હેપેટાઈટીસ ઈન્ફેક્શનથી વિશ્વભરમાં દરરોજ 3500 લોકોના મોત થઈ રહ્યા છે: WHOની ચેતવણી

વર્લ્ડ હેલ્થ ઓર્ગેનાઈઝેશન (WHO) એ મંગળવારે કહ્યું કે હેપેટાઈટીસ ઈન્ફેક્શનને કારણે મૃત્યુઆંક વધી રહ્યો છે. આ રોગ વિશ્વભરમાં દર વર્ષે 1.3 મિલિયન લોકોના મૃત્યુ માટે જવાબદાર છે. તે ક્ષય રોગ જેવા રોગોની સમાન શ્રેણીમાં આવે છે.

‘WHO 2024 ગ્લોબલ હેપેટાઇટિસ રિપોર્ટ’માં જણાવવામાં આવ્યું છે કે 187 દેશોના નવા ડેટા દર્શાવે છે કે વાયરલ હેપેટાઇટિસથી થતા મૃત્યુની સંખ્યા 2022માં વધીને 13 લાખ થઇ છે. જે 2019માં 11 લાખ હતા. તેમાંથી 83 ટકા મૃત્યુ હેપેટાઇટિસ બી અને 17 ટકા હિપેટાઇટિસ સીને કારણે થયા છે. રિપોર્ટમાં કહેવામાં આવ્યું છે કે હેપેટાઇટિસ બી અને સીના ચેપને કારણે વિશ્વભરમાં દરરોજ 3,500 લોકો મૃત્યુ પામી રહ્યા છે.

યુનાઇટેડ નેશન્સ હેલ્થ એજન્સીના ડાયરેક્ટર-જનરલ ડૉ. ટેડ્રોસ અધાનમ ઘેબ્રેયેસસે જણાવ્યું હતું કે આ રિપોર્ટ ચિંતાજનક છે. હિપેટાઇટિસના ચેપને રોકવામાં વૈશ્વિક સ્તરે પ્રગતિ થઈ છે, પરંતુ મૃત્યુની સંખ્યા હજુ પણ વધી રહી છે. હેપેટાઈટીસ ધરાવતા બહુ ઓછા લોકોનું નિદાન અને સારવાર થઈ રહી છે. WHO દેશોને હિપેટાઇટિસના ચેપને રોકવામાં તમામ સાધનોનો ઉપયોગ કરીને સમર્થન આપવા માટે પ્રતિબદ્ધ છે.

રિપોર્ટમાં કહેવામાં આવ્યું છે કે હવે નિદાન અને સારવાર માટે વધુ સારા સાધનો ઉપલબ્ધ છે અને તેમની કિંમતો પણ ઘટી રહી છે. પરંતુ પરીક્ષણ અને સારવાર કવરેજ દરમાં વધારો થયો નથી. પરંતુ એજન્સીએ એમ પણ કહ્યું કે જો તાત્કાલિક પગલાં લેવામાં આવે તો 2030 સુધીમાં WHOના નાબૂદીના લક્ષ્ય સુધી પહોંચવું શક્ય છે. WHOના વડાએ કહ્યું કે, વિશ્વ આરોગ્ય સંસ્થા તમામ દેશોને શક્ય તમામ મદદ પૂરી પાડવા માટે પ્રતિબદ્ધ છે.