પ્રથમ વખત એક સત્તાવાર નકશો જાહેર કરીને ખળભળાટ મચાવી દીધો છે. આ નકશામાં લેબનોનના એ વિસ્તારોને દર્શાવવામાં આવ્યા છે જે હાલમાં ઇઝરાયેલી સેનાના સીધા નિયંત્રણમાં છે.
સરહદથી 10 કિમી સુધી ઇઝરાયેલનો કબજો
IDF દ્વારા જાહેર કરાયેલા નકશા મુજબ, ઇઝરાયેલી સેનાએ લેબનોન સરહદની અંદર 5 થી 10 કિલોમીટર સુધીના વિસ્તારમાં પોતાની પકડ મજબૂત કરી લીધી છે. આ પટ્ટી પૂર્વથી પશ્ચિમ સુધી ફેલાયેલી છે, જેમાં લેબનોનના ડઝનબંધ ગામોનો સમાવેશ થાય છે. અહેવાલો અનુસાર, ઇઝરાયેલ આ વિસ્તારમાં 'બફર ઝોન' બનાવવાની યોજના પર કામ કરી રહ્યું છે.
ગામડાઓ કરવામાં આવ્યા નષ્ટ
ઉત્તરી ઇઝરાયેલના શહેરોને હિઝબુલ્લાહના રોકેટ હુમલાઓથી બચાવવા માટે ઇઝરાયેલી સેનાએ આ સરહદી ગામોમાં હિઝબુલ્લાહના આતંકી માળખાને તોડી પાડ્યા છે. ઇઝરાયેલના રક્ષા મંત્રી કાત્ઝે સ્પષ્ટ કર્યું છે કે, "સરહદ પર હિઝબુલ્લાહ દ્વારા ઉપયોગમાં લેવાતા ઘરો અને વિસ્ફોટકો ધરાવતી ઇમારતોને જમીનદોસ્ત કરવામાં આવશે જેથી અમારા સૈનિકો અને નાગરિકો પરનો ખતરો ટળી શકે."
બફર ઝોનની વ્યૂહરચના
ઇઝરાયેલે અગાઉ ગાઝા અને સીરિયામાં પણ સુરક્ષા માટે સમાન બફર ઝોન બનાવ્યા છે. હવે લેબનોનમાં પણ આ જ પેટર્ન જોવા મળી રહી છે. IDF એ એક નિવેદનમાં જણાવ્યું છે કે, "પાંચ ડિવિઝન અને નૌકાદળ સાથે મળીને દક્ષિણી લેબનોનમાં હિઝબુલ્લાહના નેટવર્કને ખતમ કરવાનું કામ ચાલી રહ્યું છે."
શું લોકો પરત ફરી શકશે?
જ્યારે IDF ને પૂછવામાં આવ્યું કે જે લેબનોની નાગરિકો યુદ્ધને કારણે ઘર છોડીને ભાગી ગયા છે, શું તેમને પરત આવવા દેવામાં આવશે? ત્યારે સેનાએ આ બાબતે હાલ કોઈ પણ ટિપ્પણી કરવાનો ઇનકાર કર્યો હતો.
બીજી તરફ, અમેરિકાની મધ્યસ્થીથી થયેલા યુદ્ધવિરામ બાદ હિઝબુલ્લાહ અને લેબનોન સરકાર તરફથી આ નકશા અંગે હજુ સુધી કોઈ સત્તાવાર પ્રતિક્રિયા આપવામાં આવી નથી. જોકે, હિઝબુલ્લાહ અગાઉ ચેતવણી આપી ચૂક્યું છે કે જો શરતોનું ઉલ્લંઘન થશે તો તેમના હાથ ફરી 'ટ્રિગર' પર હશે.
