ગાઝા/ હોસ્પિટલમાં ખોદકામ કરતા મળ્યા 200 મૃતદેહો, હમાસે ઈઝરાયેલ પર નિર્દોષની હત્યાના લગાવ્યા આરોપ

ઇઝરાયેલ અને હમાસ વચ્ચે યુદ્ધ શરૂ થયાને 6 મહિનાથી વધુ સમય થઈ ગયો છે. ગાઝા શહેરમાં ઈઝરાયેલની સેના દ્વારા કરવામાં આવેલા નરસંહારથી અમેરિકા પણ ઉશ્કેરાઈ ગયું છે. દરમિયાન હમાસના અધિકારીઓનો આરોપ છે કે ગાઝામાં ખાન યુનિસ હોસ્પિટલમાં ખોદકામ દરમિયાન 200 થી વધુ મૃતદેહો મળી આવ્યા હતા. હમાસે ઈઝરાયેલ પર હોસ્પિટલને સામૂહિક કબ્રસ્તાનમાં ફેરવવાનો આરોપ લગાવ્યો છે. મૃતદેહોની બર્બરતા જોઈ સંયુક્ત રાષ્ટ્ર પણ ગુસ્સે ભરાયું છે. તેમનું કહેવું છે કે કેટલાક મૃતદેહોના હાથ બાંધેલા હતા અને કેટલાકના શરીર પર કપડાં પણ નહોતા.

હમાસના અધિકારીઓએ દાવો કર્યો હતો કે ઇઝરાયલી દળો દ્વારા સેંકડો નિર્દોષ લોકો માર્યા ગયા હતા અને તેમને હોસ્પિટલમાં દફનાવવામાં આવ્યા હતા. હમાસે અહીં સામૂહિક કબર હોવાનો દાવો કર્યો છે. જોકે, ઈઝરાયેલની સેનાએ હમાસના આરોપોને પાયાવિહોણા ગણાવ્યા હતા અને આ દાવાને ખોટો ગણાવ્યો હતો. ધ ટાઇમ્સ ઑફ ઇઝરાયેલે અહેવાલ આપ્યો છે કે આ વિસ્તારમાં ઇઝરાયલી દળો અને હમાસના આતંકવાદીઓ વચ્ચેની લડાઈ વચ્ચે પેલેસ્ટિનિયનોએ પોતે આ સ્થળ પર મૃતદેહોને દફનાવી દીધા હતા.

ઇઝરાયેલ ડિફેન્સ ફોર્સે હમાસના આરોપને પાયાવિહોણા ગણાવીને ફગાવી દીધા હતા. IDFના પ્રવક્તાએ એક નિવેદનમાં જણાવ્યું હતું કે ઇઝરાયેલના બંધકોને શોધી રહેલા અમારા દળોએ પેલેસ્ટિનિયનો દ્વારા અગાઉ નાસેર હોસ્પિટલ પાસે દફનાવવામાં આવેલા મૃતદેહોની તપાસ કરી હતી અને તપાસ કર્યા બાદ મૃતદેહોને તે જ જગ્યાએ પરત દફનાવ્યા હતા જ્યાં તે અગાઉ દફનાવવામાં આવ્યા હતા.

કેટલાક મૃતદેહોના હાથ બાંધેલા હતા તો કેટલાકના શરીર પર કપડા પણ નહોતા

બીજી તરફ, સંયુક્ત રાષ્ટ્ર માનવાધિકાર કાર્યાલયે દાવો કર્યો છે કે હોસ્પિટલમાં ખોદકામ દરમિયાન મળી આવેલા મૃતદેહોમાંથી કેટલાકના હાથ બાંધેલા હતા અને કેટલાકના કપડાં કાઢી નાખવામાં આવ્યા હતા. આઇડીએફએ આ કેસ પર સખત પ્રતિક્રિયા આપતા કહ્યું કે તાજેતરના મહિનાઓમાં નાસર હોસ્પિટલના વિસ્તારમાં તેની કામગીરી દરમિયાન, તેના સૈનિકોએ “ઇઝરાયેલી બંધકોને શોધવા માટે હોસ્પિટલના મેદાનમાં પેલેસ્ટિનિયનો દ્વારા દફનાવવામાં આવેલા શબની તપાસ કરી હતી.”