હોર્મુઝમાંથી પસાર થતા જહાજ પર IRGCનો હુમલો: US નાકાબંધી વચ્ચે ઈરાનીની મોટી કાર્યવાહી

તેહરાન/મસ્કત: અમેરિકા અને ઈરાન વચ્ચે ચાલી રહેલા સંઘર્ષમાં સ્થિતિ અત્યંત ગંભીર બની ગઈ છે. શાંતિ મંત્રણાનો બીજો તબક્કો રદ થયાના ગણતરીના કલાકોમાં જ હોર્મુઝની ખાડીમાં મોટો હુમલો થયો છે. ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) દ્વારા એક કન્ટેનર જહાજને નિશાન બનાવવામાં આવ્યું છે, જેનાથી ખાડી દેશોમાં તણાવ ચરમસીમાએ પહોંચ્યો છે.

ઓમાન નજીક જહાજ પર એટેક

યુકે મેરિટાઇમ ટ્રેડ ઓપરેશન્સ (UKMTO) ના અહેવાલ મુજબ, આ ઘટના ઓમાનના ઉત્તર-પૂર્વમાં લગભગ 15 સમુદ્રી માઈલ દૂર બની હતી. જહાજના કેપ્ટને માહિતી આપી હતી કે IRGC ની ગનબોટ્સ (સશસ્ત્ર નૌકાઓ) અચાનક જહાજની નજીક આવી હતી અને તેના પર ફાયરિંગ શરૂ કરી દીધું હતું.

કંટ્રોલ રૂમને ભારે નુકસાન

આ હુમલો એટલો જોરદાર હતો કે જહાજના કંટ્રોલ રૂમને ગંભીર નુકસાન પહોંચ્યું છે. જોકે, રાહતની વાત એ છે કે જહાજ પર હાજર તમામ ક્રૂ સભ્યો સુરક્ષિત છે. હુમલા બાદ જહાજમાં કોઈ આગ લાગી નથી કે પર્યાવરણને નુકસાન પહોંચ્યું નથી, પરંતુ ટેકનિકલ નુકસાનને કારણે જહાજની ગતિવિધિ ખોરવાઈ છે.

ત્રીજી મોટી ઘટના: અમેરિકા અને ઈરાન સામસામે

છેલ્લા કેટલાક દિવસોમાં હોર્મુઝમાં આ ત્રીજી એવી ઘટના છે જેમાં કોઈ વ્યાપારી જહાજને નિશાન બનાવવામાં આવ્યું હોય. અગાઉની બે ઘટનાઓમાં અમેરિકાએ કાર્યવાહી કરી હતી, જ્યારે આ વખતે ઈરાને સીધો હુમલો કરીને અમેરિકાની નાકાબંધીનો જવાબ આપ્યો છે. અમેરિકી દળ દ્વારા ઈરાની જહાજો જપ્ત કરાયા બાદ આને ઈરાનનો વળતો જવાબ માનવામાં આવી રહ્યો છે.

મંત્રણાના માર્ગો બંધ?

સીઝફાયર અને શાંતિ મંત્રણાના બીજા તબક્કા માટે પાકિસ્તાન મધ્યસ્થી કરી રહ્યું હતું, પરંતુ અમેરિકાની નાકાબંધી અને હવે ઈરાનના આ આક્રમક હુમલાએ મંત્રણાના માર્ગો લગભગ બંધ કરી દીધા છે. ઈરાને અગાઉ જ ચેતવણી આપી હતી કે તે અમેરિકાની 'પાયરેસી' સામે ચૂપ નહીં રહે.

હાલમાં આ વિસ્તારમાં અમેરિકી નૌકાદળ અને સાથી દેશોના જહાજો હાઈ-એલર્ટ પર છે. આ હુમલાને કારણે વૈશ્વિક સપ્લાય ચેઈન અને તેલના ભાવ પર પણ મોટી અસર પડવાની આશંકા સેવાઈ રહી છે.