ઇટલીના વડાપ્રધાન જ્યોર્જિયા મેલોનીની મજાક ઉડાવવી પત્રકારને પડી ભારે, કોર્ટે આપી આવી સજા 

ઇટલીમાં વડાપ્રધાનની મજાક ઉડાવવી એક પત્રકારને મોંઘી પડી. કોર્ટે તેના પર ભારે દંડ ફટકાર્યો છે. પીએમ મેલોનીની મજાક ઉડાવવા બદલ ત્યાંની કોર્ટે 4.5 લાખ રૂપિયાનો દંડ ફટકાર્યો હતો. મિલાન કોર્ટે પોતાના આદેશમાં કહ્યું કે પત્રકારે આ રકમ વડાપ્રધાન મેલોનીને ચૂકવવી જોઈએ, કારણ કે તેમની છબીને નુકસાન થયું છે. સ્થાનિક મીડિયા અનુસાર, જ્યોર્જિયા મેલોનીની ઊંચાઈ વિશે પત્રકાર જિયુલિયા કોર્ટેસીએ ફની પોસ્ટ કરી હતી. આ સિવાય ઑક્ટોબર 2021માં X પર લખેલી પોસ્ટ માટે કોર્ટેસી પર 1200 યુરોનો દંડ પણ લગાવવામાં આવ્યો છે. તેણે મેલોનીની ઊંચાઈ પર ટિપ્પણી કરી હતી.  તેને બોડી શેમિંગની શ્રેણીમાં રાખવામાં આવી હતી.

જો કે પત્રકારે કોર્ટના નિર્ણય પર નારાજગી વ્યક્ત કરી છે. કોર્ટના નિર્ણયના સંદર્ભમાં કોર્ટેસીએ X પર લખ્યું કે ઇટાલિયન સરકારને વાણીની સ્વતંત્રતા અને પત્રકારો વચ્ચેના અભિપ્રાયના તફાવતો સાથે ઘણી સમસ્યાઓ છે. ત્રણ વર્ષ પહેલા ઈટાલીના વડાપ્રધાન જ્યોર્જિયા મેલોની અને પત્રકાર કોર્ટસી વચ્ચે સોશિયલ મીડિયા પર ઘર્ષણ થયું હતું. ત્યારબાદ પીએમ મેલોનીએ પત્રકાર સામે કાનૂની વલણ અપનાવ્યું હતું. મહિલા પત્રકારે તેના ટ્વીટમાં લખ્યું હતું કે જ્યોર્જિયા મેલોની, તમે મને ડરાવી શકતા નથી. છેવટે, તમે ફક્ત ચાર ફૂટની હાઈટ ધરાવો છો. હું તમને જોઈ પણ શકતી નથી.

ઈટાલીની અલગ-અલગ મીડિયા વેબસાઈટ પર પીએમ મેલોનીની ઊંચાઈ 1.58 મીટરથી 1.63 મીટરની વચ્ચે આપવામાં આવી છે. કોર્ટસી આ સજા સામે અપીલ પણ કરી શકે છે. દરમિયાન, મેલોનીના વકીલે કહ્યું કે જો પીએમ પત્રકાર પાસેથી કોઈ રકમ મેળવે છે, તો તે ચેરિટીમાં દાન કરશે. કોર્ટેસીએ ગુરુવારે ટ્વિટર પર પોસ્ટ કર્યું કે ઇટાલીમાં સ્વતંત્ર પત્રકારો માટે આ મુશ્કેલ સમય છે. આપણે આવનારા સમયમાં સારા દિવસોની આશા રાખવી જોઈએ. અમે બિલકુલ પીછેહઠ નહીં કરીએ. આ પહેલીવાર નથી કે જ્યારે મેલોની કોઈ પત્રકાર સાથે ઘર્ષણમાં આવી હોય. ગયા વર્ષે, રોમે સૌથી વધુ વેચાતા લેખક રોબર્ટો સેવિઆનોને 1,000 યુરો વત્તા કાનૂની ખર્ચનો દંડ ફટકાર્યો હતો. આ કેસ 2021માં ટીવી પર રોબર્ટો દ્વારા મેલોનીના અપમાનનો હતો.