અહીં આવેલી છે 'વિશ્વની સૌથી નાની જેલ'! માત્ર 2 કેદીઓ માટે જ છે જગ્યા

જ્યારે જેલની વાત આવે છે, ત્યારે તિહાર અથવા યરવડા જેલો તમારા મગજમાં આવે છે, જે એટલી મોટી છે કે ત્યાં હજારો કેદીઓ છે. સેન્ટ્રલ જેલની સત્તાવાર વેબસાઇટ અનુસાર, તિહાર જેલમાં 10,026 કેદીઓ માટે રહી શકે છે. પરંતુ શું તમે જાણો છો કે દુનિયાની સૌથી નાની જેલ ક્યાં આવેલી છે? આ જેલ બ્રિટનના સૌથી નાના ટાપુ પર બનેલી છે. આ જેલ એટલી નાની છે કે તેમાં માત્ર બે કેદીઓ રહી શકે છે.

એક રિપોર્ટ અનુસાર ઈંગ્લિશ ચેનલના સર્ક આઈલેન્ડ પર બનેલી સર્ક જેલને દુનિયાની સૌથી નાની જેલ માનવામાં આવે છે. તે 1856માં બનાવવામાં આવી હતી. ત્યારથી લઈને અત્યાર સુધી આ જેલમાં કોઈ ખાસ ફેરફાર નથી થયો. અંદરનો દેખાવ બદલાયો છે, નળ-ટોઇલેટની સુવિધા અને વીજળી આપવામાં આવી છે. સર્ક આઈલેન્ડનો વિસ્તાર 5.4 ચોરસ કિલોમીટર છે. 2023ની વસ્તી ગણતરી મુજબ આ ટાપુ પર 562 લોકો રહે છે.

168 વર્ષ પહેલા બનાવવામાં આવી હતી આ જેલ

1832માં કોર્ટે આ જેલ બનાવવાનો આદેશ આપ્યો હતો, પરંતુ તેને બનાવવા માટે કોઈની પાસે પૈસા ન હોવાથી તેને પૂર્ણ થતા 24 વર્ષ લાગ્યા હતા. જેલની અંદરના વિસ્તારને હવે વિભાજિત કરવામાં આવ્યો છે, પરિણામે જેલમાં બે રૂમ છે. એક રૂમ 6 બાય 6 ફૂટનો છે જ્યારે બીજો રૂમ 6 બાય 8 ફૂટનો છે. બંને રૂમમાં લાકડાના નાના બેડ છે. આ જેલમાં એક કેદીને વધુમાં વધુ 2થી 3 દિવસ સુધી રાખી શકાય છે. જો કે, આ ટાપુ પર કોઈ મોટા ગુનાઓ નથી થતા. જેના કારણે ટાપુ પર માત્ર 2 પોલીસકર્મી છે.

જેલનો વધુ ઉપયોગ નથી થતો

રિપોર્ટ અનુસાર, આ ટાપુ પર રહેતા કેટલાક લોકોનો દાવો છે કે અહીંના ઘણા લોકો પર નશામાં ડ્રાઈવિંગ અથવા કેટલાક અન્ય કેસ સામેલ છે, પરંતુ સંસાધનોની અછતને કારણે તેમની વિરુદ્ધ કોઈ કાર્યવાહી થઈ શકી નથી. આ કારણોસર, ટાપુ પર જેલ હોવા છતાં, તેનો વધુ ઉપયોગ થતો નથી.