ગૌરવવંતી ક્ષણ: અમેરિકામાં ગુજરાતના ડૉ. કશ્યપ પટેલનું સન્માન, પ્રતિષ્ઠિત ‘હિન્દ રત્ન એવોર્ડ’થી નવાજાયા

ગુજરાત માટે ગૌરવની ક્ષણ છે. અમેરિકાના જાણીતા ઓન્કોલોજિસ્ટ (કેન્સર નિષ્ણાત) ડૉ. કશ્યપ પટેલને યુનાઇટેડ કિંગડમના લોર્ડ મેયર ઓફ ઓક્સફર્ડ દ્વારા NRI વેલ્ફેર સોસાયટીના ઉપક્રમે પ્રતિષ્ઠિત ‘હિન્દ રત્ન એવોર્ડ’થી સન્માનિત કરવામાં આવ્યા છે. તેમને ગોલ્ડ મેડલ અને પ્રમાણપત્ર એનાયત કરવામાં આવ્યાં છે.

અમદાવાદથી અમેરિકાની સફર

ગુજરાતના કડવા પાટીદાર પરિવારમાં જન્મેલા ડૉ. કશ્યપ પટેલે અમદાવાદની મેડિકલ કોલેજમાં અભ્યાસ કર્યો હતો. શરૂઆતમાં બ્રિટનમાં તબીબી પ્રેક્ટિસ કર્યા બાદ તેઓ અમેરિકાના નોર્થ કેરોલિના રાજ્યમાં સ્થાયી થયા અને ત્યાં કેન્સરના દર્દીઓની સારવાર તથા સેવાકીય પ્રવૃત્તિઓમાં યોગદાન આપ્યું.

સેવા અને આધ્યાત્મિકતાને સમર્પિત જીવન

ડૉ. પટેલ દર્દીઓની નિઃસ્વાર્થ સેવા, સાદગી અને કરુણાભાવ માટે જાણીતા છે. આર્થિક રીતે નબળા દર્દીઓને સારવારમાં રાહત આપવાની સાથે તેઓ દર્દીઓના માનસિક અને આધ્યાત્મિક સ્વાસ્થ્ય પર પણ ભાર મૂકે છે. શ્રીમદ્ ભગવદ્ ગીતાના કર્મયોગના સિદ્ધાંતથી પ્રેરિત ડૉ. પટેલ સેવા કાર્યને જીવનનું મુખ્ય લક્ષ્ય માને છે.

તેમના નામે 25થી વધુ સન્માનોનો ઉલ્લેખ કરવામાં આવે છે. તેમના પુસ્તક Between Life and Death દ્વારા પણ તેઓ ચર્ચામાં રહ્યા છે. હિન્દ રત્ન એવોર્ડથી સન્માનિત થતાં અમેરિકામાં વસતા ભારતીયો અને ગુજરાતમાં તેમના પરિવારજનોમાં આનંદની લાગણી ફેલાઈ છે.