VIDEO: ઈરાનના વિદેશ મંત્રીએ રશિયા સાથે દેશના સંબંધો પર કર્યો ખુલાસો, અમેરિકા પર સાધ્યું નિશાન!
છેલ્લું અપડેટ : 09 Mar 2026
ઈરાનના વિદેશ મંત્રી સૈયદ અબ્બાસ અરાઘચીએ NBCના 'મીટ ધ પ્રેસ' કાર્યક્રમમાં રશિયા સાથે તેમના દેશના સંબંધોની પુષ્ટિ કરી છે. અમેરિકન ગુપ્તચર અધિકારીઓનું માનવું છે કે રશિયાએ મિડલ ઈસ્ટમાં અમેરિકન સૈનિકો અને સંપત્તિઓને નિશાન બનાવવા માટે ઈરાનને માહિતી પૂરી પાડી છે. અરાઘચીએ જણાવ્યું હતું કે ઈરાન અને રશિયા વચ્ચે લશ્કરી સહયોગ કોઈ નવી વાત નથી અને તે ભવિષ્યમાં પણ ચાલુ રહેશે. તેમણે ઉમેર્યું કે ઈરાન અને રશિયા વચ્ચે ખૂબ જ સારી ભાગીદારી છે.
જોકે, વિદેશ મંત્રીએ ચોક્કસ ગુપ્ત માહિતી હોવાનો ઈન્કાર કર્યો હતો. અરાઘચીએ કહ્યું કે ઈરાને તેની બેલિસ્ટિક મિસાઈલોની મારક ક્ષમતા જાણીજોઈને 2,000 કિમી સુધી મર્યાદિત રાખી છે, જેથી તે વિશ્વ માટે ખતરો ન બને. તેમણે વધુમાં જણાવ્યું કે આ યુદ્ધ અમેરિકા અને ઈઝરાયેલ દ્વારા ઈરાન પર લાદવામાં આવ્યું છે, જેનો તે આત્મરક્ષામાં જવાબ આપી રહ્યો છે.
મિસાઈલ ક્ષમતા અને પ્રાદેશિક સુરક્ષા
ઈરાને તેની મિસાઈલોની રેન્જ હાલમાં 2,000 કિલોમીટર (1,240 માઈલ) સુધી મર્યાદિત રાખી છે. અરાઘચીના જણાવ્યા અનુસાર, આ મર્યાદા વધારવાની હાલમાં કોઈ યોજના નથી અને લાંબા અંતરની મિસાઈલો પર કામ કરવાના કોઈ પુરાવા પણ નથી. હાલની રેન્જમાં આખું મિડલ ઈસ્ટ અને પૂર્વી યુરોપનો કેટલોક હિસ્સો આવે છે. તેમણે કહ્યું કે ઈરાન નથી ઈચ્છતું કે વિશ્વનો કોઈપણ દેશ તેને ખતરા તરીકે જુએ. અમેરિકા સુધી પહોંચતી મિસાઈલોના દાવાને પણ તેમણે સખત રીતે નકારી કાઢ્યા છે.
કાયમી શાંતિની માંગ
યુદ્ધવિરામના બદલે ઈરાન જંગના કાયમી અંતની શોધમાં છે. અરાઘચીએ કહ્યું કે કોઈપણ સમજૂતી પહેલા હુમલાખોરોએ જણાવવું પડશે કે તેમણે આ આક્રમકતા શા માટે શરૂ કરી. અમેરિકા અને ઈઝરાયેલ પર યુદ્ધ થોપવાનો આરોપ લગાવતા તેમણે કહ્યું કે ઈરાન પોતાના લોકો અને સુરક્ષા માટે લડવાનું ચાલુ રાખશે. તેમના મતે, ઈરાન જે કંઈ પણ કરી રહ્યું છે તે આત્મરક્ષા હેઠળ કરવામાં આવેલ કાયદેસરની કાર્યવાહી છે અને દેશને તેમ કરવાનો સંપૂર્ણ અધિકાર છે.
સ્કૂલ વિસ્ફોટ પર અમેરિકાને ઘેર્યું
અબ્બાસ અરાગચીએ 28 ફેબ્રુઆરીએ એક શાળામાં થયેલા વિસ્ફોટ માટે રાષ્ટ્રપતિ ડોનાલ્ડ ટ્રમ્પ દ્વારા ઈરાન પર મૂકવામાં આવેલા આરોપોનો સખત વિરોધ કર્યો હતો. આ વિસ્ફોટમાં 165થી વધુ લોકો માર્યા ગયા હતા, જેમાં મોટાભાગના બાળકો હતા. અરાઘચીનું કહેવું છે કે પુરાવા આને અમેરિકન હવાઈ હુમલો ગણાવે છે. સેટેલાઇટ ઈમેજ અને નિષ્ણાતોનું વિશ્લેષણ પણ સંકેત આપે છે કે વિસ્ફોટ અમેરિકન હવાઈ હુમલાને કારણે થયો હતો, જેણે રિવોલ્યુશનરી ગાર્ડ પરિસરને પણ નિશાન બનાવ્યું હતું. તેમણે પ્રશ્ન ઉઠાવ્યો કે જો અમેરિકા નહીં, તો આ હુમલા પાછળ બીજું કોણ હોઈ શકે?
