પાકિસ્તાનના પૂર્વ PM ઈમરાન ખાનના બહેનની ધરપકડ, PTI પાર્ટીની 'લોંગ માર્ચ' પહેલા પોલીસની કાર્યવાહી
છેલ્લું અપડેટ : 20 Sept 2026
પાકિસ્તાનના પૂર્વ વડાપ્રધાન ઈમરાન ખાનના બહેન અલીમા ખાનની ધરપકડ કરવામાં આવી છે. આ ધરપકડ 27 સપ્ટેમ્બરે યોજાનાર પાકિસ્તાન તહરીક-એ-ઈન્સાફ (PTI)ની 'લોંગ માર્ચ' પહેલા થઈ છે. એક અહેવાલ મુજબ, પોલીસે અલીમા ખાનની લાહોર સ્થિત તેમના નિવાસસ્થાનેથી ધરપકડ કરી હતી. અલીમા ખાન જેલમાં બંધ ઈમરાન ખાનના બહેન છે. ઈમરાન ખાન ઓગસ્ટ 2023થી જેલમાં છે. તેમની પાર્ટી PTI એ તેમની મુક્તિની માંગ સાથે 27 સપ્ટેમ્બરે વિરોધ પ્રદર્શનની જાહેરાત કરી છે. PTIના આ પ્રદર્શનની મુખ્ય માંગ ઈમરાન ખાનને તાત્કાલિક મુક્ત કરવાની છે. પોલીસે તેમના પર તોફાન મચાવવા, સરકારી કામમાં અવરોધ ઊભો કરવા અને પોલીસકર્મીઓ પર હુમલો કરવા જેવા આરોપો લગાવ્યા છે.
PTIના ચાર કાર્યકર્તાઓની પણ અટકાયત
અલીમા ખાનની ધરપકડ પહેલા પોલીસે PTIના ચાર કાર્યકર્તાઓ અને સમર્થકોની પણ અટકાયત કરી હતી. આ અટકાયતો પાર્ટીના 27 સપ્ટેમ્બરે યોજાનારા પ્રસ્તાવિત પ્રદર્શન પહેલા કરવામાં આવી છે. આ પ્રદર્શનમાં ઈમરાન ખાનની તાત્કાલિક મુક્તિની માંગ મુખ્ય મુદ્દો છે.
ઈસ્લામાબાદમાં પોલીસની ઝડપી તૈયારીઓ
PTIના પ્રસ્તાવિત દેશવ્યાપી પ્રદર્શનને ધ્યાનમાં રાખીને ઈસ્લામાબાદ પોલીસ અને રાજધાની તંત્રએ પણ તૈયારીઓ શરૂ કરી દીધી છે. એક સમાચાર પત્રના અહેવાલ મુજબ, પોલીસ શહેરમાં આવવા-જવાના રસ્તાઓ અને સંવેદનશીલ વિસ્તારોની સુરક્ષા વ્યવસ્થાની સમીક્ષા કરી રહી છે. પ્રદર્શન સંબંધિત પ્રવૃત્તિઓ પર સતત નજર રાખવામાં આવી રહી છે. આ અંગે ઈસ્લામાબાદના સેન્ટ્રલ પોલીસ ઓફિસમાં એક બેઠક મળી હતી, જેમાં સંબંધિત પોલીસ અધિકારીઓ હાજર રહ્યા હતા. બેઠકમાં પ્રદર્શનને કારણે થતી કોઈપણ મુશ્કેલીને રોકવા માટેની યોજના પર ચર્ચા કરવામાં આવી હતી.
