"આરબ પાર્ટીઓ સાથે ગઠબંધન શરમજનક!" વિપક્ષની સરકાર બનવાની સંભાવના પર ભડક્યા નેતન્યાહૂ

ઇઝરાયલ સંસદીય ચૂંટણીના પરિણામો અને મતગણતરી બાદ પણ સરકારની રચના અંગે ભારે અનિશ્ચિતતા પ્રવર્તી રહી છે. ૧૨૦ બેઠકો ધરાવતી ઇઝરાયલની સંસદ (નેસેટ) માં સરકાર બનાવવા માટે ૬૧ બેઠકોની જરૂરિયાત છે, પરંતુ વડાપ્રધાન બેન્જામિન નેતન્યાહૂનો રાઇટ-વિંગ ગઠબંધન કે ગાડી આઇઝનકોટના નેતૃત્વ હેઠળનો વિરોધ પક્ષ બંનેમાંથી કોઈ પણ જૂથ પોતાના દમ પર સ્પષ્ટ બહુમતી મેળવવામાં સફળ રહ્યું નથી.

તાજા આંકડાઓ મુજબ, નેતન્યાહૂના નેતૃત્વ હેઠળના ગઠબંધનને આશરે ૫૩ બેઠકો અને આઇઝનકોટના વિપક્ષી ગઠબંધનને ૪૮ બેઠકો મળવાનો અંદાજ છે. આ સમીકરણ વચ્ચે આરબ નેતૃત્વ ધરાવતી પાર્ટીઓ (રામ - Ra'am અને જોઈન્ટ લિસ્ટ) કુલ ૧૯ જેટલી બેઠકો જીતીને કિંગમેકરની ભૂમિકામાં આવી ગઈ છે.

વિપક્ષ દ્વારા આરબ પાર્ટીઓના સમર્થનથી વૈકલ્પિક સરકાર રચવાની અટકળો વચ્ચે બેન્જામિન નેતન્યાહૂએ આકરી પ્રતિક્રિયા આપી છે. નેતન્યાહૂએ વિપક્ષ પર નિશાન સાધતાં જણાવ્યું કે આરબ પક્ષોના ટેકાથી સરકાર રચવાનો વિચાર કરવો પણ શરમજનક છે. બીજી તરફ, ઇઝરાયલની યહૂદી ઓળખ અને રાષ્ટ્રીય સુરક્ષાના મુદ્દાઓને કારણે વિપક્ષમાં પણ આરબ પક્ષો સાથે ગઠબંધન કરવા બાબતે ગંભીર મતભેદો છે.

જો બંનેમાંથી કોઈ પક્ષ જરૂરી ૬૧ સાંસદોનું સમર્થન મેળવવામાં નિષ્ફળ રહે અથવા નેશનલ યુનિટી સરકાર પર સહમતી ન સધાય, તો દેશમાં ફરીથી ચૂંટણીઓ યોજવાની સ્થિતિ ઊભી થઈ શકે છે. હાલ પ્રમુખ ઇસાક હર્ઝોગ પક્ષો સાથે મંત્રણા કરીને સરકાર રચવાની શક્યતાઓ ચકાસી રહ્યા છે.