VIDEO: ANDARNI VAAT / દેવાસમાં પહેલા જ વરસાદે ખોલી વિકાસની પોલ, નવનિર્મિત ચેકડેમની રીટેનિંગ વોલ ધરાશાયી!
છેલ્લું અપડેટ : 13 Jul 2026
મધ્ય પ્રદેશના દેવાસ જિલ્લામાં તાજેતરમાં પડેલા ભારે વરસાદને કારણે એક મોટી દુર્ઘટના સામે આવી હતી, જેમાં એક નવનિર્મિત ચેકડેમની પ્રોટેક્શન અને રીટેનિંગ વોલ ધસી પડી હતી. ચાલુ નિર્માણ કાર્ય દરમિયાન જ આ પ્રકારે દીવાલ ધરાશાયી થઈ જતાં ભ્રષ્ટાચાર અને કામગીરીની ગુણવત્તા સામે ગંભીર સવાલો ઊભા થયા હતા. ઘટનાની જાણ થતાં જ ગ્રામીણ વિસ્તારના લોકો મોટી સંખ્યામાં એકઠા થઈ ગયા હતા અને તંત્ર સામે ભારે રોષ વ્યક્ત કર્યો હતો. રોડ અને ચેકડેમના નિર્માણમાં નબળી સામગ્રીનો ઉપયોગ કરવામાં આવ્યો હતો, જેના કારણે પહેલા જ વરસાદમાં આ દીવાલ ધસી ગઈ હતી. ગ્રામજનોનો આક્ષેપ છે કે અધિકારીઓ અને કોન્ટ્રાક્ટરની મિલીભગતને કારણે આ સરકારી નાણાંનો દુરુપયોગ થયો છે. આ ઘટનાને પગલે આસપાસના ગ્રામીણ વિસ્તારોનો સંપર્ક પણ ખોરવાઈ જવાની ભીતિ સેવાઈ રહી છે.
ઘટના અંગે રાજકીય ગરમાવો વધતાં મધ્ય પ્રદેશ કોંગ્રેસ પ્રમુખ જીતુ પટવારીએ સરકાર અને સ્થાનિક તંત્ર પર આકરા પ્રહારો કર્યા હતા. તેમણે આક્ષેપ કર્યો હતો કે રાજ્યમાં નિર્માણ પામતા પ્રકલ્પોમાં વ્યાપક ભ્રષ્ટાચાર થઈ રહ્યો છે અને જવાબદાર લોકો સામે કડક કાર્યવાહી થવી જોઈએ. બીજી તરફ મામલાની ગંભીરતાને ધ્યાનમાં રાખીને જળ સંસાધન વિભાગના એસડીઓ નેહા દુબેએ ઘટનાસ્થળની મુલાકાત લીધી હતી. તેમણે જણાવ્યું હતું કે રીટેનિંગ વોલ ક્ષતિગ્રસ્ત થવાના કારણોની તપાસ કરવા માટે ઉચ્ચ સ્તરીય તપાસના આદેશ આપી દેવામાં આવ્યા છે. તંત્ર દ્વારા ખાતરી આપવામાં આવી હતી કે જો તપાસમાં કોન્ટ્રાક્ટર કે કોઈ અધિકારીની બેદરકારી સામે આવશે તો તેમની સામે કડક કાયદેસરનાં પગલાં ભરવામાં આવશે. હાલ તંત્ર દ્વારા ક્ષતિગ્રસ્ત વિસ્તારમાં સમારકામ હાથ ધરીને માર્ગ વ્યવહાર સુરક્ષિત કરવાના પ્રયાસો શરૂ કરાયા છે.
બ્યૂરો રિપોર્ટ જીએસટીવી
