રાત્રે આકાશમાંથી આવી દેખાય છે ભારત-પાકિસ્તાન બોર્ડર! VIDEO જોઈ મંત્રમુગ્ધ થયા લોકો

ઇન્ટરનેટ પર હાલમાં ભારત-પાકિસ્તાન બોર્ડરનો એક ખૂબ જ સુંદર વીડિયો ઝડપથી વાયરલ થઈ રહ્યો છે. આ વીડિયો ઇન્ડિગો એરલાઇન્સના પાયલટ દ્વારા પોતાના કોકપિટમાંથી રેકોર્ડ કરવામાં આવ્યો છે. રાતના અંધારામાં આકાશમાંથી આ બોર્ડર કેવી દેખાય છે, તે આ ક્લિપમાં સ્પષ્ટપણે જોઈ શકાય છે. આ નજારો ખરેખર મંત્રમુગ્ધ કરી દેનારો છે.

વાયરલ થઈ રહેલા આ વીડિયોમાં દેખાય છે કે રાતના અંધારા વચ્ચે પીળા રંગના તેજસ્વી પ્રકાશની એક લાંબી અને ચમકતી રેખા જઈ રહી છે. આ ચમકતી રેખા ભારત અને પાકિસ્તાનને અલગ કરતી રેડક્લિફ લાઇન છે. ચુસ્ત સુરક્ષા ધરાવતી આ બોર્ડર પર બંને દેશોની ચોકીઓ અને સુરક્ષા કેમ્પ આવેલા છે, જેની લાઈટો આકાશમાંથી જોતાં તારાઓના સમૂહ જેવી દેખાય છે. આ નજારો એટલો જાદુઈ છે કે પહેલી નજરે વિશ્વાસ કરવો મુશ્કેલ થઈ જાય છે.

અંતરિક્ષમાંથી પણ દેખાય છે આ રોશની

પાયલટે પોતાના ઇન્સ્ટાગ્રામ એકાઉન્ટ પર આ વીડિયો શેર કરીને કેપ્શનમાં લખ્યું, "ભારત-પાક બોર્ડર પર લાગેલી આ લાઈટો એટલી તેજસ્વી છે કે તેને સ્પેસ (અંતરિક્ષ)માંથી પણ જોઈ શકાય છે. રાતના સન્નાટામાં અંધારાને ચીરતો આ પ્રકાશ ખરેખર અદ્ભુત લાગે છે."

આ વીડિયો જોઈને નેટીઝન્સ મંત્રમુગ્ધ થઈ ગયા છે અને અલગ-અલગ પ્રકારની કોમેન્ટ્સ કરી રહ્યા છે. એક યુઝરે લખ્યું, બંને તરફ ખૂબ જ પ્રેમાળ લોકો રહે છે, જેમને રાજકારણ અને ઇતિહાસની કડવાશે આપસમાં વહેંચી દીધા છે. બીજા એક યુઝરે રમૂજી અંદાજમાં પૂછ્યું, "બધું બરાબર છે, પણ આ બોર્ડરની વીજળીનું બિલ કોણ ભરતું હશે? જ્યારે અન્ય એક યુઝરે લખ્યું, "આ દ્રશ્ય એવું છે કે જાણે બે સમુદ્ર એકસાથે વહી રહ્યા હોય, પણ ક્યારેય એકબીજાને મળી ન શકે.